Read La Bible en Malgache Matio 5 Bible Online

Matio 5 - La Bible en Malgache bible

Matio 5

¹Ary Jesosy, nony nahita ny vahoaka, dia niakatra teo an-tendrombohitra; rehefa tafapetraka Izy dia nanatona Azy ny mpianany.

²Dia nanomboka niteny Izy ka nampianatra azy ireo hoe:

³Sambatra ny mahantra am-panahy, fa azy ny fanjakan’ny lanitra.

⁴Sambatra ny malahelo, fa izy no hampaherezina.

⁵Sambatra ny malemy fanahy, fa izy no handova ny tany (Sal 37.11).

⁶Sambatra ny noana sy mangetaheta ny fahamarinana, fa izy no hovokisana.

⁷Sambatra ny mpamindra fo, fa izy no hamindrana fo.

⁸Sambatra ny madio am-po, fa izy no hahita an’Andriamanitra.

⁹Sambatra ny mpampihavana, fa izy no hatao hoe zanak’Andriamanitra.

¹⁰Sambatra izay enjehina noho ny fahamarinana, fa azy ny fanjakan’ny lanitra.

¹¹Sambatra ianareo, raha haratsin’ny olona sy enjehiny ary asiany izay teny ratsy rehetra hitenenany lainga anareo noho ny Amiko.

¹²Mifalia sy miravoravoa ianareo, fa lehibe ny valim-pitianareo any an-danitra; fa toy izany ihany no nanenjehany ny mpaminany izay talohanareo.

¹³Ianareo no fanasin’ny tany; fa raha ny sira no tonga matsatso, inona indray no hahasira azy? Tsy misy heriny hanaovana na inona na inona intsony izy, fa hariana any ivelany ka hohitsahin’ny olona.

¹⁴Ianareo no fahazavan’izao tontolo izao. Tsy azo afenina izay tanàna miorina eo an-tampon-tendrombohitra.

¹⁵Ary koa, tsy misy olona mandrehitra jiro ka mametraka azy ao ambanin’ny vata famarana, fa apetrany eo amin’ny fitoeran-jiro izany mba ho fanazavana ho an’izay rehetra ao an-trano.

¹⁶Aoka hazava eo imason’ny olona toy izany koa ny fahazavanareo mba hahitany ny asa tsara ataonareo ka hankalazany ny Rainareo izay any an-danitra.

¹⁷Aza ataonareo fa tonga Aho handrava ny lalàna na ny mpaminany; tsy tonga handrava Aho fa hanatanteraka.

¹⁸Fa lazaiko aminareo marina tokoa: Mandra-pahafoanan’ny lanitra sy ny tany dia tsy hisy ho foana akory ny amin’ny lalàna, na dia iota[6] iray na tsipika kely iray aza, mandra-pahatanterak’izy rehetra.

¹⁹Ary amin’izany na zovy na zovy no mamaha ny iray amin’ireo didy madinika indrindra ireo ka mampianatra ny olona hanao toy izany dia hatao hoe kely indrindra amin’ny fanjakan’ny lanitra izy. Fa na zovy na zovy no mankatò sy mampianatra ireo dia izy no hatao hoe lehibe ao amin’ny fanjakan’ny lanitra.

²⁰Fa lazaiko aminareo: Raha tsy mihoatra noho ny an’ny mpanoradalàna* sy ny Fariseo* ny fahamarinanareo dia tsy hiditra ao amin’ny fanjakan’ny lanitra mihitsy ianareo.

²¹Efa renareo fa voalaza tamin’ny Ntaolo hoe: «Aza mamono olona» (Eks 20.13); ary izay mamono olona dia mendrika hohelohina amin’ny fitsarana.

²²Fa Izaho kosa milaza aminareo hoe: Izay rehetra tezitra amin’ny rahalahiny dia mendrika hohelohina amin’ny fitsarana; ary na zovy na zovy no hilaza amin’ny rahalahiny hoe: Tsy misy saina ianao, dia mendrika hohelohina eo amin’ny Sinedriona; ary na zovy na zovy no hiteny hoe: Adala Ialahy, dia mendrika ho ao amin’ny afobe*.

²³Koa raha mitondra ny fanatitrao ho eo amin’ny alitara ianao, ary eo ianao no mahatsiaro fa manana alahelo aminao ny rahalahinao,

²⁴dia avelao eo anoloan’ny alitara ny fanatitrao ka mandehana aloha mihavana amin’ilay rahalahinao, ary rehefa miverina ianao dia izay vao manolotra ny fanatitrao.

