Read La Bible en Malgache Matio 24 Bible Online

Matio 24 - La Bible en Malgache bible

Matio 24

¹Rehefa niala tao amin’ny tempoly Jesosy dia lasa nandeha; ary nanatona Azy ny mpianany mba hampijery Azy ny rafitry ny tempoly.

²Hoy Izy anefa taminy: Tsy hitanareo va ireo rehetra ireo? Lazaiko aminareo marina tokoa: Tsy havela hisy vato hifanongoa eo ka tsy horavana.

³Ary nipetraka teo an-tendrombohitra Oliva Izy dia nanatona Azy mangingina ny mpianany ka niteny hoe: Lazao aminay izay andro hahatongavan’izany ary izay ho famantarana ny fiavianao sy ny fahataperan’izao tontolo izao.

⁴Ary Jesosy namaly azy ireo hoe: Mitandrema, fandrao hisy hamitaka anareo.

⁵Fa maro no ho avy amin’ny anarako hilaza hoe: Izaho no Kristy* ka maro no ho voafitany.

⁶Ary handre ady sy filazana ady ianareo; koa mitandrema, aza matahotra; fa tsy maintsy ho tonga izany; nefa tsy mbola izay no farany.

⁷Fa hisy firenena hitsangana hamely firenena, hisy fanjakana hitsangana hamely fanjakana; ary hisy mosary sy horohoron-tany any amin’ny tany samihafa.

⁸Fa izany rehetra izany no ho fiandohan’ny faharariam-piterahana.

⁹Ary hatolony hampijaliana ianareo ka hovonoiny; ary ho halan’ny firenena rehetra ianareo noho ny anarako.

¹⁰Amin’izany andro izany dia maro no ho tafintohina ka hifampiampanga sy hifankahala.

¹¹Hisy mpaminany sandoka maro hitsangana ka hamitaka olona maro.

¹²Ary noho ny haben’ny tsy fankatoavan-dalàna dia hihamangatsiaka ny fitiavan’ny maro.

¹³Fa izay maharitra hatramin’ny farany no hovonjena.

¹⁴Ary hotorìna manerana izao tontolo izao ity Filazantsaran’ny fanjakana ity ho vavolombelona amin’ny firenena rehetra dia izay vao ho tonga ny farany.

¹⁵Koa raha hitanareo mitsangana ao amin’izay fitoerana masina ny fahavetavetan’ny fandravana, izay nampilazaina an’i Daniela mpaminany[23] (Dan 12.11; 9.27), aoka hisaina izay mamaky izany,

¹⁶dia aoka izay olona any Jodia* handositra ho any an-tendrombohitra;

¹⁷izay ao an-tampon-trano* dia aoka tsy hidina haka ny entany ao an-tranony;

¹⁸ary izay any an-tsaha dia aoka tsy hiverina haka ny akanjony.

¹⁹Loza ny hahazo ny bevohoka sy ny mampinono amin’izany andro izany!

²⁰Fa mivavaha ianareo mba tsy ho amin’ny ririnina na ho amin’ny Sabata no handosiranareo.

²¹Fa amin’izay andro izay dia hisy fahoriana lehibe, izay mbola tsy nisy toy izany hatrizay niandohan’izao tontolo izao ka mandraka ankehitriny sady tsy hisy intsony.

²²Ary raha tsy hafohezina izany andro izany dia tsy misy nofo ho voavonjy; fa noho ny olom-boafidy dia hohafohezina izany andro izany.

²³Koa raha misy miteny aminareo hoe: Indro, atỳ Kristy*, na: Indro, arỳ Izy, aza mino izany ianareo.

²⁴Fa hisy kristy sandoka sy mpaminany sandoka hitsangana ka haneho famantarana lehibe sy fahagagana, ary raha azony atao, na dia ny olom-boafidy aza dia hofitahiny.

²⁵Indro, efa voalazako taminareo rahateo izany.

²⁶Ary amin’izany, raha misy miteny aminareo hoe: Indro, any an-tany efitra Izy, aza mankany ianareo; indro, ao amin’ny efitrano Izy dia aza mino izany.

²⁷Fa tahaka ny tselatra avy any atsinanana ka hita hatrany andrefana dia ho tahaka izany ny fiavian’ny Zanak’Olona*.

