Read La Bible en Malgache Zakaria 3 Bible Online

Zakaria 3 - La Bible en Malgache bible

Zakaria 3

¹Ary nasehony ahy fa indro, i Josoa mpisoronabe dia nitsangana teo anatrehan’ilay Anjelin’NY TOMPO*, ary i Satana* nitsangana teo ankavanany hiampanga azy.

²Ary hoy NY TOMPO tamin’i Satana: Hananatra anao anie NY TOMPO, ry Satana! Eny, NY TOMPO izay nifidy an’i Jerosalema anie hananatra anao! Tsy forohana nosarihana tamin’ny afo va ity?

³Ary i Josoa dia nijoro teo anoloan’ilay Anjely tamin’ny fitafiana maloto.

⁴Dia niteny tamin’ireo izay nitsangana teo anoloany NY TOMPO hoe: Esory aminy ny fitafiana maloto! Ary hoy koa Izy taminy: Indro, efa nesoriko ny helokao, ary hampiakanjoiko akanjo fihaingoana ianao.

⁵Ary hoy aho: Aoka hasiana fehiloha madio eo an-dohany! Dia nasiany fehiloha madio teo an-dohany sady nampitafiany izy. Ary ilay Anjelin’NY TOMPO nijoro teo.

⁶Ary ilay Anjelin’NY TOMPO dia nanao izao fanambaràna izao tamin’i Josoa hoe:

⁷Izao no lazain’Andriamanitra, Tompon’izao rehetra izao: Raha mizotra amin’ny lalako ianao ary mitandrina ny didiko dia ianao no hanam-pahefana amin’ny tranoko sy hitandrina ny kianjako sady homeko lalana malalaka ho eo amin’ireo mijoro ireo ianao.

⁸Koa mihainoa, ry Josoa mpisoronabe, dia ianao sy ny namanao izay mipetraka eo anoloanao, fa olona atao famantarana ireo: Indro, entiko i Rantsana[1] Mpanompoko.

⁹Fa indro, ny vato izay napetrako teo anoloan’i Josoa: Misy masony fito io vato tokana io. Indro, Izaho no hanoratra izay tokony hosoratina eo, hoy Andriamanitra, Tompon’izao rehetra izao, ary hesoriko amin’ny indray andro monja ny helok’ity tany ity.

¹⁰Amin’izany andro izany, hoy Andriamanitra, Tompon’izao rehetra izao, dia samy hiantso ny namanareo avy ho eo ambanin’ny voaloboka sy ho eo ambanin’ny aviavy ianareo.