Read La Bible en Malgache Matio 17 Bible Online

Matio 17 - La Bible en Malgache bible

Matio 17

¹Nony afaka henemana, Jesosy, dia naka an’i Petera sy i Jakoba ary i Jaona rahalahiny ka nitondra azy ireo niakatra ho any an-tendrombohitra avo mba hitokana.

²Dia niova tarehy teo anatrehan’izy ireo Izy, koa ny tarehiny dia namirapiratra tahaka ny masoandro, ary tonga fotsy tahaka ny mazava ny fitafiany.

³Ary indreo, niseho tamin’ny mpianatra i Mosesy sy i Elia, niresaka tamin’i Jesosy.

⁴Dia niteny tamin’i Jesosy i Petera hoe: Tompoko, tsara raha mitoetra eto isika; koa raha sitrakao dia hanao tranolay telo eto aho: Ny iray dia ho Anao, ny iray dia ho an’i Mosesy ary ny iray dia ho an’i Elia.

⁵Raha mbola niteny izy dia indro, nisy rahona mazava nanarona azy ireo; ary injao, nisy feo avy tao amin’ny rahona niteny hoe: Ity no Zanako malalako izay sitrako; Izy no henoy.

⁶Ary nony nandre izany ny mpianatra dia lavo niankohoka sady natahotra indrindra.

⁷Ary Jesosy nankeo aminy dia nikasika azy ireo sady niteny hoe: Mitsangàna fa aza matahotra.

⁸Nefa nony niandrandra izy ireo dia tsy nahita na iza na iza, afa-tsy Jesosy irery.

⁹Rehefa nidina avy teny an-tendrombohitra izy ireo dia nandrara azy ireo Jesosy hoe: Aza milazalaza amin’olona iny fahitana iny, mandra-pitsangan’ny Zanak’Olona* amin’ny maty.

¹⁰Ary nanontany Azy ny mpianany hoe: Nahoana ary no ilazan’ny mpanoradalàna* fa tsy maintsy ho avy aloha i Elia?

¹¹Ary Jesosy namaly hoe: I Elia dia ho tonga ihany ka hamerina amin’ny laoniny ny zavatra rehetra.

¹²Nefa lazaiko aminareo: Efa tonga sahady i Elia; nefa ny olona tsy nahafantatra azy fa nanao izay sitraky ny fony taminy. Dia tahaka izany koa no hampijaliany ny Zanak’Olona*.

¹³Dia fantatry ny mpianatra fa ny amin’i Jaona Mpanao batisa no nolazainy taminy.

¹⁴Rehefa tonga teo amin’ny vahoaka izy ireo dia nisy lehilahy iray nanatona an’i Jesosy, ary nandohalika teo anatrehany

¹⁵sady niteny hoe: Tompoko, mamindrà fo amin’ny zanako lahy fa mararin’ny androbe izy ka mijaly tokoa; matetika izy no mianjera ao anaty afo ary matetika ao anaty rano.

¹⁶Ary nitondra azy tamin’ny mpianatrao aho nefa tsy nahay nanasitrana azy izy.

¹⁷Ary hoy Jesosy: Ry taranaka tsy mino sady diso lalana, mandra-pahoviana no hiarahako aminareo? Mandra-pahoviana no handeferako aminareo? Ento atỳ Amiko izy.

¹⁸Ary niteny mafy azy Jesosy dia niala taminy ny demonia* ka sitrana tamin’izay ora izay ilay zazalahy.

¹⁹Dia nankao amin’i Jesosy mangingina ny mpianatra ka niteny hoe: Nahoana izahay no tsy afaka nandroaka an’iny?

²⁰Ary hoy Jesosy taminy: Noho ny fahakelezan’ny finoanareo ihany; fa lazaiko aminareo marina tokoa: Raha manana finoana toy ny voantsinapy iray ianareo ka hiteny amin’io tendrombohitra io hoe: Mifindrà erỳ dia hifindra izy; ary tsy hisy zavatra tsy ho hainareo hatao.

²¹Kanefa iny karazana iny dia tsy miala raha tsy avoaka amin’ny fivavahana sy ny fifadian-kanina.

²²Rehefa tafaverina tany Galilia izy ireo dia hoy Jesosy tamin’ny mpianany: Ny Zanak’Olona* efa hatolotra ho eo an-tanan’ny olona

²³ka hovonoiny, nefa amin’ny andro fahatelo dia hatsangana indray Izy. Ary nalahelo indrindra ireo.

²⁴Nony tonga tao Kapernaomy izy ireo dia nankeo amin’i Petera ny mpandray ny antsasaky ny sekela na didrakma ka niteny hoe: Moa va ny mpampianatra anareo tsy mba mandoa ny antsasaky ny sekela na didrakma?

²⁵Dia hoy i Petera: Mandoa Izy. Ary raha vao tafiditra tao an-trano i Petera dia nialohavan’i Jesosy teny izy ka nilazany hoe: Ahoana no hevitrao, ry Simona? Avy amin’iza moa no andraisan’ny mpanjaka etỳ an-tany haban-tseranana sy vola hetra? Avy amin’ny zanany va sa avy amin’ny olon-kafa?

²⁶Ary hoy i Petera taminy: Avy amin’ny olon-kafa, dia hoy kosa Jesosy: Raha izany dia afaka ny zanaka.

²⁷Kanefa mba tsy hahatonga antsika hanafintohina azy ireo dia mandehana any amin’ny ranomasina ianao ka manjonoa; ary raiso izay hazandrano azo voalohany, koa rehefa sokafanao ny vavany dia hahita vola statera* ao ianao; dia raiso izany ka omeo azy ireo ho avy Amiko sy avy aminao.