Read La Bible en Malgache Matio 21 Bible Online

Matio 21 - La Bible en Malgache bible

Matio 21

¹Rehefa nanakaiky an’i Jerosalema izy ireo ka tonga tao Betifaga any amin’ny tendrombohitra Oliva dia naniraka mpianatra roa lahy Jesosy ka niteny taminy hoe:

²Mankanesa amin’iroa vohitra tandrifinareo iroa, fa avy hatrany dia hahita boriky mifatotra sy ny zanany miaraka aminy ianareo; vahao izy dia ento etỳ Amiko.

³Ary raha misy miteny anareo dia lazao hoe: Misy ilàn’ny Tompo azy; ary havelany hoentinareo avy hatrany izy.

⁴Izany dia tonga mba hahatanteraka izay nampilazaina ny mpaminany[20] hoe:

⁵«Lazao amin’i Ziona* zanakavavy; indro ny Mpanjakanao avy ho anao, malemy fanahy sady mitaingina boriky, dia zanaky ny boriky miasa[21].»

⁶Ary nandeha ny mpianatra ka nanatanteraka izay toromarika nomen’i Jesosy azy,

⁷koa noentiny ny boriky sy ny zanany ary nataony teo amboniny ny lambany, dia nitaingina azy Jesosy.

⁸Ary ny ankabeazan’ny vahoaka dia namelatra ny lambany teny an-dalana; ny sasany dia nanapaka rantsan-kazo ary nampihahaka izany teny an-dalana.

⁹Ary ny vahoaka izay nialoha Azy sy izay nanaraka dia niantsoantso hoe: «Hosana* ho an’ny Zanak’i Davida! Isaorana anie izay avy amin’ny anaran’NY TOMPO! Hosana any amin’ny avo indrindra» (Sal 118.26).

¹⁰Nony efa tafiditra tao Jerosalema Izy dia nihotakotaka ny tanàna manontolo ka niteny hoe: Iza moa izao?

¹¹Ary nilaza ny vahoaka hoe: Izao no Jesosy mpaminany izay avy any Nazareta any Galilia.

¹²Ary Jesosy niditra tao amin’ny tempoly dia nandroaka izay rehetra nivarotra sy nividy tao amin’ny tempoly ka nanjera ny latabatry ny mpanakalo vola sy ny sezan’ny mpivarotra voromailala;

¹³dia hoy Izy tamin’izy ireo: Voasoratra hoe: «Ny tranoko dia hatao hoe trano fivavahana (Isa 56.7); fa ianareo kosa dia manao azy ho zohy fieren’ny jiolahy» (Jer 7.11).

¹⁴Ary nisy jamba sy mandringa nanatona Azy tao amin’ny tempoly dia nositraniny.

¹⁵Fa nony hitan’ny lehiben’ny mpisorona sy ny mpanoradalàna* ny zava-mahagaga izay nataony sy ny ankizy madinika miantsoantso ao amin’ny tempoly hoe: Hosana* ho an’ny Zanak’i Davida! Dia tezitra ry zareo

¹⁶ka niteny Taminy hoe: Renao va izay lazain’ireo? Dia hoy Jesosy: Eny; mbola tsy novakinareo mihitsy va fa: «Avy amin’ny vavan’ny ankizy madinika sy ny zaza minono no nanamboaranao fiderana» (Sal 8.2)?

¹⁷Dia nandao azy ireo Izy ka niala tao an-tanàna hankany Betania ary nitoetra tany nandritra ny alina.

¹⁸Rehefa niverina ho any an-tanàna Izy, nony maraina, dia nahatsiaro noana.

¹⁹Nahita hazo aviavy iray teo amoron-dalana anefa Izy dia nanatona, kanjo tsy nahita na inona na inona teo aminy, afa-tsy ravina ihany; dia hoy Izy taminy: Aza misy voa avy aminao intsony mandrakizay. Dia maina niaraka tamin’izay ilay hazo aviavy.

²⁰Ary nony hitan’ny mpianatra izany dia gaga izy ireo ka niteny hoe: Ahoana re no dia nahamaina tampoka io aviavy io?

²¹Ary Jesosy namaly azy ireo hoe: Lazaiko aminareo marina tokoa: Raha manam-pinoana ianareo ka tsy misalasala dia tsy izao natao tamin’ny aviavy izao ihany no ho vitanareo, fa raha hiteny amin’ity tendrombohitra ity aza ianareo hoe: Mifindrà ka mianjerà any anaty ranomasina, dia ho tonga izany.

²²Ary na inona na inona no angatahinareo amin’ny fivavahana atao amin’ny finoana dia ho azonareo izany.

²³Rehefa tafiditra tao amin’ny tempoly Jesosy ka nampianatra dia nanatona Azy ny lehiben’ny mpisorona sy ny loholona ka niteny hoe: Fahefana manao ahoana no anaovanao izao? Ary iza no nanome Anao izao fahefana izao?

