Read La Bible en Malgache Matio 26 Bible Online

Matio 26 - La Bible en Malgache bible

Matio 26

¹Rehefa vitan’i Jesosy izany teny rehetra izany dia nilaza tamin’ny mpianany Izy hoe:

²Fantatrareo fa raha afaka indroa andro dia ho tonga ny Paska, koa ny Zanak’Olona* dia hatolotra hohomboana amin’ny hazofijaliana.

³Ary tamin’izany ny lehiben’ny mpisorona sy ny loholona dia nivory tao amin’ny lapan’ny Mpisoronabe antsoina hoe Kaiafa.

⁴Ary niara-nihevitra ny hisambotra an’i Jesosy amin’ny fitaka izy ireo ka hamono Azy;

⁵kanefa hoy izy: Tsy amin’ny andro firavoravoana, fandrao hisy tabataba eo amin’ny vahoaka.

⁶Ary nony tany Betania, tao an-tranon’i Simona boka, Jesosy,

⁷dia nanatona Azy ny vehivavy iray nitondra tavoara alabasitara feno menaka manitra tena sarobidy, koa nararany tamin’ny lohan’i Jesosy izany, raha nipetraka nisakafo Izy.

⁸Nony nahita izany ny mpianatra dia tezitra ka niteny hoe: Inona no anton’izao fandaniam-poana izao?

⁹Fa azo namidy ho lafo be iny ka homena ny mahantra.

¹⁰Ary fantatr’i Jesosy izay nataon’ireo ka hoy Izy taminy: Nahoana ianareo no manao izay mampalahelo io vehivavy io? Fa asa soa no nataony tamiko.

¹¹Satria ny mahantra dia eto aminareo mandrakariva fa Izaho tsy mba ho eto aminareo mandrakariva.

¹²Nandraraka io menaka manitra io tamin’ny tenako izy, fa ny hanamboarany Ahy halevina no nanaovany izany.

¹³Lazaiko aminareo marina tokoa: Na aiza na aiza eto amin’izao tontolo izao no itoriana ity Filazantsara ity dia hotantaraina koa izay nataon’ity vehivavy ity mba ho fahatsiarovana azy.

¹⁴Ary ny iray tamin’ny roa amby folo lahy, izay antsoina hoe Jodasy iskariota, dia nankao amin’ireo lehiben’ny mpisorona

¹⁵ka niteny hoe: Homenareo ohatrinona aho hanolorako Azy aminareo? Ary izy ireo nandanja sekela volafotsy telopolo homena azy.

¹⁶Hatramin’izay no nitadiavany izay andro hahazoany manolotra Azy.

¹⁷Tamin’ny voalohany amin’ny andro fihinanana ny mofo tsy misy masirasira dia nankeo amin’i Jesosy ny mpianatra ka niteny hoe: Aiza no tianao handehananay hanomanana ny sakafon’ny Paska ho anao?

¹⁸Ary hoy Izy: Mankanesa any an-tanàna ho any amin’ny lehilahy iray ka lazao aminy hoe: Hoy ny Mpampianatra: Efa akaiky ny fotoanandroko; koa ato aminao Aho sy ny mpianatro no hitandrina ny Paska.

¹⁹Ary ny mpianatra dia nanatanteraka izay toromarika nomen’i Jesosy ka nanomana ny Paska.

²⁰Ary nony hariva ny andro dia nipetraka hisakafo Izy mbamin’ny mpianatra roa amby folo lahy.

²¹Ary raha mbola nihinana izy ireo dia hoy Jesosy: Lazaiko aminareo marina tokoa, fa ny iray aminareo no hamadika Ahy.

²²Dia nalahelo mafy izy ireo ka samy nanontany Azy ny tsirairay hoe: Moa izaho va izany, Tompoko?

²³Ary Izy namaly hoe: Izay niara-nanatsoboka ny tanany Tamiko tao anatin’ny lovia, izy no hamadika Ahy.

²⁴Ny Zanak’Olona* dia mandeha tokoa araka izay voasoratra momba Azy, nefa lozan’izay olona hahatonga ny Zanak’Olona ho voatolotra! Tsara ho an’izany olona izany raha tsy teraka akory izy.

²⁵Ary hoy i Jodasy ilay hanolotra Azy: Izaho va izany, Raby ô? Dia hoy Izy taminy: Voalazanao.

²⁶Ary raha mbola teo am-pisakafoana izy ireo dia nandray mofo Jesosy, koa rehefa nisaotra Izy, dia novakiny ka natolony ny mpianatra, ary hoy Izy: Raiso, hano, ity no tenako.

²⁷Ary nandray ny kapoaka Izy, koa rehefa nisaotra Izy, dia natolony azy ka nataony hoe: Misotroa amin’ity ianareo rehetra;

²⁸fa ity no rako, dia ny amin’ny fanekena vaovao izay alatsaka ho an’ny maro ho famelan-keloka.

