Read La Bible en Malgache Matio 20 Bible Online

Matio 20 - La Bible en Malgache bible

Matio 20

¹Fa ny fanjakan’ny lanitra dia tahaka ny lehilahy tompon-trano iray, niainga vao maraina mba hanakarama mpiasa ho any an-tanim-boalobony.

²Ary rehefa nifanekeny tamin’ny mpiasa fa ho denaria* iray isanandro ny karamany dia nasainy nankany amin’ny tanim-boalobony ireny.

³Niainga indray izy tamin’ny ora fahatelo dia nahita ny sasany nipetra-potsiny teny an-tsena

⁴ka hoy izy taminy: Mandehana koa ianareo mankany amin’ny tanim-boaloboka fa izay tokony ho izy no homeko anareo. Dia lasa ireny.

⁵Ary niainga indray izy tamin’ny ora fahenina sy fahasivy ka niteny toy izany koa.

⁶Rehefa tokony ho tamin’ny ora fahiraika amby folo dia niainga indray izy ka nahita ny sasany nipetra-potsiny dia hoy izy taminy: Nahoana ianareo no mipetra-potsiny eto mandritra ny andro?

⁷Hoy ireo taminy: Satria tsy nisy olona nanakarama anay. Dia hoy Ralehilahy taminy: Mandehana koa ianareo mankany amin’ny tanim-boaloboka.

⁸Rehefa hariva ny andro dia hoy ny tompon’ny tanim-boaloboka tamin’ny mpitandrina ny raharahany: Antsoy ny mpiasa ka aloavy ny karamany: Atombohy amin’ireo farany mankany amin’ny voalohany.

⁹Ary rehefa tonga ireo nokaramaina tamin’ny ora fahiraika amby folo dia samy denaria iray avy no azon’ny tsirairay.

¹⁰Fa rehefa tonga ireo voalohany dia nanantena hahazo mihoatra izy; kanjo samy denaria iray avy ihany no azony.

¹¹Koa rehefa nahazo izany izy ireo dia nimonomonona tamin’ny tompon-trano ka niteny hoe:

¹²Ireo olona farany ireo dia niasa ora iray monja, kanefa nataonao mitovy aminay izay niaritra ny fahatrotrahana sy ny hafanana.

¹³Fa hoy izy tamin’ny iray: Ry sakaiza, tsy mba manao izay tsy rariny aminao aho; tsy denaria iray va no nifanekenao tamiko?

¹⁴Raiso ny anao ka mandehana; fa ilay farany dia tiako homena tahaka ny anao koa.

¹⁵Tsy mahazo manao izay tiako hatao amin’ny ahy va aho? Ratsy va ny masonao satria tsara aho?

¹⁶Dia toy izany, ny farany dia ho voalohany ary ny voalohany dia ho farany.

¹⁷Ary Jesosy rehefa niakatra ho any Jerosalema dia nitondra ny mpianatra roa amby folo lahy nihataka kely ka niteny taminy teny an-dalana hoe:

¹⁸Indro, miakatra ho any Jerosalema isika; ary ny Zanak’Olona* hatolotra ho amin’ireo lehiben’ny mpisorona sy ny mpanoradalàna*, dia hohelohiny ho faty

¹⁹ka hatolony amin’ny Jentilisa* mba hataony ho fihomehezana sy hokapohiny ary hohomboany amin’ny hazofijaliana; nefa amin’ny andro fahatelo dia hatsangana.

²⁰Tamin’izany, nanatona an’i Jesosy ny renin’ny zanak’i Zebedio mbamin’ireo zanany lahy, dia niankohoka ka nangataka zavatra Taminy.

²¹Hoy Izy taminy: Inona no irinao? Dia hoy Ravehivavy Taminy: Manomeza teny mba hipetrahan’ireto zanako roa lahy ireto ao amin’ny fanjakanao; koa ny iray dia ho eo amin’ny ankavananao ary ny iray dia ho eo amin’ny ankavianao.

²²Fa Jesosy namaly azy hoe: Tsy fantatrareo izay angatahinareo; hainareo va ny hisotro amin’ny kapoaka izay efa hisotroako? Hoy ireo Taminy: Hainay ihany.

²³Hoy Izy taminy: Hisotro amin’ny kapoakako tokoa ianareo; fa ny hipetraka eo ankavanako sy eo ankaviako dia tsy anjarako ny hanome izany; fa homena ho an’izay nanomanan’ny Raiko azy izany.

²⁴Ary nony nandre izany izy folo lahy dia tezitra noho ny nataon’izy mirahalahy.

²⁵Nefa Jesosy niantso azy ireo hankeo Aminy ka niteny hoe: Fantatrareo fa ny mpitondra eo amin’ny Jentilisa* dia mampanompo azy mafy ary ny lehibeny dia manapaka azy fatratra.

²⁶Fa tsy mba ho toy izany aminareo; fa izay te ho lehibe aminareo dia ho mpanompo anareo;

²⁷ary izay te ho voalohany aminareo dia ho mpanomponareo.

²⁸Fa tahaka izany, ny Zanak’Olona*, tsy tonga mba hotompoina fa mba hanompo ka hanolotra ny ainy ho avotra hisolo ny maro.

²⁹Rehefa niala tao Jeriko izy ireo dia nisy vahoaka betsaka nanaraka Azy.

³⁰Ary indreo, nisy jamba roa lahy nipetraka teo amoron-dalana, ary nony reny fa Jesosy no mandalo dia niantsoantso mafy izy ireo hoe: Mamindrà fo aminay, ry Tompo, Zanak’i Davida ô!

³¹Ary nandrara azy ireo ny vahoaka mba hangina; nefa vao mainka niantsoantso izy hoe: Mamindrà fo aminay, ry Tompo, Zanak’i Davida ô!

³²Ary Jesosy nijanona dia niantso azy ireo ka niteny taminy hoe: Inona no tianareo hataoko aminareo?

³³Hoy ireo Taminy: Tompoko ô, ny mba hampahiratana ny masonay.

³⁴Onena azy ireo Jesosy ka nikasika ny masony; ary nahiratra niaraka tamin’izay izy ireo dia nanaraka an’i Jesosy.