Read La Bible en Malgache Matio 27 Bible Online

Matio 27 - La Bible en Malgache bible

Matio 27

¹Nony maraina ny andro dia nikaon-doha ny lehiben’ny mpisorona rehetra sy ny loholona hiampanga an’i Jesosy mba hamonoany Azy ho faty.

²Ary rehefa nafatony Izy dia noentiny ka natolony an’i Pilato governora.

³Fa i Jodasy, ilay namadika Azy, raha nahita fa nohelohina Jesosy, dia nanenina ka namerina ny sekela volafotsy telopolo tamin’ny lehiben’ny mpisorona sy ny loholona

⁴sady niteny hoe: Nanota aho satria namadika ny ran’ny tsy manan-tsiny. Fa hoy ireo: Ahoanay inona izany fa raharahanao!

⁵Ary rehefa avy nanipy ny vola teo amin’ny tempoly izy dia lasa nandeha ka nananton-tena.

⁶Ary ny lehiben’ny mpisorona dia nandray ny vola ka niteny hoe: Tsy mety raha alatsaka ao amin’ny rakitry ny tempoly ity fa vidin-dra.

⁷Koa rehefa nikaon-doha izy ireo dia novidiny tamin’ilay vola ny sahan’ny mpanefy vilany mba ho fandevenam-bahiny.

⁸Ary izay no iantsoana izany saha izany mandraka androany hoe Sahan-dra.

⁹Ary tamin’izany dia tanteraka izay nampilazaina an’i Jeremia mpaminany[24] hoe: «Dia nalainy ny volafotsy telopolo, vidin’ilay notombanan’ny Zanak’Israely,

¹⁰ka nomeny hividianana ny sahan’ny mpanefy vilany izany, araka izay nandidian’NY TOMPO ahy» (Jer 18.2; Zak 11.13).

¹¹Ary Jesosy nitsangana teo anatrehan’ny governora; dia nanontany Azy ny governora hoe: Ianao va no Mpanjakan’ny Jiosy*? Hoy Jesosy: Voalazanao.

¹²Ary rehefa nampangain’ny lehiben’ny mpisorona mbamin’ny loholona Izy dia tsy namaly akory.

¹³Hoy i Pilato Taminy: Tsy renao va izany zavatra maro iampangan’ireo Anao izany?

¹⁴Fa tsy namaly azy Izy na dia indraimbava aza ka gaga tokoa ny governora.

¹⁵Isaky ny tonga ny andro firavoravoana dia fanaon’ny governora ny manafaka mpifatotra iray ho an’ny vahoaka, araka izay tiany.

¹⁶Ary tamin’izany nisy mpifatotra malaza iray antsoina hoe Barabasy.

¹⁷Koa nony tafangona teo ny olona dia hoy i Pilato: Iza moa no tianareo hafahako ho anareo, i Barabasy sa Jesosy izay lazaina hoe Kristy*?

¹⁸Fantany mantsy fa fialonana no nanoloran’ireo Azy.

¹⁹Ary rehefa nipetraka teo amin’ny fitsarana izy dia nandefa iraka hankeo aminy ny vadiny hilaza aminy hoe: Aza manao na inona na inona amin’izany Lehilahy marina izany fa nampahory be ahy androany ny nanofisako Azy.

²⁰Ny lehiben’ny mpisorona mbamin’ny loholona anefa dia nitaona ny vahoaka mba hangataka an’i Barabasy ka hampamono an’i Jesosy.

²¹Fa hoy ny governora tamin’izy ireo: Iza amin’izy roa lahy moa no tianareo hafahako ho anareo? Dia hoy izy rehetra: I Barabasy.

²²Ary hoy i Pilato: Ahoana kosa ary no hataoko amin’i Jesosy izay lazaina hoe Kristy? Dia hoy izy rehetra: Aoka hohomboana amin’ny hazofijaliana Izy.

²³Fa hoy ny governora: Inona ary no ratsy nataony? Fa vao mainka niantsoantso izy rehetra hoe: Aoka hohomboana amin’ny hazofijaliana Izy!