²⁹Ary lazaiko aminareo fa manomboka izao dia tsy mba hisotro itony vokatry ny voaloboka itony intsony Aho mandra-piavin’ny andro hiarahako misotro izay vaovao aminareo any amin’ny fanjakan’ny Raiko.

³⁰Rehefa avy nihira fiderana izy ireo dia lasa nankany an-tendrombohitra Oliva.

³¹Ary tamin’izany dia hoy Jesosy taminy: Ianareo rehetra dia ho tafintohina noho ny Amiko anio alina; fa voasoratra hoe: «Hamely ny mpiandry Aho dia hihahaka ny ondry andrasana» (Zak 13.7).

³²Fa rehefa tafatsangana amin’ny maty Aho dia hialoha anareo any Galilia.

³³Fa hoy i Petera Taminy: Na dia ho tafintohina noho ny Aminao aza ny olona rehetra, izaho dia tsy mba ho tafintohina na oviana na oviana.

³⁴Hoy Jesosy taminy: Lazaiko aminao marina tokoa fa anio alina, raha tsy mbola misy akoho maneno, dia handa Ahy intelo ianao.

³⁵Hoy i Petera taminy: Na dia hiara-maty aminao aza aho dia tsy mba handa Anao mihitsy. Ary toy izany koa no nolazain’ny mpianatra rehetra.

³⁶Ary Jesosy mbamin’ny mpianany dia tonga tao amin’ny saha iray antsoina hoe Getsemane, ary hoy Izy tamin’ny mpianany: Mipetraha eto aloha ianareo, raha mbola mankeroa hivavaka Aho.

³⁷Dia nitondra an’i Petera mbamin’izy roa lahy zanak’i Zebedio Izy, sady nalahelo am-po sy ory indrindra.

³⁸Hoy Izy tamin’izy roa lahy: Fadiranovana loatra toy ny efa ho faty ny fanahiko; mitoera eto ka miaraha miari-tory Amiko.

³⁹Ary nony nandroso kelikely Izy dia niankohoka ka nivavaka hoe: Raiko ô, raha azo atao dia aoka hesorina Amiko ity kapoaka ity; nefa aoka tsy ny sitrapoko no hatao fa ny Anao.

⁴⁰Nankeo amin’ny mpianatra Izy avy eo ka nahita azy ireo matory; dia hoy Izy tamin’i Petera: Hay tsy mahazaka ny miara-miari-tory Amiko na dia ora iray ihany aza ianareo!

⁴¹Miareta tory sy mivavaha ianareo mba tsy hidiranareo amin’ny fakam-panahy; mety ihany ny fanahy fa ny nofo no tsy manan-kery.

⁴²Dia nihataka fanindroany Izy ka nivavaka hoe: Raiko ô, raha tsy azo esorina ity, fa tsy maintsy hosotroiko, dia aoka ny sitraponao no hatao.

⁴³Ary nony niverina indray Izy dia nahita azy ireo matory; fa efa nilondolondo ny masony.

⁴⁴Dia nandao azy ireo Izy ka lasa indray nivavaka fanintelony, ary ilay teniny teo ihany no naveriny.

⁴⁵Niverina teo amin’ny mpianatra indray Izy avy eo sady niteny hoe: Matoria ary ianareo ankehitriny ka mialà sasatra, indro, efa akaiky ny ora, ary ny Zanak’Olona* dia hatolotra eo an-tanan’ny mpanota.

⁴⁶Mitsangàna, andeha isika, indro, efa manakaiky ilay manolotra Ahy.

⁴⁷Ary raha mbola niteny Jesosy dia indro, avy i Jodasy izay iray amin’ny roa amby folo lahy, miaraka amin’ny vahoaka betsaka, nitondra sabatra sy langilangy, nirahin’ireo lehiben’ny mpisorona sy ny loholona.

⁴⁸Ary ilay nanolotra Azy nanome famantarana ny olona ka niteny hoe: Izay horohako no Izy ka sambory.

⁴⁹Ary niaraka tamin’izay dia nanatona an’i Jesosy izy ka niteny hoe: Finaritra, Raby! Dia norohany izy.

⁵⁰Fa hoy Jesosy taminy: Ry sakaiza, ataovy izay nahatongavanao eto. Dia nanatona ny olona ka nisambotra an’i Jesosy ary nitana Azy.

⁵¹Ary indro, ny iray tamin’ireo izay niaraka tamin’i Jesosy dia nanatsotra ny tanany, dia nanatsoaka ny sabany ka nikapoka ny mpanompon’ny Mpisoronabe ary nahafaka ny sofiny.

⁵²Fa hoy Jesosy: Ampidiro amin’ny tranony ny sabatrao; fa izay rehetra mandray sabatra dia ho fatin’ny sabatra.

