Read La Bible en Malgache Zakaria 9 Bible Online

Zakaria 9 - La Bible en Malgache bible

Zakaria 9

¹Teny faminaniana. Tonga any amin’ny faritanin’i Hadraka ny tenin’NY TOMPO ary miato any Damaskosy izany. Fa ny mason’NY TOMPO mandinika ny olombelona mbamin’ny foko rehetra amin’ny Israely

²sy i Hamata koa, izay mifanolotra aminy, i Tiro sy i Sidona koa, izay manana fahendrena be.

³I Tiro dia nanao manda mafy ho an’ny tenany ka nanangona volafotsy ohatra ny vovoka sy volamena tsara ohatra ny fotaka eny an-dalambe.

⁴Indro, hofoanan’ny Tompo ny fananany sady harodany any an-dranomasina ny mandany ary ho levon’ny afo izy.

⁵I Askelona dia hahita izany ka ho raiki-tahotra, i Gaza koa, ka ho toran-kovitra indrindra, ary i Ekrona, fa ho tonga henatra ny fanantenany; tsy hisy mpanjaka intsony ao Gaza ary i Askelona tsy honenana.

⁶Zazasary no honina ao Asdoda ary hopotehiko ny reharehan’ny Filistina.

⁷Hesoriko eny am-bavany ny rany[3] ary tsy ho eny anelanelan’ny nifiny ny fahavetavetany[4]; ary izy koa dia ho sisa ho an’Andriamanitsika sy ho toy ny lohany amin’i Joda, ary i Ekrona dia ho toy ny Jebosita.

⁸Manangana toby hiaro ny tranoko Aho noho ny miaramila betsaka, dia izay mandroso sy miverina; mba tsy hisy mpampahory handeha hamakivaky eo aminy intsony; fa ankehitriny dia ny masoko no miambina azy.

⁹Mifalia indrindra, ry Ziona* zanakavavy! Manaova feo fifaliana, ry Jerosalema zanakavavy; Indro, ny Mpanjakanao avy ho anao. Marina Izy sady mpandresy, manetry tena sady mitaingina boriky, boriky tanora, zanaky ny borikivavy.

¹⁰Hofoanako tsy hisy kalesy fitondra miady intsony any Efraima, na soavaly any Jerosalema; hotapahiko koa ny tsipìka fiadiana. Hanambara fiadanana amin’ny Jentilisa* Izy; ny fanapahany dia ho hatramin’ny ranomasina iray ka hatramin’ny ranomasina iray ary hatramin’ny ony Eofrata ka hatramin’ny faran’ny tany.

¹¹Ny aminao koa, noho ny ran’ny fanekena taminao no efa namoahako ny mpifatotra ao aminao avy tao an-davaka tsy misy rano.

¹²Miverena ho amin’ny fiarovana mafy, ianareo mpifatotra manana ny fanantenana! Anio koa no hanambarako hoe: Hanonitra avo roa heny ho anao Aho.

¹³Fa nohenjaniko ny tsipìkako, dia i Joda, ary i Efraima no nataoko zana-tsipìka; ary hotairiko ny zanakao, ry Ziona*, hiady amin’ny zanakao, ry Gresy! Hataoko toy ny sabatry ny lehilahy mahery ianao.

¹⁴Ary NY TOMPO hiseho eo amboniny ka handeha toy ny tselatra ny zana-tsipìkany; NY TOMPO Andriamanitra hitsoka anjomara ka handroso amin’ny tafio-drivotra any atsimo.

¹⁵Andriamanitra, Tompon’izao rehetra izao, no hiaro ireny; dia hihinana ireny ka hanitsakitsaka vaton’antsamotady; ary hisotro ireny ka hihorakoraka tahaka ny azon’ny divay ary ho feno tahaka ny lovia famafazana ireny, tahaka ny zoron’ny alitara.

¹⁶Amin’izany andro izany NY TOMPO Andriamaniny dia hamonjy ny olony toy ny famonjy andian’ondry; fa ireny no vato eo amin’ny satroboninahitra, mamirapiratra eny amin’ny taniny.

¹⁷Akory ny hasoany! Ary akory ny hatsaran-tarehiny! Vary no hampaharoroka ny zatovo, ary ranom-boaloboka kosa no hampaharoroka ny zazavavy.