²⁸Fa izay itoeran’ny faty, any no hiangonan’ny voromahery.

²⁹Raha vao afaka ny fahoriana amin’ireo andro ireo dia hohamaizinina ny masoandro ary tsy hahazava ny volana; hiraraka avy eny amin’ny lanitra ny kintana ary hohozongozonina ny herin’ny lanitra.

³⁰Amin’izay no hiseho eny amin’ny lanitra ny famantarana ny Zanak’Olona* ka hitomany ny firenena rehetra ambonin’ny tany, ary hahita ny Zanak’Olona avy amin’ny hery sy voninahitra lehibe eny amin’ny rahon’ny lanitra izy.

³¹Ary haniraka ny anjeliny Izy, miaraka amin’ny feon’ny trompetra mafy, ary izy ireo dia hanangona ny olom-boafidiny avy amin’ny vazan-tany efatra, hatramin’ny faravodilanitra rehetra.

³²Mianara ny fanoharana ny amin’ny aviavy: Raha vao mitsiry ny rantsany ka mandravina dia fantatrareo fa efa akaiky ny lohataona.

³³Dia tahaka izany koa ianareo, raha vao hitanareo izany rehetra izany, dia aoka ho fantatrareo fa efa akaiky, efa eo am-baravarana Izy.

³⁴Lazaiko aminareo marina tokoa: Tsy mba ho tapitra izao taranaka izao mandra-pahatongan’izany rehetra izany.

³⁵Ny lanitra sy ny tany dia ho levona, fa ny teniko dia tsy mba ho levona.

³⁶Fa ny amin’izany andro sy ora izany dia tsy misy mahalala, na dia ny anjelin’ny lanitra aza, ary na ny Zanaka aza, afa-tsy ny Ray ihany.

³⁷Fa tahaka ny tamin’ny andron’i Noa dia ho tahaka izany koa ny fiavian’ny Zanak’Olona*.

³⁸Tahaka ny tamin’ny andro mialoha ny safodrano koa, raha nihinana sy nisotro ny olona ary nampaka-bady sy namoaka ny ampakarina, mandra-piavin’ny andro izay nidiran’i Noa tao amin’ny sambofiara,

³⁹ary tsy nahafantatra izy ireo raha tsy tonga ny safodrano izay nandringana ny olona rehetra, dia ho tahaka izany ny fiavian’ny Zanak’Olona.

⁴⁰Ary amin’izany dia hisy roa lahy any an-tsaha; ny iray dia horaisina ary ny iray dia havela.

⁴¹Ary hisy roa vavy manodina ny fikosoham-bary; ny iray dia horaisina ary ny iray dia havela.

⁴²Koa amin’izany miambena ianareo; fa tsy fantatrareo izay andro hiavian’ny Tomponareo.

⁴³Nefa aoka ho fantatrareo izao: Raha fantatry ny tompon-trano ny fotoam-piambenana amin’ny alina izay hahatongavan’ny mpangalatra dia ho niambina izy ka tsy namela ny tranony hovakina.

⁴⁴Noho izany, miomàna koa ianareo; fa amin’izay ora tsy ampoizinareo no hiavian’ny Zanak’Olona.

⁴⁵Iza moa no mpanompo mahatoky sy manan-tsaina, izay notendren’ny tompony hifehy ny mpanompony mba hanome azy ireo sakafo ara-potoana?

⁴⁶Sambatra izany mpanompo izany, raha avy ny tompony ka mahita azy manatanteraka izany.

⁴⁷Lazaiko aminareo marina tokoa fa hotendreny ho mpanapaka ny fananany rehetra izy avy eo.

⁴⁸Fa raha miteny anakampo kosa ny mpanompo ratsy fanahy hoe: Maharitra ela ny tompoko

⁴⁹ka mikapoka ny mpanompo namany ary miara-mihinana sy misotro amin’ny mpimamo,

⁵⁰dia ho avy ny tompon’izany mpanompo izany amin’ny andro izay tsy ampoiziny sy amin’ny ora izay tsy fantany,

⁵¹koa hokapohiny mafy izy sady homeny anjara miaraka amin’ny mpihatsaravelatsihy; any no hisy ny fitomaniana sy ny fikitroha-nify.