Read La Bible en Malgache Matio 19 Bible Online

Matio 19 - La Bible en Malgache bible

Matio 19

¹Ary rehefa vitan’i Jesosy ireo teny ireo dia niala tany Galilia Izy ka nihazo ny lalana teny andafin’i Jordana, dia tonga tany amin’ny faritanin’i Jodia*.

²Ary nisy vahoaka betsaka nanaraka Azy dia nanasitrana azy tany Izy.

³Dia nisy Fariseo* nanatona sady naka fanahy Azy hoe: Mahazo misaotra ny vadiny va ny lehilahy na inona na inona antony?

⁴Fa Izy namaly hoe: Tsy mbola novakinareo va, fa izay nahary azy tamin’ny voalohany dia nahary azy ho lahy sy vavy (Gen 1.27),

⁵hoy koa Izy: Ary noho izany ny lehilahy dia handao ny rainy sy ny reniny ka hikambana amin’ny vadiny; dia ho nofo iray ihany izy roa (Gen 2.24),

⁶koa tsy roa intsony izy fa nofo iray ihany. Koa amin’izany, izay nampiraisin’Andriamanitra dia aoka tsy hosarahin’olona.

⁷Hoy ireo Taminy: Nahoana ary i Mosesy no nandidy hanome taratasy fisaoram-bady sy hisaotra azy (Deo 24.1)?

⁸Ary hoy Jesosy taminy: Noho ny hamafin’ny fonareo no namelan’i Mosesy anareo hisao-bady; fa tamin’ny voalohany dia tsy mba toy izany.

⁹Fa lazaiko aminareo: Na zovy na zovy no misaotra ny vadiny, afa-tsy noho ny fijangajangana ihany, ka mampakatra hafa, dia mijangajanga; ary izay mampakatra ny voasaotra dia mijangajanga koa.

¹⁰Dia hoy ny mpianany Taminy: Raha izany no toerana misy ny lehilahy manoloana ny vadiny dia aleo tsy manambady.

¹¹Fa hoy Izy taminy: Tsy ny olona rehetra no mahay mandray izany teny izany fa izay nomena ihany;

¹²fa misy ionòka* efa hatrany an-kibon’ny reniny; ary misy ionòka, noho ny nataon’ny olona; ary misy ionòka noho ny fanjakan’ny lanitra. Aoka handray izany izay mahay mandray.

¹³Tamin’izany, nisy zazakely noentina teo amin’i Jesosy mba hametrahany tanana sy hoentiny am-bavaka; saingy ny mpianany dia niteny mafy ireny.

¹⁴Nefa hoy Jesosy: Avelao ny zaza ary aza rarana tsy hanatona Ahy; fa an’ny toa azy ny fanjakan’ny lanitra.

¹⁵Rehefa avy nametraka ny tanany taminy Izy dia niala teo.

¹⁶Indro, nisy lehilahy iray nanatona Azy niteny hoe: Mpampianatra ô, inona no tsara hataoko mba hahazoako fiainana mandrakizay?

¹⁷Fa hoy Jesosy taminy: Nahoana Aho no anontanianao ny amin’izay tsara? Iray no tsara; fa raha te hiditra any amin’ny fiainana ianao, tandremo ny didy.

¹⁸Hoy Ralehilahy taminy: Inona avy moa izany? Dia hoy Jesosy: Ny hoe: «Aza mamono olona, aza mijangajanga, aza mangalatra, aza mety ho vavolombelona mandainga,

¹⁹manajà ny rainao sy ny reninao (Eks 20.12-16), ary tiava ny namanao tahaka ny tenanao» (Lev 19.18).

²⁰Hoy ilay zatovo Taminy: Izany rehetra izany dia efa voatandriko avokoa; fa inona no mbola tsy ampy amiko?

²¹Dia hoy Jesosy taminy: Raha te ho tanteraka ianao dia mandehana, amidio ny fanananao ka omeo ny mahantra, dia hanana rakitra any an-danitra ianao; ary avia hanaraka Ahy.

²²Fa nony nandre izany teny izany ilay zatovo dia niala tamin’alahelo satria nanankarena be izy.

²³Dia hoy Jesosy tamin’ny mpianany: Lazaiko aminareo marina tokoa fa sarotra ny hidiran’ny mpanankarena amin’ny fanjakan’ny lanitra.

²⁴Lazaiko aminareo indray: Moramora kokoa ny hidiran’ny rameva amin’ny vodifanjaitra noho ny hidiran’ny mpanankarena ao amin’ny fanjakan’Andriamanitra.

²⁵Ary nony nandre izany ny mpianatra dia talanjona indrindra ka niresaka hoe: Iza indray ary no azo vonjena?

²⁶Fa Jesosy nibanjina azy ka niteny tamin’ireo hoe: Tsy hain’ny olona izany, kanefa ny zavatra rehetra dia hain’Andriamanitra.

²⁷Dia hoy i Petera Taminy: Indro, efa nahafoy ny zavatra rehetra izahay ka nanaraka Anao; koa ahoana ny ho aminay?

²⁸Hoy Jesosy taminy: Lazaiko aminareo marina tokoa fa rehefa tonga amin’ny fahateraham-baovao ka hipetraka amin’ny sezafiandrianan’ny voninahiny ny Zanak’Olona*, ianareo koa, izay nanaraka Ahy, dia hipetraka amin’ny sezafiandrianana roa amby folo ka hitsara ny fokon’Israely roa amby folo.

²⁹Ary izay rehetra efa nahafoy trano, na rahalahy, na anabavy, na ray, na reny, na zanaka, na tany, noho ny anarako, dia handray avo zato heny ka handova fiainana mandrakizay.

³⁰Nefa maro izay voalohany no ho farany ary izay farany no ho voalohany.