Read La Bible en Malgache Zakaria 4 Bible Online

Zakaria 4 - La Bible en Malgache bible

Zakaria 4

¹Ary niverina ilay anjely niresaka tamiko ka namoha ahy toy ny olona fohazina amin-tory.

²Dia hoy izy tamiko: Inona no hitanao? Ary hoy aho: Hitako fa indro, misy fitoeran-jiro izay volamena izy manontolo, ary ny fitoeran-diloilo eo aminy dia eo amboniny, ary jiro fito no eo an-tampony. Misy fantsona fito avy amin’ny jiro tsirairay izay eo an-tampony.

³Ary misy hazo oliva roa eo anilany, ny iray dia eo ankavanan’ny fitoeran-diloilo, ary ny iray dia eo ankaviany.

⁴Dia niteny tamin’ilay anjely niresaka tamiko aho hoe: Inona moa ireo, tompoko?

⁵Ary ilay anjely niresaka tamiko dia nanontany ahy hoe: Tsy fantatrao va ireo? Fa hoy aho: Tsia, tompoko.

⁶Dia hoy izy: Izao no tenin’NY TOMPO amin’i Zerobabela: Tsy amin-kery na amim-pahatanjahana fa amin’ny Fanahiko, hoy Andriamanitra, Tompon’izao rehetra izao.

⁷Iza moa ianao, ry tendrombohitra lehibe? Ho tonga tany lemaka eo anoloan’i Zerobabela ianao. Izy no hitondra ny vato hatao tendrony sady hisy antsoantso hoe: Fahasoavana, fahasoavana anie ho aminy!

⁸Dia tonga tamiko indray ny tenin’NY TOMPO hoe:

⁹Ny tanan’i Zerobabela no nanao ny fanorenan’ity trano ity, ary ny tanany koa no hamita azy; dia ho fantatrao fa Andriamanitra, Tompon’izao rehetra izao, no naniraka ahy ho aminao.

¹⁰Fa iza no nanamavo ny andro anaovana asa madinika? Ho faly ny olona mahita ny pilao eny an-tanan’i Zerobabela. Ireo fito ireo dia ny mason’NY TOMPO izay mijery manerana ny tany rehetra.

¹¹Dia nanontany Azy aho hoe: Inona moa ireo hazo oliva roa eo ankavanan’ny fitoeran-jiro sy eo ankaviany ireo?

¹²Ary nanontany Azy fanindroany aho hoe: Inona moa ireo sampahon’oliva roa eo amin’ny fantsona volamena izay mampijononoka volamena avy ao aminy ireo?

¹³Dia hoy izy: Tsy fantatrao va ireo? Ary hoy aho: Tsia, tompoko.

¹⁴Dia hoy izy: Ireo ny roalahy izay voahosotra amin’ny diloilo; ireo no mijoro eo anoloan’ny Tompon’ny tany rehetra.