Read La Bible en Malgache Matio 14 Bible Online

Matio 14 - La Bible en Malgache bible

Matio 14

¹Tamin’izany andro izany i Heroda mpanapaka dia nandre ny lazan’i Jesosy

²ka hoy izy tamin’ny mpanompony: I Jaona Mpanao batisa efa nitsangana tamin’ny maty izany, koa izay no ananany hery hanaovany izao asa lehibe izao.

³Satria tokoa i Heroda dia efa nisambotra an’i Jaona, dia namatotra azy tao an-tranomaizina, noho ny amin’i Herodiasy, vadin’i Filipo rahalahiny.

⁴I Jaona dia efa nilaza taminy hoe: Tsy azonao atao ny maka azy ho vadinao.

⁵Koa naniry hamono azy i Heroda, saingy natahotra ny vahoaka izy satria nataon’ireo ho mpaminany i Jaona.

⁶Fa nony tonga ny fitsingerenan’ny taona nahaterahan’i Heroda dia nandihy teo anatrehany ny zanakavavin’i Herodiasy ka nahafaly an’i Heroda izany.

⁷Noho izany, nianiana izy fa hanome azy izay hangatahiny na inona na inona.

⁸Ary rehefa nomen’ny reniny hevitra Razazavavy dia nilaza hoe: Omeo ahy eto ambony lovia ny lohan’i Jaona Mpanao batisa.

⁹Dia nalahelo ny mpanjaka, nefa noho ny fianianany sy ireo olona izay niara-nipetraka nihinana teo aminy dia nandidy ihany izy mba hanomezana azy izany.

¹⁰Koa nandefa iraka hanapaka ny lohan’i Jaona tao an-tranomaizina izy.

¹¹Dia noentina teo ambony lovia ny lohan’i Jaona ka nomena ilay zazavavy; ary izy kosa dia nitondra izany ho ao amin’ny reniny.

¹²Ary tonga ny mpianatr’i Jaona ka naka ny fatiny dia nandevina azy; avy eo dia lasa izy ireo nilaza izany tamin’i Jesosy.

¹³Ary nony nandre izany Jesosy dia niondrana an-tsambokely niala teo, handeha hitokana any an-tany efitra; nefa raha nandre izany ny vahoaka dia niainga avy teny amin’ny tanànany avy ka nandeha an-tongotra nanaraka Azy.

¹⁴Nony nidina avy tao an-tsambokely Jesosy dia nahita vahoaka betsaka, ary onena azy ireo Izy ka nanasitrana ireo marariny.

¹⁵Nony hariva ny andro dia nanatona Azy ny mpianatra ka niteny Taminy hoe: Atỳ an-tany efitra isika izao ary efa hariva ity ny andro; ampodio ny vahoaka mba hankanesany eny amin’ny vohitra hividy hanina.

¹⁶Fa hoy Jesosy taminy: Tsy tokony handeha ireo; fa omeonareo hanina.

¹⁷Fa hoy ny mpianany Taminy: Tsy misy afa-tsy mofo dimy sy hazandrano roa atỳ aminay.

¹⁸Ary hoy Izy: Ento etỳ amiko izany.

¹⁹Dia nasainy nipetraka teny ambonin’ny ahitra ny vahoaka, ary noraisiny ny mofo dimy sy ny hazandrano roa dia niandrandra ny lanitra Izy ka nisaotra; ary nony efa novakiny ny mofo dia natolony ny mpianatra ary ny mpianatra kosa dia nanolotra ho an’ny vahoaka.

²⁰Dia nihinana avokoa izy rehetra ka voky; ary nangoniny ny sombintsombiny sisa tsy lany dia nahafeno harona roa amby folo.

²¹Ary izay nihinana dia tokony ho dimy arivo lahy, afa-tsy ny zaza amam-behivavy.

²²Teo no eo ihany Jesosy dia nanery ny mpianatra hiondrana an-tsambokely mba hialoha Azy eny ampita mandra-pandravany ny vahoaka.

²³Rehefa avy nandrava ny vahoaka Izy dia niakatra tao an-tendrombohitra mba hitokana hivavaka; nony hariva ny andro dia nitoetra irery teo Izy.

²⁴Efa lasa stadio* maromaro lavitry ny morona ny sambokely tamin’izay ka natopatopan’ny alondrano satria notoherin’ny rivotra izy.

²⁵Ary tamin’ny fotoam-piambenana fahefatra amin’ny alina dia nandeha teny ambonin’ny ranomasina hankeny amin’ny mpianany Jesosy.

²⁶Nony nahita Azy nandeha teo ambonin’ny ranomasina ny mpianatra dia raiki-tahotra ka niteny hoe: Matoatoa io; dia niantsoantso izy ireo noho ny tahotra.

²⁷Nefa Jesosy niteny tamin’izy ireo niaraka tamin’izay hoe: Matokia fa Izaho ihany, aza matahotra.

²⁸Ary hoy i Petera Taminy: Tompoko, raha Ianao ary io dia asaivo manatona Anao eny ambonin’ny rano aho.

²⁹Ary hoy Izy: Manatòna. Dia nidina niala tamin’ny sambokely i Petera ka nandeha teo ambonin’ny rano hanatona an’i Jesosy.

³⁰Rehefa hitany fa nahery ny rivotra dia natahotra izy, ary raha nanomboka nilentika izy dia niantsoantso hoe: Tompo ô, vonjeo aho!

³¹Dia nanatsotra ny tanany niaraka tamin’izay Jesosy ka nandray azy sady niteny taminy hoe: Ry kely finoana, nahoana no nisalasala ianao?

³²Ary rehefa niakatra tao an-tsambokely izy ireo dia nitsahatra ny rivotra.

³³Ary izay tao an-tsambokely dia niankohoka teo anatrehany ka niteny hoe: Marina fa Zanak’Andriamanitra tokoa Ianao.

³⁴Rehefa niampita izy ireo dia tonga teo an-tanety, any Genesareta.

³⁵Nony nahafantatra Azy ny tompon-tany teo dia nandefa iraka tany amin’ny tany rehetra manodidina mba hitondra ny marary rehetra ho eo Aminy.

³⁶Ary nangataka Taminy ireo mba hahazo hikasika na dia ny morontongotr’akanjony ihany aza; koa na iza na iza no nikasika izany dia sitrana avokoa.