²⁵Mihavàna haingana amin’ilay manana ady aminao raha mbola miara-dia aminy ianao, fandrao ilay manana ady aminao hanolotra anao amin’ny mpitsara, ary ny mpitsara kosa dia hanolotra anao amin’ny mpiambina ka hatao ao an-tranomaizina ianao.

²⁶Lazaiko aminao marina tokoa: Tsy ho afaka ao mihitsy ianao, ambara-pandoanao ny kaodiranta* farany indrindra.

²⁷Efa renareo fa voalaza hoe: «Aza mijangajanga.» (Eks 20.14)

²⁸Fa Izaho kosa milaza aminareo fa izay rehetra mijery vehivavy ka mitsiriritra azy dia efa nijangajanga taminy tao am-pony sahady.

²⁹Fa raha ny masonao havanana no mahatafintohina anao dia esory hiala izy ka ario ho afaka aminao; fa mahasoa anao na very aza ny ampahany iray amin’ny tenanao ka tsy ny tenanao manontolo no hariana any amin’ny afobe*.

³⁰Ary raha ny tananao havanana no mahatafintohina anao dia tapaho izy ka ario ho afaka aminao; fa mahasoa anao na very aza ny ampahany iray amin’ny tenanao ka tsy ny tenanao manontolo no ho lasa ho any amin’ny afobe.

³¹Ary voalaza hoe: Na zovy na zovy no misaotra ny vadiny dia aoka izy hanome an-dRavehivavy taratasy fisaoram-bady (Deo 24.1).

³²Fa Izaho kosa milaza aminareo hoe: Izay rehetra misaotra ny vadiny afa-tsy noho ny fijangajangana ihany dia mampijangajanga azy; ary na zovy na zovy no manambady izay voasaotra dia mijangajanga.

³³Efa renareo koa fa voalaza tamin’ny Ntaolo hoe: «Aza manao fianianana mandainga, fa efao amin’NY TOMPO ny fianiananao» (Lev 19.12).

³⁴Fa Izaho kosa milaza aminareo hoe: Aza mianiana akory: Na amin’ny lanitra, fa sezafiandrianan’Andriamanitra izany;

³⁵na amin’ny tany, fa fitoeran-tongony izany; na amin’i Jerosalema, fa tanànan’ny Mpanjaka lehibe izy io.

³⁶Aza mianiana amin’ny lohanao, fa tsy mahay mahafotsy na mahamainty na dia singam-bolo iray akory aza ianao.

³⁷Fa aoka ny teninareo ho Eny, rehefa eny; Tsia, rehefa tsia; fa izay mihoatra noho izany dia avy amin’ilay ratsy.

³⁸Efa renareo fa voalaza hoe: «Maso solon’ny maso ary nify solon’ny nify» (Eks 21.24).

³⁹Fa Izaho kosa milaza aminareo hoe: Aza manohitra izay manisy ratsy anao; fa na zovy na zovy no mamely tehamaina ny takolakao havanana dia atolory azy koa ny iray.

⁴⁰Ary izay te hiady aminao ka ta haka ny akanjonao dia avelao ho azy koa ny lambanao.

⁴¹Ary na zovy na zovy no hanery anao handeha iray kilaometatra dia mandehana miaraka aminy roa kilaometatra.

⁴²Omeo izay mangataka aminao; aza odian-tsy hita izay te hisambotra aminao.

⁴³Efa renareo fa voalaza hoe: «Tiava ny namanao» (Lev 19.18), ary «mankahalà ny fahavalonao».

⁴⁴Fa Izaho kosa milaza aminareo hoe: Tiava ny fahavalonareo ary mivavaha ho an’izay manenjika anareo

⁴⁵mba ho tonga zanaky ny Rainareo izay any an-danitra ianareo; fa Izy mampiposaka ny masoandrony amin’ny ratsy fanahy sy ny tsara fanahy ary mampilatsaka ny ranonorana amin’ny marina sy ny tsy marina.

⁴⁶Fa raha izay olona tia anareo ihany no tianareo, inona no valim-pitia azonareo? Moa na ny mpamory hetra aza tsy mba manao toy izany koa va?

⁴⁷Ary raha ny rahalahinareo ihany no arahabainareo, inona no ataonareo mihoatra noho ny sasany? Moa na dia ny Jentilisa* aza tsy mba mahavita toy izany ihany va?

⁴⁸Koa amin’izany aoka ianareo ho tanteraka toy ny fahatanterahan’ny Rainareo izay any an-danitra.