Read La Bible en Malgache Matio 16 Bible Online

Matio 16 - La Bible en Malgache bible

Matio 16

¹Nankeo Aminy indray ny Fariseo* sy ny Sadoseo dia naka fanahy Azy ka nangataka Azy haneho famantarana aminy avy any an-danitra.

²Ary Izy namaly azy ireo hoe: Rehefa hariva ny andro dia hoy ianareo: Ho tsara ny andro fa mena ny lanitra.

³Ary amin’ny maraina dia hoy ianareo: Ho ratsy ny andro fa mena sy manjombona ny lanitra. Hainareo ny mamantatra ny endriky ny lanitra, fa ny famantarana ny fotoana dia tsy hainareo.

⁴Izay taranaka ratsy fanahy sy mijangajanga dia fatra-pitady famantarana; nefa tsy misy famantarana homena azy, afa-tsy ny famantarana ny amin’i Jona ihany. Dia nandao azy Jesosy ka lasa.

⁵Rehefa tonga teny ampita ny mpianatra dia nanadino nitondra mofo.

⁶Dia hoy Jesosy taminy: Mandiniha ianareo ka mitandrema mba tsy ho azon’ny masirasiran’ny Fariseo* sy ny Sadoseo*.

⁷Dia nifampiresaka izy ireo hoe: Ny tsy nitondrantsika mofo angamba izany.

⁸Ary Jesosy nahalala ny resany ka niteny tamin’ireo hoe: Nahoana no mifampiresaka ny amin’ny tsy fanananareo mofo ianareo, ry kely finoana?

⁹Tsy mbola azonareo ary tsy tsaroanareo va ny mofo dimy ho an’ny olona dimy arivo, firy harona moa no nangoninareo?

¹⁰Na ny mofo fito ho an’ny olona efatra arivo, firy sobika moa no nangoninareo?

¹¹Ahoana no tsy ahafantaranareo fa tsy ny amin’ny mofo no nolazaiko taminareo? Fa hoe tandremo mba tsy ho azon’ny masirasiran’ny Fariseo sy ny Sadoseo.

¹²Teo vao fantany fa tsy nasainy hitandrina ny amin’ny masirasira fanaovana mofo izy ireo fa ny amin’ny fampianaran’ny Fariseo sy ny Sadoseo.

¹³Rehefa tonga tany amin’ny faritanin’i Kaisarian’i Filipo Jesosy dia nanontany ny mpianany Izy hoe: Lazain’ny olona ho iza moa ny Zanak’Olona*?

¹⁴Ary hoy ireo: Ny sasany dia milaza hoe: Jaona Mpanao batisa; ary ny sasany dia milaza hoe: Elia; ary hoy ny sasany: Jeremia, na iray amin’ireo mpaminany.

¹⁵Ary hoy Jesosy taminy: Fa ianareo kosa mba milaza Ahy ho iza?

¹⁶Namaly i Simona Petera hoe: Ianao no Kristy*, Zanak’Andriamanitra velona.

¹⁷Dia hoy indray Jesosy taminy: Sambatra ianao, ry Simona, zanak’i Jona; fa tsy nofo aman-dra no naneho anao izany fa ny Raiko izay any an-danitra.

¹⁸Ary Izaho koa milaza aminao fa ianao no Petera[16], ary eo ambonin’ity vatolampy ity no haoriko ny fiangonako[17]; ary ny vavahadin’ny fitoeran’ny maty* dia tsy haharesy azy.

¹⁹Homeko anao ny fanalahidin’ny fanjakan’ny lanitra; koa na inona na inona fehezinao etỳ ambonin’ny tany dia hofehezina any an-danitra ary na inona na inona vahànao etỳ ambonin’ny tany dia hovahana any an-danitra.

²⁰Tamin’izany dia nandrara ny mpianatra Izy mba tsy hilaza amin’olona akory fa Izy no Kristy.

²¹Hatramin’izay andro izay no nanombohan’i Jesosy naneho tamin’ny mpianany fa tsy maintsy hankany Jerosalema Izy ka hampijaly Azy mafy ny loholona sy ny lehiben’ny mpisorona ary ny mpanoradalàna*, dia hovonoina Izy ary hatsangana amin’ny andro fahatelo.

²²Ary nitondra Azy nihataka kely i Petera ka niteny Azy mafy hoe: Sanatria Aminao izany, Tompoko! Tsy ho Aminao mihitsy izany.

²³Fa Izy nihodina ka niteny tamin’i Petera hoe: Mankanesa ato ivohoko, ry Satana; fandrika ho Ahy ianao, satria tsy misaina izay an’Andriamanitra ianao, fa izay an’ny olona.

²⁴Dia hoy Jesosy tamin’ny mpianany: Raha misy olona ta hanaraka Ahy dia aoka izy handa ny tenany sy hitondra ny hazofijaliany ka hanaraka Ahy.

²⁵Fa na iza na iza no ta hamonjy ny ainy dia hahavery azy; ary na iza na iza no hahavery ny ainy noho ny Amiko dia hahazo izany.

²⁶Fa inona moa no soa ho azon’ny olona, raha mahazo izao tontolo izao izy, kanefa very ny ainy? Ary inona moa no homen’ny olona ho takalon’ny ainy?

²⁷Fa ho avy ny Zanak’Olona* amin’ny voninahitry ny Rainy, miaraka amin’ny anjeliny, dia hamaly ny olona rehetra araka ny asany.

²⁸Lazaiko aminareo marina tokoa: Misy ny sasany eto izay tsy mba hanandrana fahafatesana mandra-pahitany ny Zanak’Olona avy amin’ny fanjakany.