Read La Bible en Malgache Matio 2 Bible Online

Matio 2 - La Bible en Malgache bible

Matio 2

¹Rehefa teraka tao Betlehema any Jodia* Jesosy, tamin’ny andron’i Heroda mpanjaka, dia indreo, nisy Magy avy tany atsinanana tonga tany Jerosalema ka niteny hoe:

²Aiza Ilay teraka ho Mpanjakan’ny Jiosy*? Fa nahita ny kintany teny atsinanana izahay ka tonga mba hiankohoka eo anatrehany.

³Ary nony nandre izany i Heroda mpanjaka dia nangorohoro izy mbamin’i Jerosalema manontolo.

⁴Dia namory ny lehiben’ny mpisorona rehetra sy ny mpanoradalàna* tamin’ny vahoaka izy ka nanontany azy ireo hoe: Aiza moa no hahaterahan’i Kristy*?

⁵Dia hoy ireo taminy: Ao Betlehema any Jodia; fa izao no voasoratry ny mpaminany:

⁶«Ary ianao, ry Betlehema, tanin’i Joda, tsy dia kely indrindra amin’ireo tanàna ao Joda ianao tsy akory; fa avy ao aminao no hiavian’Izay iray ho Mpanapaka, ka Izy no ho Mpiandry ny Israely oloko» (Mik 5.1).

⁷Dia nampiantso ireo Magy mangingina i Heroda ka namotopototra fatratra azy ireo ny amin’izay fotoana nisehoan’ilay kintana.

⁸Dia naniraka azy ireo hankany Betlehema izy ka niteny hoe: Andeha, hadihadio tsara ny amin’Ilay Zazakely; koa rehefa hitanareo Izy dia ambarao amiko mba hankanesako any koa hiankohoka eo anatrehany.

⁹Rehefa nandre ny tenin’ny mpanjaka izy ireo dia lasa; ary indro ilay kintana hitany teny atsinanana, nialoha azy mandra-pijanony teo ambonin’izay nitoeran’ny Zazakely.

¹⁰Koa nony nahita ilay kintana izy ireo dia dibo-kafaliana.

¹¹Ary rehefa tafiditra tao an-trano tokoa izy ireo dia nahita ny Zazakely sy i Maria reniny ka niankohoka teo anatrehany; ary nony efa nosokafany ireo fitahirizan-drakiny dia nanolotra fanomezana ho Azy izy ireo, dia volamena sy zavamanitra ary miora.

¹²Nefa rehefa notoroan’Andriamanitra hevitra tamin’ny nofy izy ireo tsy hiverina any amin’i Heroda dia lalana hafa no nandehanany nody ho any amin’ny fonenany.

¹³Nony efa lasa nandeha ireo dia indro, nisy anjelin’ny Tompo niseho tamin’i Josefa tamin’ny nofy ka niteny hoe: Mifohaza ianao, ento ny Zazakely sy ny reniny, dia mandosira any Ejipta, koa mitoera any ambara-piteniko aminao; satria i Heroda dia mitady ny Zazakely hovonoiny.

¹⁴Dia nifoha izy ka nitondra ny Zazakely sy ny reniny, raha mbola alina, dia lasa nankany Ejipta;

¹⁵ary nitoetra tany izy ambara-pahafatin’i Heroda, mba hahatanteraka izay nampilazain’NY TOMPO ny mpaminany[3] hoe: «Nantsoiko avy tany Ejipta ny zanako» (Hos 11.1).

¹⁶Nony fantatr’i Heroda fa voafitaky ny Magy izy dia tezitra mafy izy ka nandefa iraka hamono ny zazalahy rehetra hatramin’ny roa taona no ho midina, izay tao Betlehema sy tamin’ny manodidina rehetra, araka ny fotoana izay nofotorany fatratra tamin’ny Magy.

¹⁷Dia tanteraka izay nampilazaina an’i Jeremia mpaminany[4] hoe:

¹⁸«Nisy feo re tao Rama, dia fidradradradrana sy fitomaniana fatratra; nitomany ny zanany Rahely, ary tsy azo nampiononina izy satria lany ritra ireny.» (Jer 31.15)

¹⁹Rehefa maty i Heroda dia indro, nisy anjelin’ny Tompo niseho tamin’i Josefa tany Ejipta tamin’ny nofy ka niteny hoe:

²⁰Mifohaza ianao, ento ny Zazakely sy ny reniny, dia mankanesa any amin’ny tanin’ny Israely fa efa maty ireo izay nitady ny ain’ny Zazakely.

²¹Dia nifoha izy ka nitondra ny Zazakely sy ny reniny, dia tonga tany amin’ny tanin’ny Israely.

²²Rehefa reny fa i Arkelaosy no nanjaka tany Jodia nandimby an’i Heroda rainy, dia natahotra hankany izy; koa rehefa notoroan’Andriamanitra hevitra tamin’ny nofy izy dia lasa nankany amin’ny faritanin’i Galilia.

²³Nony tonga tany izy ireo, dia nonina tao amin’ny tanàna atao hoe Nazareta mba hahatanteraka izay nampilazaina ny mpaminany[5] hoe: Hatao hoe Nazareana Izy.