Read La Bible en Malgache Matio 22 Bible Online

Matio 22 - La Bible en Malgache bible

Matio 22

¹Ary Jesosy mbola niteny taminy tamin’ny fanoharana hafa hoe:

²Ny fanjakan’ny lanitra dia tahaka ny mpanjaka iray izay nanao fanasana noho ny amin’ny fampakaram-badin’ny zanany lahy.

³Ary naniraka ny mpanompony izy hiantso izay efa nasaina mba hankao amin’ny fampakaram-bady; nefa tsy nety ho avy ireo.

⁴Dia naniraka mpanompo hafa indray izy ka niteny hoe: Lazao amin’ireo izay efa nasaina hoe: Indro, efa vonona ny sakafo nomaniko; efa voavono ny ombiko sy ny nafahiko ka efa vonona avokoa ny zavatra rehetra; koa tongava amin’izay atỳ amin’ny fampakaram-bady ianareo.

⁵Nefa tsy nahoan’ireo akory izany, fa samy lasa nandeha izy, ny iray dia ho any amin’ny sahany, ny iray dia ho any amin’ny varony.

⁶Ary ny sisa dia nisambotra ny mpanompony, dia nisetrasetra taminy ka namono azy.

⁷Dia tezitra ilay mpanjaka ka naniraka ny miaramilany dia nandringana ireny mpamono olona ireny sady nandoro ny tanànany.

⁸Dia hoy izy tamin’ny mpanompony: Efa vonona ny fampakaram-bady fa ireo izay nasaina no tsy mendrika.

⁹Koa mankanesa ianareo eny amin’ny sampanan-dalana ary izay hitanareo dia asao ho ao amin’ny fampakaram-bady.

¹⁰Dia nandeha ho eny amin’ny lalana ireny mpanompo ireny ka namory izay rehetra hitany, na ny ratsy na ny tsara; dia feno mpiara-misakafo ny fampakaram-bady.

¹¹Nony efa niditra ny mpanjaka hizaha ny mpiara-misakafo dia nahita lehilahy iray izay tsy niakanjo ny akanjo fitondra amin’ny fampakaram-bady.

¹²Dia hoy izy taminy: Ry sakaiza, ahoana no idiranao eto, nefa ianao tsy manana ny akanjo fitondra amin’ny fampakaram-bady? Dia tsy nahateny izy.

¹³Ary hoy ny mpanjaka tamin’ny mpanompony: Afatory ny tongony aman-tanany dia ario any amin’ny maizina any ivelany izy; any no hisy ny fitomaniana sy ny fikitroha-nify.

¹⁴Fa maro no antsoina nefa vitsy no fidina.

¹⁵Ary tamin’izay dia lasa ny Fariseo* ka nikaon-doha mba hamandrika Azy amin’ny teniny.

¹⁶Koa naniraka ny mpianany mbamin’ny Herodiana hankeo aminy izy ireo ka niteny hoe: Mpampianatra ô, fantatray fa marina Ianao ka mampianatra marina ny lalànan’Andriamanitra ary tsy miahiahy olona satria tsy mba mizaha tavan’olona Ianao.

¹⁷Koa lazao aminay ary izay hevitrao: Moa mety va ny mandoa vola hetra ho an’i Kaisara sa tsia?

¹⁸Fa Jesosy nahalala ny faharatsiany ka hoy Izy: Nahoana no maka fanahy Ahy ianareo, ry mpihatsaravelatsihy?

¹⁹Asehoy Ahy ny vola fandoa amin’ny hetra. Dia nitondrany denaria* iray Izy.

²⁰Dia hoy Jesosy taminy: An’iza ity sary sy soratra ity?

²¹Hoy ireo Taminy: An’i Kaisara. Dia hoy Jesosy taminy: Aloavy ho an’i Kaisara ary izay an’i Kaisara ary ho an’Andriamanitra izay an’Andriamanitra.

