Read La Bible en Malgache Matio 3 Bible Online

Matio 3 - La Bible en Malgache bible

Matio 3

¹Ary tamin’izany andro izany dia niseho vahoaka i Jaona Mpanao batisa, nitory tany an-tany efitr’i Jodia* ka nilaza hoe:

²Mibebaha ianareo fa efa akaiky ny fanjakan’ny lanitra.

³Fa izy no ilay nampilazaina an’Isaia mpaminany hoe: «Injany! Misy feon’ny miantso mafy any an-tany efitra hoe: Amboary ny lalan’NY TOMPO, ataovy mahitsy ny lalan-kalehany» (Isa 40.3).

⁴Ny fitafian’i Jaona dia lamba volon-drameva ary fehikibo hoditra no teny aminy; valala sy tantely remby kosa no sakafony.

⁵Ary Jerosalema sy Jodia rehetra mbamin’ny tany rehetra amoron’i Jordana dia nandeha nankany amin’i Jaona

⁶ka nataony batisa tao amin’ny ony Jordana ireny, rehefa niaiky ny fahotany.

⁷Fa nony nahita ny Fariseo* sy ny Sadoseo* maro nanatona mba hatao batisa i Jaona dia hoy izy taminy: Ry taranaky ny menarana, iza no nanoro hevitra anareo handositra ny fahatezerana ho avy?

⁸Koa mamoaza voa mendrika ny fibebahana ianareo;

⁹ary aza mihevitra ny hiteny anakampo hoe: Manana an’i Abrahama ho rainay izahay; fa lazaiko aminareo fa Andriamanitra mahay manangana zanaka ho an’i Abrahama avy amin’ireto vato ireto.

¹⁰Ary indro, efa mipetraka eo amin’ny fototry ny hazo sahady ny famaky; koa ny hazo rehetra izay tsy mamoa voa tsara dia hokapaina ka hatsipy any anaty afo.

¹¹Izaho dia manao batisa anareo amin’ny rano ho amin’ny fibebahana; fa Ilay avy ao aorianako no mahery noho izaho ka tsy mendrika hanaisotra ny kapany aza aho; Izy no hanao batisa anareo amin’ny Fanahy Masina sy ny afo;

¹²eny an-tanany ny fikororohany, Izy hanadio tsara ny eo am-pamoloany ka hanangona ny variny ho any an-tsompitra; fa ny akofa sy ny mololo dia hodorany amin’ny afo tsy mety maty.

¹³Ary tamin’izay Jesosy dia avy tany Galilia ka tonga teo amoron’i Jordana, dia nanatona an’i Jaona Izy mba hataony batisa.

¹⁴Fa nandà Azy i Jaona ka niteny hoe: Izaho no tokony hataonao batisa ka Ianao indray va no mankaty amiko?

¹⁵Nefa namaly azy Jesosy hoe: Ekeo ihany ankehitriny, fa izao no mety amintsika mba hahatanteraka ny fahamarinana rehetra. Dia nekeny Izy.

¹⁶Ary raha vao vita batisa Jesosy dia niakatra avy tao amin’ny rano avy hatrany; ary indro, nisokatra Taminy ny lanitra, ary hitany ny Fanahin’Andriamanitra nidina tahaka ny voromailala nankeo amboniny.

¹⁷Ary injao nisy feo avy tany an-danitra hoe: Ity no Zanako malalako izay sitrako.