⁵³Heverinao va fa tsy azoko atao ny mangataka amin’ny Raiko dia haniraka anjely maherin’ny roa amby folo legiona ho atỳ Amiko Izy eo no eo?

⁵⁴Raha izany anefa, hatao ahoana no hahatanteraka ny Soratra Masina izay milaza fa tsy maintsy ho tonga izao?

⁵⁵Ary tamin’izany ora izany dia niteny tamin’ny vahoaka Jesosy hoe: Tonga mitondra sabatra sy langilangy hisambotra Ahy toy ny hisambotra jiolahy va ianareo? Isanandro dia nipetraka nampianatra tao amin’ny tempoly Aho nefa tsy nisambotra Ahy ianareo.

⁵⁶Nefa moa izany rehetra izany dia tonga mba hahatanteraka izay voasoratry ny mpaminany. Tamin’izany tokoa dia nandao Azy ny mpianatra rehetra ka nandositra.

⁵⁷Ary ireo izay nisambotra an’i Jesosy dia nitondra Azy ho any amin’i Kaiafa mpisoronabe*, tao amin’izay nivorian’ny mpanoradalàna* sy ny loholona.

⁵⁸Ary i Petera dia nanaraka Azy teny lavidavitra teny hatrany amin’ny lapan’ny Mpisoronabe; dia niditra izy ka niara-nipetraka tamin’ireo mpiandry raharaha mba hahita izay ho farany.

⁵⁹Ary ireo lehiben’ny mpisorona mbamin’ny Sinedriona* rehetra dia nitady teny hoentiny miampanga lainga an’i Jesosy mba hamonoany Azy;

⁶⁰nefa tsy nahita izy ireo, na dia maro aza ny vavolombelona mandainga tonga teo. Ary nony farany dia nisy roa lahy tonga teo, izay niteny hoe:

⁶¹Ilehity dia nilaza hoe: Mahay mandrava ny tempolin’Andriamanitra Aho sy manangana azy ao anatin’ny hateloana.

⁶²Dia nitsangana ny Mpisoronabe ka niteny tamin’i Jesosy hoe: Tsy manana havaly va Ianao? Inona no iampangan’ireo Anao?

⁶³Nefa nangina Jesosy. Dia hoy ny Mpisoronabe Taminy: Ampianianiko amin’Andriamanitra velona Ianao hilaza aminay, raha Ianao no Kristy*, Zanak’Andriamanitra.

⁶⁴Hoy Jesosy taminy: Voalazanao; nefa, lazaiko aminareo fa hatramin’izao dia ho hitanareo ny Zanak’Olona* mipetraka eo ankavanan’ny Hery ary tonga eny amin’ny rahon’ny lanitra.

⁶⁵Tamin’izay ny Mpisoronabe dia nandriatra ny fitafiany ka niteny hoe: Efa niteny ratsy Izy; inona no mbola ilàntsika vavolombelona indray? Indro, efa renareo izao fitenenan-dratsy izao.

⁶⁶Ahoana ny hevitrareo? Ary namaly izy ireo hoe: Mendrika hohelohina ho faty Izy.

⁶⁷Dia nandrora ny tavany sy nanisy totohondry Azy izy ireo, ary ny sasany dia namely tehamaina

⁶⁸sady niteny hoe: Maminania aminay, ry Kristy, iza no namely Anao teo?

⁶⁹Ary i Petera dia nipetraka teo ivelany, teo an-kianja; nanatona azy ny ankizivavy iray ka niteny hoe: Ianao koa dia niaraka tamin’i Jesosy, ilay Galiliana.

⁷⁰Fa nandà teo anatrehan’izy rehetra izy ka niteny hoe: Tsy fantatro izay lazainao.

⁷¹Ary nony niala ho eo am-bavahady izy dia nahita azy koa ny ankizivavy iray hafa ka nilaza tamin’izay teo hoe: Ity koa niaraka tamin’ilay Jesosy avy any Nazareta.

⁷²Dia nandà indray tamin’ny fianianana izy hoe: Tsy fantatro izany Lehilahy izany.

⁷³Nony afaka kelikely, nanatona ireo izay nijanona teo ka nilaza tamin’i Petera hoe: Marina tokoa fa naman’ireny ianao; fa ny fiteninao no miampanga anao.

⁷⁴Dia nanomboka niozona sy nianiana izy hoe: Tsy fantatro izany Lehilahy izany; ary niaraka tamin’izay dia nisy akoho naneno.

⁷⁵Ary nahatsiaro ny tenin’i Jesosy i Petera, dia ilay nolazainy hoe: Raha tsy mbola misy akoho maneno dia handa Ahy intelo ianao. Ary lasa nandeha tany ivelany izy dia nigogogogo nitomany.