²²Ary gaga izy ireo nony nahare izany, dia nandao Azy ka lasa nandeha.

²³Tamin’io andro io ihany dia nankeo amin’i Jesosy ny Sadoseo* sasany izay nilaza fa tsy misy ny fitsanganana amin’ny maty ka nanontany Azy hoe:

²⁴Mpampianatra ô, i Mosesy dia nilaza hoe: «Raha misy lehilahy maty momba dia aoka ny rahalahiny hampakatra ny vadiny ka hiteraka hamelo-maso ny rahalahiny» (Deo 25.5).

²⁵Koa nisy fito mirahalahy tetỳ aminay; ary nampaka-bady ny zokiny dia maty, ary satria tsy niteraka izy dia navelany ho an’ny rahalahiny ny vadiny;

²⁶ary toy izany koa ny faharoa sy ny fahatelo, hatramin’ny fahafito.

²⁷Ary tao aorianan’izy rehetra dia maty koa Ravehivavy.

²⁸Koa amin’ny fitsanganan’ny maty, ho vadin’iza amin’izy fito mirahalahy moa Ravehivavy? Satria efa samy nanambady azy avokoa izy rehetra.

²⁹Fa Jesosy namaly azy ireo hoe: Mahadiso hevitra anareo ny tsy fahafantaranareo na ny Soratra Masina na ny herin’Andriamanitra.

³⁰Fa amin’ny fitsanganan’ny maty dia tsy mba hisy olona hampaka-bady, na havoaka hampakarina, fa ho tahaka ny anjely any an-danitra izy.

³¹Koa ny amin’ny fitsanganan’ny maty, moa mbola tsy novakinareo va ny teny nataon’Andriamanitra taminareo milaza hoe:

³²«Izaho no Andriamanitr’i Abrahama sy Andriamanitr’Isaka ary Andriamanitr’i Jakoba (Eks 3.6)? Andriamanitra tsy an’ny maty fa an’ny velona.»

³³Ary ny vahoaka, raha nandre izany, dia talanjona tamin’ny fampianarany.

³⁴Ny Fariseo*, nony nandre fa gina teo anatrehan’i Jesosy ny Sadoseo, dia nivory teo amin’ny toerana iray.

³⁵Ary ny iray tamin’ireo, izay mpahay lalàna, dia nanontany naka fanahy Azy hoe:

³⁶Mpampianatra ô, ny didy manao ahoana moa no lehibe ao amin’ny lalàna?

³⁷Dia hoy Jesosy taminy: «Tiava NY TOMPO Andriamanitrao amin’ny fonao manontolo sy ny fanahinao manontolo» (Deo 6.5).

³⁸Izany no didy lehibe sady voalohany.

³⁹Ary ny faharoa, izay tahaka azy ihany, dia izao: «Tiava ny namanao tahaka ny tenanao» (Lev 19.18).

⁴⁰Izany didy roa izany no ihantonan’ny lalàna manontolo sy ny mpaminany.

⁴¹Ary rehefa tafavory ny Fariseo* dia nanontany azy ireo Jesosy hoe:

⁴²Ahoana ny hevitrareo ny amin’i Kristy*? Zanak’iza moa Izy? Dia hoy ireo Taminy: Zanak’i Davida.

⁴³Fa hoy Jesosy tamin’izy ireo: Koa nahoana ary i Davida, amin’ny Fanahy, no miantso Azy hoe Tompo, sady miteny hoe:

⁴⁴«NY TOMPO nilaza tamin’ny Tompoko hoe: Mipetraha eo ankavanako ambara-panaoko ny fahavalonao ho eo ambanin’ny tongotrao» (Sal 110.1)?

⁴⁵Koa raha i Davida ary miantso Azy hoe: Tompo, ahoana no maha Zanany Azy?

⁴⁶Dia tsy nisy nahavaly Azy na dia teny iray akory aza; ary hatramin’izay andro izay dia tsy nisy sahy nanontany Azy intsony.