²⁴Ary Jesosy namaly azy ireo hoe: Hanontany anareo zavatra tokana kosa Aho, koa raha voavalinareo izany dia hilaza aminareo izay fahefana anaovako izany Aho:

²⁵Ny batisan’i Jaona, avy taiza moa izany? Avy tany an-danitra va sa avy tamin’ny olona? Ary nikaon-doha izy ireo ka niteny hoe: Raha lazaintsika hoe: Avy tany an-danitra, dia hovaliany isika hoe: Koa nahoana no tsy nino azy ianareo?

²⁶Ary raha lazaintsika kosa hoe: Avy amin’ny olona, dia matahotra ny vahoaka isika satria eken’ny rehetra fa mpaminany i Jaona.

²⁷Dia namaly an’i Jesosy izy ireo hoe: Tsy fantatray. Dia hoy koa Jesosy taminy: Izaho koa tsy hilaza aminareo izay fahefana anaovako izao.

²⁸Fa ahoana kosa ny hevitrareo? Nisy lehilahy iray nanana zanaka roa lahy; dia nankeo amin’ny lahimatoa izy ka niteny hoe: Anaka, andeha miasa any amin’ny tanim-boaloboka anio.

²⁹Fa namaly izy hoe: Tsy handeha aho; nefa nony avy eo dia nanenina izy ka nandeha ihany.

³⁰Dia nankeo amin’ny faralahy izy ka niteny toy izany koa. Ary namaly azy kosa izy hoe: Handeha aho, tompoko; kanjo tsy nandeha izy.

³¹Koa iza amin’izy mirahalahy moa no nanao ny sitrapon’ny rainy? Dia hoy ireo: Ny lahimatoa. Dia hoy Jesosy taminy: Lazaiko aminareo marina tokoa fa ny mpamory hetra sy ny vehivavy janga dia mialoha anareo ho any amin’ny fanjakan’Andriamanitra.

³²Fa nankany aminareo tamin’ny lalan’ny fahamarinana i Jaona, nefa tsy nino azy ianareo; fa ny mpamory hetra sy ny vehivavy janga no nino azy; fa ianareo kosa, na dia efa nahita izany aza, dia mbola tsy nanenina avy eo mba hinoanareo azy.

³³Mihainoa fanoharana hafa koa: Nisy lehilahy tompon-trano nanamboatra tanim-boaloboka ka namefy azy manodidina sy nihady famiazana teo anatiny ary nanorina trano fiambenana, dia nahofany tamin’olona mpiasa tany izany ary nandeha ho any an-tany lavitra izy.

³⁴Ary rehefa nanakaiky ny fotoana fiakaran’ny vokatra dia naniraka ny mpanompony izy hankany amin’ireo mpiasa tany mba handray ny vokatra.

³⁵Ny mpiasa tany anefa dia nisambotra ireo mpanompony, koa ny iray dia nokapohiny, ny iray dia novonoiny ary ny iray dia notorahany vato.

³⁶Dia naniraka mpanompo hafa indray izy, maro noho ny teo; nefa nataony toy izany koa ireny.

³⁷Ary nony farany dia naniraka ny zanany hankany aminy izy sady niteny hoe: Hanaja ny zanako ireo.

³⁸Kanjo ny mpiasa tany, nony nahita ilay zanaka, dia nifampiresaka hoe: Ity no mpandova; andeha hovonointsika dia ho lasantsika ny lovany.

³⁹Dia nosamborin’ireo izy ka navoakany teny ivelan’ny tanim-boaloboka ary novonoiny.

⁴⁰Koa rehefa tonga ny tompon’ny tanim-boaloboka, hataony ahoana moa ireo mpiasa tany ireo?

⁴¹Hoy ireo taminy: Ho loza tokoa ny handringanany izany olon-doza izany, ary ny tanim-boaloboka dia hahofany amin’ny mpiasa tany hafa izay hanome azy ny vokatra amin’izay fotoanany.

⁴²Hoy Jesosy taminy: Tsy mbola novakinareo akory tao amin’ny Soratra Masina va izao: «Ny vato izay nolavin’ny mpanao trano, dia izany no tonga vato fehizoro; avy tamin’NY TOMPO izao ka mahagaga eo imasontsika?» (Sal 118.22, 23)

⁴³Ary noho izany dia lazaiko aminareo hoe: Hesorina aminareo ny fanjakan’Andriamanitra ka homena izay firenena mahavokatra ny voany.

⁴⁴Ary izay potraka amin’ity vato ity dia ho torotoro, ary na zovy na zovy no hianjerany dia ho montsamontsana.

⁴⁵Ary rehefa ren’ny lehiben’ny mpisorona sy ny Fariseo* ny fanoharana nataon’i Jesosy dia fantany fa ny tenan-dry zareo no nolazainy tamin’izany.

⁴⁶Dia nitady hisambotra Azy izy ireo, saingy natahotra ny vahoaka satria neken’ny vahoaka ho mpaminany Jesosy.