Read La Bible en Malgache Matio 9 Bible Online

Matio 9 - La Bible en Malgache bible

Matio 9

¹Niondrana an-tsambokely Izy dia niampita ka tonga tao an-tanànany.

²Ary indro, nisy lehilahy iray malemy, nandry tamin’ny fandriana noentin’ny olona teo Aminy; ary Jesosy, nony nahita ny finoan’ireo, dia niteny tamin’ilay malemy hoe: Matokia, anaka; voavela ny helokao.

³Ary indreo ny mpanoradalàna* sasany dia niteny anakampo hoe: Miteny ratsy ity Lehilahy ity.

⁴Fa Jesosy nahafantatra ny eritreriny dia niteny hoe: Nahoana ianareo no mieritreri-dratsy ao am-ponareo?

⁵Fa inona moa no moramora kokoa, ny miteny hoe: Voavela ny helokao sa ny miteny hoe: Mitsangàna ka mandehana!

⁶Fa mba ho fantatrareo fa ny Zanak’Olona* manana fahefana etỳ ambonin’ny tany hamela heloka; dia hoy Izy tamin’ilay malemy: Mitsangàna, batao ny fandriananao, ka modia any an-tranonao.

⁷Dia nitsangana izy ka lasa nody tany an-tranony.

⁸Raiki-tahotra ny vahoaka nony nahita izany ka nankalaza an’Andriamanitra, izay nanome ny olona fahefana toy izany.

⁹Nony niala teo Jesosy dia nahita lehilahy iray antsoina hoe Matio nipetraka teo am-pamorian-ketra ka hoy Izy taminy: Andeha hanaraka Ahy. Dia nitsangana i Matio ka nanaraka Azy.

¹⁰Ary raha nipetraka nisakafo tao an-trano Izy dia indreo, nisy mpanota sy mpamory hetra maro tonga ka niara-nipetraka tamin’i Jesosy mbamin’ny mpianany.

¹¹Raha nahita izany ny Fariseo* dia niteny tamin’ny mpianatra hoe: Nahoana kosa ny Mpampianatra anareo no miara-komana amin’ny mpamory hetra sy ny mpanota?

¹²Nony nahare izany Jesosy dia niteny hoe: Tsy ny salama no mila mpitsabo fa ny marary.

¹³Fa mandehana ka mianara izay hevitry ny teny hoe: «Famindrampo no sitrako fa tsy fanatitra alatsa-dra» (Hos 6.6); fa tsy tonga hiantso ny marina Aho fa ny mpanota.

¹⁴Dia nankany amin’i Jesosy ny mpianatr’i Jaona ka niteny hoe: Nahoana izahay sy ny Fariseo no mifady hanina matetika, fa ny mpianatrao kosa dia tsy mba mifady?

¹⁵Ary hoy Jesosy taminy: Moa mahay misaona va ny havan’ny mpampakatra raha mbola ao aminy ny mpampakatra? Fa ho avy ny andro izay hanesorana ny mpampakatra hiala aminy, dia amin’izay vao hifady hanina izy.

¹⁶Ary tsy misy olona manampina akanjo tonta amin’ny tapa-damba mbola tsy voasasa; fa ny vaovao izay natampina dia handrovitra ny akanjo ka hiitatra ny triatra.

¹⁷Ary tsy misy manisy divay vaovao ao anaty siny hoditra tonta; raha izany dia ho triatra ny siny hoditra ka ho raraka ny divay sady ho simba ny siny hoditra; fa ny siny hoditra vaovao no asian’ny olona divay vaovao, dia miara-voatahiry izy roa.

¹⁸Raha mbola nilaza izany tamin’izy ireo Izy dia indro, avy ny mpanapaka iray dia niankohoka teo anatrehany sady niteny hoe: Maty vao teo ny zanako vavy; fa andeha re, mametraha ny tananao aminy dia ho velona izy.

¹⁹Dia nitsangana nanaraka azy Jesosy mbamin’ny mpianany.

²⁰Ary indro, nisy vehivavy iray izay efa narary nandeha ra nandritra ny roa amby folo taona, nankao aorianany ka nikasika ny morontongotr’akanjony.

²¹Fa hoy izy anakampo hoe: Na dia ny akanjony ihany aza no ho voakasiko dia ho sitrana aho.

²²Ary Jesosy nihodina ka nahita azy dia niteny hoe: Matokia, ry zanako vavy, ny finoanao no efa nahasitrana anao. Dia sitrana ilay vehivavy tamin’izay ora izay.

²³Ary Jesosy, nony niditra tao an-tranon’ilay mpanapaka ka nahita ny mpitsoka sodina sy ny vahoaka nitabataba,

²⁴dia niteny hoe: Mialà ato ianareo; fa tsy maty Razazavavy fa matory. Dia nihomehy Azy fatratra ny olona.

²⁵Nony efa niala tao ny olona dia niditra Jesosy ka nandray ny tanan-dRazazavavy, dia nifoha izy.

²⁶Ary ny lazan’izany dia niely tamin’izany tany rehetra izany.

²⁷Nony niala teo Jesosy dia nisy jamba roa lahy nanaraka Azy sady niantsoantso hoe: Mamindrà fo aminay, ry Zanak’i Davida ô!

²⁸Ary rehefa niditra tao an-trano Izy dia nanatona Azy ireo jamba; ary hoy Jesosy taminy: Mino va ianareo fa mahay manatanteraka izany Aho? Hoy izy ireo Taminy: Eny, Tompoko.

²⁹Dia nikasika ny masony Izy ka niteny hoe: Tongava aminareo araka ny finoanareo.

³⁰Dia nahiratra ny masony; ary Jesosy namepetra azy ireo mafy hoe: Tandremo mba tsy ho fantatr’olona izao.

³¹Kanjo nony niala teo izy roa lahy dia nampiely ny lazany tamin’izany tany rehetra izany.

³²Ary rehefa lasa ireo dia indro, nisy lehilahy moana iray izay demoniaka noentin’ny olona teo amin’i Jesosy.

³³Rehefa navoaka ny demonia* dia niteny ilay moana; ary gaga ny vahoaka ka niteny hoe: Tsy mbola nisy zava-niseho toy izao tamin’ny Israely.

³⁴Fa hoy kosa ny Fariseo* hoe: Ny lohan’ny demonia no androahany ny demonia.

³⁵Ary Jesosy nandeha nitety ny tanàna rehetra sy ny vohitra, nampianatra tany amin’ny sinagoga sy nitory ny Filazantsaran’ny fanjakana ary nanasitrana ny aretina rehetra mbamin’ny rofy rehetra.

³⁶Ary nony nahita ny vahoaka Jesosy dia nahonena Azy ny fijeriny ireo satria trotraka izy ireo fa nafoy toy ny ondry tsy misy mpiandry.

³⁷Dia hoy Izy tamin’ny mpianany:

³⁸Be ny vokatra fa ny mpiasa no vitsy; koa amin’izany mangataha amin’ny Tompon’ny vokatra mba hampandehanany mpiasa hanangona ny vokatra.