Read La Bible en Malgache Matio 15 Bible Online

Matio 15 - La Bible en Malgache bible

Matio 15

¹Ary nisy Fariseo* sy mpanoradalàna* avy tany Jerosalema nankeo amin’i Jesosy ka niteny hoe:

²Nahoana ny mpianatrao no mandika ny fampianarana voatolotry ny razana? Fa tsy mba manasa tanana izy ireo rehefa hihinan-kanina.

³Ary Izy namaly azy ireo hoe: Nahoana kosa ianareo no mandika ny didin’Andriamanitra noho ny fampianarana voatolotra anareo?

⁴Fa Andriamanitra efa niteny hoe: «Manajà ny rainao sy ny reninao» (Eks 20.12), ary koa: «Izay miteny ratsy ny rainy na ny reniny dia hovonoina ho faty tokoa» (Eks 21.17).

⁵Fa hoy kosa ianareo: Na zovy na zovy no milaza amin’ny rainy na amin’ny reniny hoe: Efa nateriko ho fanatitra ho an’Andriamanitra izay fanampiana rehetra tokony ho anao avy amiko, dia tsy mila manaja ny rainy na ny reniny intsony izy.

⁶Koa dia foananareo ny tenin’Andriamanitra noho ny fampianarana voatolotra anareo.

⁷Ry mpihatsaravelatsihy, marina ny naminanian’Isaia anareo hoe:

⁸«Ity firenena ity dia manaja Ahy amin’ny molony fa ny fony kosa lavitra Ahy.

⁹Koa zava-poana ny ivavahan’ireo Amiko, raha mampianatra didin’olombelona ho fampianarana izy» (Isa 29.13).

¹⁰Ary niantso ny vahoaka hankeo aminy Izy ka niteny taminy hoe: Mihainoa ka fantaro:

¹¹Tsy izay miditra amin’ny vava no mahaloto ny olona, fa izay mivoaka avy amin’ny vava, izany no mahaloto ny olona.

¹²Dia nankeo Aminy ny mpianatra ka niteny Taminy hoe: Fantatrao va fa tafintohina ny Fariseo raha nandre izany teny izany?

¹³Fa Izy namaly hoe: Ny zavatra rehetra izay tsy nambolen’ny Raiko izay any an-danitra dia hongotana.

¹⁴Avelao izy, fa jamba mitarika jamba; ary raha ny jamba no mitarika jamba dia samy ho latsaka any an-kady izy roa.

¹⁵Fa hoy i Petera Taminy: Lazao aminay ny hevitr’izany fanoharana izany.

¹⁶Dia hoy Jesosy: Ianareo koa va mbola tsy mahafantatra ihany?

¹⁷Tsy fantatrareo va fa izay rehetra miditra amin’ny vava dia mankao an-kibo ka avoaka any amin’ny toeram-pivoahana?

¹⁸Fa izay mivoaka avy amin’ny vava kosa dia avy amin’ny fo ka izany no mahaloto ny olona.

¹⁹Fa avy amin’ny fo no ivoahan’ny sain-dratsy, dia ny vonoan’olona, ny fakàna vadin’olona, ny fijangajangana, ny halatra, ny fiampangana lainga, ny fitenenan-dratsy;

²⁰izany no mahaloto ny olona; fa ny mihinana amin’ny tanana tsy voasasa dia tsy mba mahaloto ny olona.

²¹Dia niala teo Jesosy ka nankany amin’ny faritanin’i Tiro sy Sidona.

²²Ary indro, nisy vehivavy kananita iray avy tamin’izany faritra izany niantsoantso hoe: Mamindrà fo amiko, Tompoko, Zanak’i Davida ô! Ny zanako vavy dia ampahorin’ny demonia* loatra.

²³Kanefa Izy tsy namaly azy akory na dia teny indraimbava aza. Dia nanatona ny mpianany ka nangataka Taminy hoe: Roahy izy fa miantsoantso mafy ato aorianantsika.

²⁴Fa Izy namaly hoe: Tsy nirahina Aho afa-tsy ho amin’ny ondry very amin’ny taranak’Israely.

²⁵Nanatona ihany anefa Ravehivavy sady niankohoka teo anatrehany no niteny Taminy hoe: Tompoko ô, vonjeo aho.

²⁶Ary Izy namaly hoe: Tsy mety raha maka ny mofon-jaza ka manipy azy ho an’ny amboa kely.

²⁷Fa hoy Ravehivavy: Marina izany, Tompoko; fa na dia ny amboa kely aza mba mihinana izay sombintsombiny latsaka avy amin’ny latabatry ny tompony ihany.

²⁸Dia namaly azy Jesosy hoe: Ravehivavy, lehibe ny finoanao; tongava aminao araka izay irinao. Dia sitrana ny zanany vavy tamin’izay ora izay.

²⁹Raha niala teo Jesosy dia nankany amoron’ny ranomasin’i Galilia; niakatra nankeo an-tendrombohitra Izy ka nipetraka teo;

³⁰ary nisy vahoaka betsaka nankeo Aminy nitondra ny mandringa, ny jamba, ny kilemaina, ny moana sy ny maro hafa koa, ka nametraka azy teo akaikin’ny tongotr’i Jesosy; dia nahasitrana azy ireny Izy;

³¹talanjona ny vahoaka, raha nahita ny moana miteny, ny kilemaina sitrana, ny mandringa afaka mandeha ary ny jamba mahiratra; dia nankalaza an’Andriamanitry ny Israely izy rehetra.

³²Ary Jesosy niantso ny mpianany hankeo Aminy ka niteny hoe: Mahonena Ahy ny vahoaka, fa efa nitoetra hateloana tatỳ Amiko izy izao nefa tsy manan-kohanina ihany; tsy tiako ny hampody azy ireo tsy mihinana, fandrao reraka eny an-dalana izy.

³³Fa hoy ny mpianatra Taminy: Aiza no hahitanay mofo ampy hahavoky izao vahoaka betsaka izao atỳ an-tany efitra?

³⁴Ary hoy Jesosy taminy: Misy mofo firy ary any aminareo? Dia hoy ireo: Fito sy hazandrano madinika vitsy.

³⁵Dia nandidy ny vahoaka hipetraka amin’ny tany Izy.

³⁶Ary nandray ny mofo fito mbamin’ny hazandrano Izy, koa rehefa nisaotra dia namaky izany ka nanolotra azy ho an’ny mpianatra ary ny mpianatra kosa dia nanolotra izany ho an’ny vahoaka.

³⁷Nihinana avokoa izy rehetra ka voky; rehefa nangoniny ny sombintsombiny sisa tsy lany dia nahafeno fito sobika.

³⁸Ary izay nihinana dia efatra arivo lahy, afa-tsy ny zaza amam-behivavy.

³⁹Ary nony efa nampody ny vahoaka Izy dia niondrana an-tsambokely ka nankany amin’ny sisintanin’i Magadana.