Read La Bible en Malgache Matio 23 Bible Online

Matio 23 - La Bible en Malgache bible

Matio 23

¹Ary tamin’izany Jesosy dia niteny tamin’ny vahoaka sy tamin’ny mpianany hoe:

²Eo amin’ny fitoeran’i Mosesy no ipetrahan’ny mpanoradalàna* sy ny Fariseo*;

³koa amin’izany, izay rehetra lazainy dia ataovy ka tandremo; fa aza mba manao araka ny asany, satria miteny ihany izy nefa tsy manatanteraka.

⁴Eny, mamehy entana izay sady mavesatra no sarotra entina izy ka mametraka izany eo amin’ny soroky ny olona, nefa ny tenany dia tsy mety manetsika izany na dia amin’ny rantsantanany iray aza.

⁵Ary ny asany rehetra dia ataony mba ho hitan’ny olona; fa ataony lehibe ny filakiterany[22] ary ataony vaventy ny morontongotr’akanjony.

⁶Ary tia ny fitoerana eny anoloana any amin’ny fanasana, sy ny fipetrahana eny anoloana eo amin’ny sinagoga* izy

⁷ary koa ny hoarahabain’ny olona eny an-tsena sy ny hataon’ny olona hoe: Raby ô!

⁸Fa ianareo kosa dia aza mba mety hatao hoe: Raby ô; fa iray ihany no Mpampianatra anareo ary ianareo rehetra dia mpirahalahy avokoa.

⁹Aza milaza olona etỳ an-tany ho rainareo koa; fa iray ihany no Ray dia izay any an-danitra.

¹⁰Ary aza mba mety antsoina hoe mpitarika ianareo; fa iray ihany no Mpitarika anareo dia Kristy*.

¹¹Fa izay lehibe aminareo no ho mpanompo anareo.

¹²Fa izay manandra-tena no haetry, ary izay manetry tena no hasandratra.

¹³Fa lozanareo, mpanoradalàna sy Fariseo, mpihatsaravelatsihy, fa arindrinareo eo anoloan’ny olona ny fanjakan’ny lanitra; fa tsy miditra ianareo ary izay te hiditra tsy avelanareo hiditra.

¹⁴Lozanareo, mpanoradalàna sy Fariseo, mpihatsaravelatsihy! Fa laninareo ny tranon’ny mpitondratena, dia manao vavaka lavareny mba ho fiolahana ianareo; koa izany no hahazoanareo fanamelohana mafimafy kokoa.

¹⁵Lozanareo, mpanoradalàna sy Fariseo, mpihatsaravelatsihy! Fa mandeha mitety ny ranomasina sy ny tany maina ianareo mba hahazoanareo prozelita* iray monja; ary rehefa azonareo izy dia ataonareo zanaky ny afobe* indroa mihoatra noho ianareo.

¹⁶Lozanareo, jamba nefa mpitarika izay milaza hoe: Raha misy mianiana amin’ny tempoly dia tsy mampaninona izany; fa raha misy mianiana amin’ny volamenan’ny tempoly dia mamato-tena izy.

¹⁷Ry adala sy jamba! Inona no lehibe, ny volamena va, sa ny tempoly izay nahamasina ny volamena?

¹⁸Ary koa: Raha misy mianiana amin’ny alitara dia tsy mampaninona izany; fa raha misy mianiana amin’ny fanatitra eo amboniny dia mamato-tena izy.

¹⁹Ry jamba! Inona no lehibe, ny fanatitra, sa ny alitara izay mahamasina ny fanatitra?

²⁰Koa amin’izany, izay mianiana amin’ny alitara, dia mianiana aminy sy amin’ny zavatra rehetra izay eo amboniny.

²¹Ary izay mianiana amin’ny tempoly dia mianiana aminy sy amin’izay mitoetra ao aminy.

²²Izay mianiana amin’ny lanitra dia mianiana amin’ny sezafiandrianan’Andriamanitra sy amin’izay mipetraka eo amboniny.

²³Lozanareo, mpanoradalàna sy Fariseo, mpihatsaravelatsihy! Fa mandoa ny ampahafolon’ny solila sy ny aneta ary ny komina ianareo, nefa navelanareo izay lehibe indrindra amin’ny lalàna, dia ny rariny sy ny famindrampo ary ny finoana; ireto no tokony ho nataonareo, nefa tsy tokony ho navelanao iretsy.

²⁴Ry jamba nefa mpitarika! Tantavaninareo ny moka nefa atelinareo ny rameva.

²⁵Lozanareo, mpanoradalàna sy Fariseo, mpihatsaravelatsihy! Fa diovinareo ny ivelan’ny kapoaka sy ny lovia nefa ny ao anatiny dia feno fandrobana sy tsy fahononana.

²⁶Ry Fariseo jamba! Diovy aloha ny atin’ny kapoaka sy ny lovia mba ho madio koa ny ivelany.

²⁷Lozanareo, mpanoradalàna sy Fariseo, mpihatsaravelatsihy! Fa ianareo dia tahaka ny fasana voalalotra fotsy, izay miseho ho tsara tarehy eo ivelany, nefa ny ao anatiny dia feno taolam-paty mbamin’ny fahalotoana rehetra.

²⁸Dia tahaka izany koa ianareo: Raha amin’ny eo ivelany dia miseho amin’ny olona ho marina, nefa ny ao anatinareo dia feno fihatsarambelatsihy sy tsy fankatoavan-dalàna.

²⁹Lozanareo, mpanoradalàna sy Fariseo, mpihatsaravelatsihy! Fa manorina ny fasan’ny mpaminany ianareo sady manisy haingony ny rarivatom-pasan’ny olona marina,

³⁰koa hoy ianareo: Raha niara-belona tamin’ny razanay izahay dia tsy mba ho niombona taminy handatsa-dra ny mpaminany.

³¹Dia miampanga tena ianareo fa zanak’izay namono ny mpaminany.

³²Ary ianareo izao dia efa nahafeno ny kapoaka famaran’ny razanareo.

³³Ry bibilava, ry taranaky ny menarana! Hataonareo ahoana no fandositra ny fanamelohana ho any amin’ny afobe?

³⁴Ary noho izany dia indro Aho maniraka mpaminany sy olon-kendry ary mpanoradalàna ho atỳ aminareo; koa ny sasany dia hovonoinareo sy hohomboinareo amin’ny hazofijaliana, ny sasany dia hokapohinareo ao amin’ny sinagoganareo sy henjehinareo any amin’ny tanàna sy vohitra

³⁵mba hanody anareo ny ran’ny tsy manan-tsiny rehetra, izay nalatsaka tetỳ ambonin’ny tany, hatramin’ny ran’i Abela marina ka hatramin’ny ran’i Zakaria, zanak’i Barakia, izay novonoinareo teo anelanelan’ny tempoly sy ny alitara.

³⁶Lazaiko aminareo marina tokoa: Hanody ity taranaka ity izany rehetra izany.

³⁷Ry Jerosalema, ry Jerosalema, izay mamono ny mpaminany sy mitora-bato izay irahina ho ao aminy, impiry Aho no ta hanangona ny zanakao, tahaka ny fanòmban’ny akoho ny zanany ao ambanin’ny elany fa tsy nety ianareo!

³⁸Indro, ho lao ny tranonareo.

³⁹Fa lazaiko aminareo: Hatramin’izao dia tsy hahita Ahy intsony ianareo mandra-pilazanareo hoe: Isaorana anie izay avy amin’ny anaran’NY TOMPO.