Read La Bible en Malgache Marka 1 Bible Online

Marka 1 - La Bible en Malgache bible

Marka 1

¹Ny niandohan’ny Filazantsaran’i Jesosy Kristy*, Zanak’Andriamanitra.

²Araka izay voasoratra ao amin’Isaia mpaminany hoe: «Indro Aho maniraka ny irako hialoha Anao; izy no hanamboatra ny lalanao» (Mal 3.1);

³«Injany! Misy feon’ny miantso mafy any an-tany efitra hoe: Amboary ny lalan’NY TOMPO, ataovy mahitsy ny lalan-kalehany» (Isa 40.3),

⁴dia niseho i Jaona izay nanao batisa tany an-tany efitra ary nitory ny batisan’ny fibebahana ho famelan-keloka.

⁵Dia nandeha nanatona azy ny tany Jodia* manontolo sy ny mponina tsy an-kanavaka tany Jerosalema ka nataony batisa tao amin’ny ony Jordana ireny rehefa niaiky ny fahotany avy.

⁶I Jaona dia nitafy lamba volon-drameva; fehikibo hoditra no teny aminy ary ny fihinany dia valala sy tantely remby.

⁷Ary nitoriteny izy hoe: Indro, avy ao aorianako Ilay mahery noho izaho ary tsy mendrika hiondrika hamaha ny fehin-kapany akory aza aho.

⁸Izaho dia nanao batisa anareo tamin’ny rano fa Izy kosa hanao batisa anareo amin’ny Fanahy Masina.

⁹Tamin’izany andro izany dia tonga avy tany Nazareta any Galilia Jesosy ka nataon’i Jaona batisa tao Jordana.

¹⁰Ary raha vao niakatra avy tao anaty rano Izy dia hitany ny lanitra nisokatra ary ny Fanahy nidina tahaka ny voromailala ka nankeo Aminy.

¹¹Ary nisy feo avy tany an-danitra niteny hoe: Ianao no Zanako malalako; Ianao no sitrako.

¹²Niaraka tamin’izay dia natosiky ny Fanahy ho any an-tany efitra Izy.

¹³Nitoetra tany an-tany efitra efapolo andro Izy ka nalain’i Satana fanahy. Teo amin’ny bibidia Izy, ary nanompo Azy ireo anjely.

¹⁴Rehefa voasambotra i Jaona dia nankany Galilia Jesosy nitory ny Filazantsaran’Andriamanitra

¹⁵ka nanambara hoe: Efa tonga izao ny fotoana ka efa akaiky ny fanjakan’Andriamanitra. Mibebaha ianareo ka minoa ny Filazantsara.

¹⁶Ary raha nandalo teny amoron’ny Ranomasin’i Galilia Izy dia nahita an’i Simona sy i Andrea, rahalahin’i Simona, nanarato teo amin’ny ranomasina, fa mpanarato izy ireo.

¹⁷Hoy Jesosy taminy: Andeha hanaraka Ahy fa hataoko mpanarato olona ianareo.

¹⁸Dia nandao ny harato niaraka tamin’izay izy ireo ka nanaraka Azy.

¹⁹Ary rehefa nandroso kelikely Izy dia nahita an’i Jakoba, zanak’i Zebedio, sy i Jaona rahalahiny izay teo an-tsambokely koa nanamboatra ny haratony.

²⁰Dia niantso azy ireo niaraka tamin’izay Izy; ary nandao an’i Zebedio rainy mbamin’ny olona nokaramainy tao an-tsambokely izy mirahalahy dia nanaraka an’i Jesosy.

²¹Nankany Kapernaomy izy ireo; ary nony tamin’ny Sabata dia niditra avy hatrany tao amin’ny sinagoga* Jesosy ka nampianatra.

²²Dia talanjona tamin’ny fampianarany ny olona, satria nampianatra azy toy izay manana fahefana Izy fa tsy mba tahaka ny mpanoradalàna*.

