Read La Bible en Malgache Marka 12 Bible Online

Marka 12 - La Bible en Malgache bible

Marka 12

¹Ary nanomboka niteny tamin’ireo tamin’ny alalan’ny fanoharana Izy hoe: Nisy lehilahy iray nanao tanim-boaloboka ka namefy azy manodidina sy nihady lavaka famiazana ary nanorina trano fiambenana, dia nahofany tamin’olona mpiasa tany izany ka lasa nankany an-tany hafa izy.

²Rehefa tonga ny fotoanan’ny vokatra dia naniraka mpanompo iray izy hankany amin’ireo mpiasa tany mba handray ampahany amin’ny vokatry ny tanim-boaloboka.

³Fa nosamborin’ireo ilay mpanompo sady nokapohiny ary nampialainy maina.

⁴Ary naniraka mpanompo hafa indray izy ho any amin’ireo, fa io koa dia noratrain’ireo ny lohany sady nalany baraka.

⁵Ary nandefa iraka iray hafa indray koa izy, fa io indray kosa dia novonoiny ho faty; ary mbola maro koa no nirahiny, fa ny sasany nokapohiny ary ny sasany novonoiny ho faty.

⁶Ary mbola nanana iray izy, dia ny zanany lahy malalany, koa nony farany dia naniraka azy hankany amin’ireo izy sady niteny hoe: Hanaja ny zanako ireo.

⁷Ireo mpiasa tany ireo anefa dia nifampiresaka hoe: Ity no mpandova! Andeha hovonointsika izy dia ho antsika ny lova.

⁸Dia nosamborin’ireo izy ka novonoiny ho faty ary natsipiny teny ivelan’ny tanim-boaloboka.

⁹Koa ahoana ary no hataon’ilay tompon’ny tanim-boaloboka amin’izany? Ho avy izy dia handringana ireo mpiasa tany ka homeny olon-kafa ny tanim-boaloboka.

¹⁰Ary mbola tsy novakinareo va izao Soratra Masina izao: «Ny vato izay nolavin’ny mpanao trano, dia izany no efa natao fehizoro;

¹¹avy tamin’ny TOMPO izao ka mahagaga eo imasontsika?» (Sal 118.22-23)

¹²Ary nitady hisambotra Azy izy ireo, nefa natahotra ny vahoaka satria fantany fa mahakasika azy ireo ny nilazan’i Jesosy ilay fanoharana. Dia nandao an’i Jesosy ny olona ka lasa nandeha.

¹³Ary nisy nandefa iraka hankeo amin’i Jesosy ny sasany tamin’ny Fariseo* sy ny Herodiana mba hamandrika Azy amin’ny teniny.

¹⁴Rehefa tonga ireo dia niteny Taminy hoe: Mpampianatra ô, fantatray fa marina Ianao ka tsy mampiova Anao ny hevitry ny olona ary tsy mba mizaha tavan’olona Ianao fa mampianatra marina ny lalànan’Andriamanitra. Mety va ny mandoa vola hetra ho an’i Kaisara sa tsia? Hanome va izahay sa tsy hanome?

¹⁵Fa Izy nahalala ny fihatsarambelatsihin’ireo ka hoy Izy taminy: Nahoana no maka fanahy Ahy ianareo? Itondray denaria* iray Aho mba hojereko.

¹⁶Dia nitondran’izy ireo Izy. Ary hoy Izy taminy: An’iza io sary sy soratra io? Dia hoy ireo Taminy: An’i Kaisara.

¹⁷Dia hoy Jesosy taminy: Aloavy ho an’i Kaisara izay an’i Kaisara ary ho an’Andriamanitra izay an’Andriamanitra. Dia gaga Taminy izy ireo.

¹⁸Ary nisy Sadoseo* tonga teo Aminy izay milaza fa tsy misy ny fitsanganana amin’ny maty ka nanontany Azy hoe:

¹⁹Mpampianatra ô, i Mosesy dia nanoratra ho antsika hoe: «Raha misy manan-drahalahy maty momba, kanefa mbola velona ny vadiny, dia aoka ny rahalahiny hampakatra an-dRavehivavy ka hiteraka aminy mba hamelo-maso ny rahalahiny» (Deo 25.5).

²⁰Nisy fito mirahalahy. Nampaka-bady ny zokiny dia maty momba.

²¹Nampakatra an-dRavehivavy ny faharoa dia maty momba koa. Ny fahatelo dia toy izany ihany koa.

²²Ary izy fito mirahalahy dia samy maty momba avokoa. Ary faran’izy rehetra dia maty koa Ravehivavy.