²⁴Ary rehefa hitan’i Pilato fa tsy nisy hevitra, fa vao mainka nitombo ihany ny tabataba, dia naka rano izy ka nanasa tanana teo anatrehan’ny vahoaka sady niteny hoe: Tsy manan-tsiny amin’ny ran’ity Lehilahy ity aho fa raharahanareo.

²⁵Ary hoy ny olona rehetra hoe: Aoka ny rany ho aminay sy ny zanakay.

²⁶Dia nanafaka an’i Barabasy ho an’ny olona izy; fa Jesosy kosa dia nasainy nokaravasina ary natolony mba hohomboina amin’ny hazofijaliana.

²⁷Ary ny miaramilan’ny governora dia nitondra an’i Jesosy ho ao anaty lapa sady nanangona ny miaramila namany rehetra ho eo Aminy.

²⁸Ary nanala ny akanjon’i Jesosy izy ireo dia nampitafy Azy lamba jaky.

²⁹Dia nandrandrana satroka tsilo ho Azy izy ireo ka nasatrony ny lohany, ary nampitanany volotara ny tanany havanana dia nandohalika teo anatrehany izy ireo ka naneso Azy hoe: Arahaba, ry Mpanjakan’ny Jiosy*!

³⁰Dia nororany Izy, ary nalainy ny volotara ka nokapohiny ny lohany.

³¹Rehefa naneso Azy avy izy ireo dia nanala ilay lamba jaky Taminy ka nampiakanjo Azy indray, ary noentiny mba hohomboana amin’ny hazofijaliana Izy.

³²Ary raha nandeha izy ireo dia nahita lehilahy kireniana iray, Simona no anarany, izy io no notereny hitondra ny hazofijalian’i Jesosy.

³³Rehefa tonga teo amin’ny toerana antsoina hoe Golgota, izany hoe Ikarandoha,

³⁴dia nomeny divay miharo ranon’afero Izy hosotroiny; nefa nony nanandrana izany Izy dia tsy nety nisotro.

³⁵Ary rehefa voahombony tamin’ny hazofijaliana Izy dia nataony antsapaka no fizara ny fitafiany.

³⁶Ary nipetraka ry zareo ka niambina Azy teo.

³⁷Ary napetany teo ambonin’ny lohany ny soratra milaza ny nanamelohana Azy hoe: ITY NO JESOSY, MPANJAKAN’NY JIOSY.

³⁸Ary nisy jiolahy roa nohomboina niaraka Taminy, ny iray dia teo amin’ny ankavanany ary ny iray dia teo amin’ny ankaviany.

³⁹Ary izay nandalo dia niteny ratsy Azy sady nihifikifi-doha

⁴⁰no niteny hoe: Ry Ilay mandrava ny tempoly sy manangana azy amin’ny hateloana, vonjeo ny tenanao. Raha Zanak’Andriamanitra Ianao, midìna hiala amin’ny hazofijaliana.

⁴¹Ary naneso toy izany koa ny lehiben’ny mpisorona mbamin’ny mpanoradalàna* sy ny loholona ka niteny hoe:

⁴²Novonjeny ny sasany fa ny tenany dia tsy hainy vonjena. Mpanjakan’ny Israely Izy! Aoka hidina hiala amin’ny hazofijaliana Izy ankehitriny dia hino Azy izahay;

⁴³natoky an’Andriamanitra Izy! Aoka Izy hamonjy Azy ankehitriny, raha ankasitrahany (Sal 22.8), satria hoy Izy: Zanak’Andriamanitra Aho.

⁴⁴Ary nandatsa Azy toy izany koa ireo jiolahy niaraka nohomboina Taminy.

⁴⁵Hatramin’ny ora fahenina ka hatramin’ny ora fahasivy dia maizina ny tany manontolo.