²³Tamin’izay indrindra dia nisy olona iray teo amin’ny sinagogany, izay azon’ny fanahy maloto; ary niantso mafy Ralehilahy

²⁴hoe: Moa mifaninona akory izahay sy Ianao, ry Jesosy avy any Nazareta? Avy handringana anay va Ianao? Fantatro fa Ilay Masin’Andriamanitra Ianao!

²⁵Ary Jesosy niteny mafy azy hoe: Mangìna ianao ka mialà aminy.

²⁶Ary nampifanintontsintona ny tenan’ilay marary ny fanahy maloto, dia niantso tamin’ny feo mahery vao niala taminy.

²⁷Dia gaga ny olona rehetra ka nifanontany hoe: Fa ahoana re izao zavatra izao? Fampianarana vaovao misy fahefana izao! Fa ny fanahy maloto aza no didiany dia manaiky Azy.

²⁸Ary ny lazany dia niely niaraka tamin’izay teny amin’ny tontolo manodidina tamin’ny tany rehetra manerana an’i Galilia.

²⁹Fa tamin’izay fotoana izay, raha niala avy tao amin’ny sinagoga* izy ireo, dia niditra tao an-tranon’i Simona sy i Andrea ry Jesosy sy i Jakoba ary i Jaona.

³⁰Ary ny rafozambavin’i Simona dia nandry tao, voan’ny tazo; avy hatrany dia nolazain’izy ireo Taminy izany.

³¹Dia nanatona Jesosy ka nandray ny tanany ary nampitsangana azy ka afaka ny tazony ary nanompo azy ireo izy.

³²Nony hariva ny andro ka nilentika ny masoandro dia noentina tany Aminy ny marary rehetra sy ny demoniaka.

³³Ny tao an-tanàna rehetra dia tafangona teo anoloan’ny varavarana avokoa.

³⁴Ary nanasitrana olona maro izay nararin’ny aretina samihafa Izy sady nandroaka demonia* maro; tsy navelany hiteny ny demonia satria nahafantatra Azy ireny.

³⁵Ary nifoha maraina be Izy dia nandeha nankany an-tany efitra, ary tany Izy no nivavaka.

³⁶Nandeha nitady Azy i Simona sy ny namany,

³⁷koa rehefa nahita Azy izy ireo dia niteny Taminy hoe: Mitady Anao ny olona rehetra.

³⁸Fa hoy kosa Izy taminy: Andeha isika hifindra hankany amin’ny tanàna hafa etỳ amin’ny manodidina mba hitoriako teny any koa; fa izay no nahatongavako.

³⁹Dia nandeha Izy ka nitoriteny tany amin’ny sinagogan’ny olona manerana an’i Galilia sady nandroaka ny demonia*.

⁴⁰Ary nisy boka iray nanatona Azy ka nitaraina taminy sady nandohalika teo anatrehany no niteny taminy hoe: Raha mety Ianao dia afaka manadio ahy.

⁴¹Ary onena azy Jesosy ka nanatsotra ny tanany dia nikasika azy sady niteny taminy hoe: Mety Aho; madiova ianao.

⁴²Ary niaraka tamin’izay dia niala taminy ny habokana ka nadio izy.

⁴³Ary namepetra azy mafy Jesosy sady nampandeha azy avy hatrany

⁴⁴no niteny taminy hoe: Tandremo tsara mba tsy hisy holazainao na amin’iza na amin’iza izao, fa mandehana, misehoa aloha amin’ny mpisorona ka manolora ny fanatitra fanadiovana anao, izay nandidian’i Mosesy ho vavolombelona amin’ireo.

⁴⁵Nefa lasa Ralehilahy ka nanomboka nitantara sy nampiely izay zava-niseho, hany ka tsy nahazo niditra miharihary tao an-tanàna intsony Jesosy fa nitoetra tany ivelany tany amin’ny tany efitra Izy; dia nanatona Azy ny olona avy teny amin’ny manodidina rehetra.