Read La Bible en Malgache Matio 10 Bible Online

Matio 10 - La Bible en Malgache bible

Matio 10

¹Ary Jesosy niantso ny mpianany roa amby folo lahy hankeo Aminy ka nanome azy ireo fahefana handroaka fanahy maloto sy hanasitrana ny aretina rehetra mbamin’ny rofy rehetra.

²Izao no anaran’ny Apostoly roa amby folo lahy: Ny voalohany, i Simona, izay atao hoe Petera, sy i Andrea rahalahiny; i Jakoba, zanak’i Zebedio, sy i Jaona rahalahiny;

³i Filipo sy i Bartolomeo; i Tomasy sy i Matio mpamory hetra; i Jakoba, zanak’i Alfeo;

⁴i Tadeo; i Simona kananeana[13] ary i Jodasy iskariota, ilay namadika Azy.

⁵Nirahin’i Jesosy ireo roa amby folo lahy ireo ka nohafatrafarany hoe: Aza mandeha any amin’ny lalan’ny Jentilisa* ary aza miditra amin’izay tanànan’ny Samaritana*,

⁶fa aleo mankany amin’ny ondry very amin’ny taranak’Israely.

⁷Ary raha mandeha ianareo dia mitoria hoe: Efa manakaiky ny fanjakan’ny lanitra.

⁸Sitrano ny marary, atsangano ny maty, diovy ny boka, roahy ny demonia*; efa nahazo maimaimpoana ianareo, koa manomeza maimaimpoana.

⁹Aza mitady volamena na volafotsy na varahina, ho ao anatin’ny fehikibonareo,

¹⁰na kitapom-batsy ho amin’izay haleha, na akanjo roa na kapa na tehina; fa ny mpiasa dia mendrika hahazo ny haniny.

¹¹Amin’izay tanàna na vohitra hidiranareo dia fantaro tsara izay mendrika ao ka mitoera ao mandra-pialanareo.

¹²Ary raha vao miditra ao an-trano ianareo dia miarahabà ny olona ao.

¹³Koa raha mendrika ny olona ao an-trano dia aoka ho ao aminy ny fiadanana tononinareo; fa raha tsy mendrika izy dia aoka hiverina aminareo ny fiadanana voatononareo.

¹⁴Ary izay tsy mampandroso anareo, na tsy mihaino ny teninareo, mialà amin’izany trano na tanàna izany, dia ahintsano ny vovoka amin’ny tongotrareo.

¹⁵Lazaiko aminareo marina tokoa fa ho moramora kokoa ny ho amin’ny tany Sodoma sy Gomora amin’ny andro fitsarana noho ny ho amin’izany tanàna izany.

¹⁶Indro Aho maniraka anareo ho tahaka ny ondry eo ampovoan’ny amboadia; koa hendre tahaka ny bibilava ary aoka ho tsotra tahaka ny voromailala.

¹⁷Ary mitandrema ianareo ny amin’ny olona; fa hatolony ho amin’ny Sinedriona sy hokapohiny ao amin’ny sinagogany ianareo;

¹⁸ary hoentiny eo anatrehan’ny mpanapaka sy ny mpanjaka ianareo noho ny Amiko, ho vavolombelona aminy sy amin’ny Jentilisa*.

¹⁹Fa rehefa manolotra anareo izy dia aza manahy ny amin’izay fomba hitenenanareo, na ny amin’izay zavatra holazainareo; fa homena anareo amin’izany ora izany izay holazainareo.

²⁰Fa tsy ianareo no miteny fa ny Fanahin’ny Rainareo no miteny ao anatinareo.

²¹Ary ny rahalahy dia hanolotra ny rahalahiny ho faty, ary ny ray dia hanolotra ny zanany; ary ny zanaka dia hitsangana hanohitra ny ray aman-dreniny ka hahafaty azy.

²²Ary ho halan’ny olona rehetra ianareo noho ny anarako; fa izay maharitra hatramin’ny farany no hovonjena.

²³Ary raha enjehina ao amin’ny tanàna iray ianareo dia mandosira ho any amin’ny tanàna hafa; fa lazaiko aminareo marina tokoa: Tsy hahatapitra ny tanànan’ny Israely akory ianareo mandra-pahatongan’ny Zanak’Olona*.

²⁴Ny mpianatra dia tsy mihoatra noho ny mpampianatra, na ny mpanompo noho ny tompony.

²⁵Fa ampy amin’ny mpianatra raha tonga tahaka ny mpampianatra azy izy, ary ny mpanompo raha tonga tahaka ny tompony. Raha ny tompon-trano no nolazainy hoe Belzeboba, tsy mainka va ny ankohonany?

²⁶Koa amin’izany aza matahotra azy ianareo; fa tsy misy afenina izay tsy haseho, na takona izay tsy ho fantatra.

²⁷Izay lazaiko aminareo ao amin’ny maizina dia ambarao eo amin’ny mazava ary izay ren’ny sofinareo dia torio eny an-tampon-trano*.

²⁸Ary aza matahotra izay mamono ny vatana, nefa tsy mahay mamono ny fanahy; fa aleo matahotra izay mahay mahavery ny fanahy sy ny vatana any amin’ny afobe*.

²⁹Tsy asariona* iray ihany va no vidin’ny tsintsina roa? Nefa tsy misy na dia iray akory aza amin’ireny ho latsaka amin’ny tany, raha tsy avelan’ny Rainareo.

³⁰Fa na dia ny volon-dohanareo aza dia voaisa avokoa.

³¹Koa aza matahotra; fa mihoatra noho ny tsintsina maro ianareo.

³²Ary amin’izany na zovy na zovy no hanaiky Ahy eo anatrehan’ny olona dia hekeko kosa izy eo anatrehan’ny Raiko izay any an-danitra.

³³Fa na zovy na zovy no handa Ahy eo anatrehan’ny olona dia holaviko kosa izy eo anatrehan’ny Raiko izay any an-danitra.

³⁴Ary aza ataonareo fa tonga hitondra fiadanana etỳ ambonin’ny tany Aho; tsy tonga hitondra fiadanana Aho fa sabatra.

³⁵Fa tonga Aho hampifandrafy olona amin’ny rainy, ny zanakavavy amin’ny reniny ary ny vinantovavy amin’ny rafozambaviny;

³⁶ary ny ankohonan’ny olona ihany no ho fahavalony (Mik 7.6).

³⁷Izay tia ray na reny mihoatra noho ny fitiavany Ahy dia tsy mendrika Ahy ary izay tia ny zanany lahy na ny zanany vavy mihoatra noho ny fitiavany Ahy dia tsy mendrika Ahy.

³⁸Izay tsy mitondra ny hazofijaliany ka tsy manaraka Ahy dia tsy mendrika Ahy.

³⁹Izay mamonjy ny ainy no hahavery azy ary izay mahafoy ny ainy noho ny Amiko dia hahavonjy azy.

⁴⁰Izay mandray anareo dia mandray Ahy; ary izay mandray Ahy dia mandray izay naniraka Ahy.

⁴¹Izay mandray mpaminany, satria mpaminany izy, dia handray ny valim-pitian’ny mpaminany; ary izay mandray olona marina, satria olona marina izy, dia handray ny valim-pitian’ny olona marina.

⁴²Ary na zovy na zovy no manome rano mangatsiaka na dia eran’ny kaopy ihany aza hosotroin’ny iray amin’ireo madinika ireo, satria mpianatra izy, dia lazaiko aminareo marina tokoa fa tsy ho very ny valim-pitiany.