⁴⁶Ary nony tokony ho tamin’ny ora fahasivy dia niantso tamin’ny feo mahery Jesosy hoe: Elỳ, Elỳ, lamà sabaktàny? Izany hoe: Andriamanitro ô, Andriamanitro ô, nahoana no dia mahafoy Ahy Ianao (Sal 22.1)?

⁴⁷Ary ny sasany tamin’izay nijanona teo, raha nandre izany, dia nilaza hoe: Miantso an’i Elia Ilehio.

⁴⁸Ary niaraka tamin’izay dia nihazakazaka ny iray tamin’izy ireo ka nandray sipaonjy, ary rehefa natsobony tamin’ny vinaingitra izany dia notohiziny tamin’ny volotara ka natohony hotsentsefin’i Jesosy.

⁴⁹Fa ny sasany kosa dia niteny hoe: Aoka hoe hojerentsika na ho avy hamonjy Azy i Elia na tsia.

⁵⁰Ary rehefa niantso tamin’ny feo mahery indray Jesosy dia nanolotra ny fanahiny.

⁵¹Dia indro ny efitra lamba tao amin’ny tempoly fa triatra nizara roa hatrany ambony ka hatrany ambany; nihorohoro koa ny tany ka nitresaka ny vatolampy;

⁵²ary nisokatra ny fasana ka maro ny fatin’ny olona masina izay efa nodimandry no natsangana,

⁵³dia nivoaka avy tao amin’ny fasana ireny taorianan’ny nitsanganan’i Jesosy ka nankao amin’ny Tanàna Masina sady niseho tamin’ny olona maro.

⁵⁴Ary ny kapiteny sy ireo niaraka taminy niambina an’i Jesosy, raha nahita ny horohoron-tany mbamin’izay zava-niseho teo, dia raiki-tahotra indrindra ka niteny hoe: Marina tokoa fa Zanak’Andriamanitra io Lehilahy io.

⁵⁵Ary nisy vehivavy maro nitsinjo teny lavitra teny, dia ireo izay nanaraka an’i Jesosy hatrany Galilia ka nanompo Azy.

⁵⁶Isan’ireny i Maria Magdalena sy i Maria, renin’i Jakoba, ary i Josesy sy ny renin’ny zanak’i Zebedio.

⁵⁷Nony hariva ny andro dia tonga ny lehilahy mpanankarena iray, avy any Arimatia, Josefa no anarany, ary izy koa dia mpianatr’i Jesosy.

⁵⁸Nankao amin’i Pilato izany lehilahy izany ka nangataka ny fatin’i Jesosy. Dia nasain’i Pilato nomena azy izany.

⁵⁹Ary rehefa nalain’i Josefa ny faty ka nofonosiny lamba hariry madinika madio

⁶⁰dia naleviny tao amin’ny fasany vaovao izay efa nolavahany tao amin’ny vatolampy; ary rehefa nanakodia vato lehibe ho eo amin’ny varavaran’ny fasana izy dia lasa nandeha.

⁶¹Ary teo i Maria Magdalena sy ilay Maria hafa ka nipetraka tandrifin’ny fasana.

⁶²Nony ampitson’ny andro fiomanana dia nivory teo amin’i Pilato ny lehiben’ny mpisorona sy ny Fariseo*

⁶³ka niteny hoe: Tompoko, tsaroanay fa iny mpamitaka iny, fony Izy mbola velona, dia nilaza hoe: Raha afaka hateloana dia hitsangana Aho.

⁶⁴Koa asaivo ambenana tsara ny fasana mandra-pahatongan’ny andro fahatelo, fandrao avy ny mpianany ka hangalatra Azy dia hilaza amin’ny olona hoe: Efa nitsangana tamin’ny maty Izy; koa ho ratsy ny fitaka farany noho ny voalohany.

⁶⁵Hoy i Pilato: Makà ary mpiambina ka mandehana ary ataovy mafy araka izay hainareo ny fiambenana.

⁶⁶Nony lasa ireo dia nasainy nambenan’ny mpiambina mafy ny fasana, rehefa avy nasiany tombo-kase ny vato.