²³Koa amin’ny fitsanganan’ny maty, iza amin’izy ireo moa no ho vadin-dRavehivavy? Satria efa samy nanambady azy avokoa izy fito mirahalahy.

²⁴Fa hoy Jesosy taminy: Tsy izao tsy fahafantaranareo ny Soratra Masina sy ny herin’Andriamanitra izao va no mahadiso lalana anareo?

²⁵Fa amin’ny fitsanganana amin’ny maty dia tsy hisy hampaka-bady na havoaka hampakarina fa ho tahaka ny anjely any an-danitra izy.

²⁶Koa momba ny fitsanganan’ny maty, mbola tsy novakinareo va ny ao amin’ny Bokin’i Mosesy, eo amin’ilay teny milaza ny roimemy, dia ny nanaovan’Andriamanitra taminy hoe: «Izaho no Andriamanitr’i Abrahama sy Andriamanitr’Isaka ary Andriamanitr’i Jakoba» (Eks 3.6)?

²⁷Tsy Andriamanitry ny maty Izy fa an’ny velona. Koa tena diso lalana ianareo.

²⁸Dia nanatona an’i Jesosy ny iray tamin’ireo mpanoradalàna* izay nahare azy ireo niady hevitra ka nahita fa namaly azy tsara Izy, dia nanontany Azy hoe: Ny didy manao ahoana moa no voalohany amin’izy rehetra?

²⁹Hoy ny navalin’i Jesosy: Ny voalohany dia izao: «Mihainoa, ry Israely: Ny TOMPO Andriamanitsika no TOMPO tokana;

³⁰koa tiava ny TOMPO Andriamanitrao amin’ny fonao manontolo, amin’ny fanahinao manontolo, amin’ny sainao manontolo ary amin’ny herinao rehetra» (Deo 6.4, 5).

³¹Ary ny faharoa dia izao: «Tiava ny namanao tahaka ny tenanao» (Lev 19.18). Tsy misy didy hafa lehibe noho ireo.

³²Ary hoy ilay mpanoradalàna taminy: Marina izany, Tompoko; tsara ny nilazanao fa iray ihany Andriamanitra ary tsy misy afa-tsy Izy,

³³ary ny ho tia Azy amin’ny fo manontolo, amin’ny saina manontolo, amin’ny hery rehetra, ary ny ho tia ny namana tahaka ny tena, dia mihoatra lavitra noho ny fanatitra dorana manontolo sy ny fanatitra hafa rehetra.

³⁴Rehefa hitan’i Jesosy fa namaly tamim-pahendrena izy dia hoy Izy taminy: Tsy lavitra ny fanjakan’Andriamanitra ianao. Dia tsy nisy sahy nanontany Azy intsony.

³⁵Ary Jesosy, raha nampianatra tao amin’ny tempoly, dia niteny hoe: Ahoana no ilazan’ny mpanoradalàna fa Kristy* dia Zanak’i Davida?

³⁶Kanefa ny tenan’i Davida no nampitenenin’ny Fanahy Masina hoe: «NY TOMPO nilaza tamin’ny Tompoko hoe: Mipetraha Ianao eo ankavanako ambara-panaoko ny fahavalonao ho fitoeran-tongotrao» (Sal 110.1).

³⁷Ny tenan’i Davida no miantso Azy hoe Tompo; koa ahoana ary no maha Zanany Azy? Ary vahoaka betsaka no nihaino Azy tamin-kafaliana.

³⁸Ary hoy Izy tamin’ny fampianarany: Mitandrema ianareo ny amin’ny mpanoradalàna* izay mazoto mandehandeha manao akanjo lava sy te hoarahabain’ny olona eny an-tsena

³⁹ary tia ny fipetrahana eny anoloana ao amin’ny sinagoga* sy ny fitoerana eny anoloana any amin’ny fanasana

⁴⁰ary mandany ny tranon’ny mpitondratena ka manao vavaka lavareny mba ho fisehoana ivelany. Ireo dia hahazo fanamelohana mafimafy kokoa.

⁴¹Ary raha nipetraka tandrifin’ny fandatsahan-drakitra Jesosy dia nandinika ny fandatsaky ny vahoaka vola tao Izy. Maro ny mpanankarena nandatsaka be tao.

⁴²Fa nisy mpitondratena mahantra iray kosa tonga teo ka nandatsaka lepta roa na kaodiranta* iray izany.

⁴³Ary Jesosy niantso ny mpianany hanatona Azy ka niteny taminy hoe: Lazaiko aminareo marina tokoa fa io mpitondratena mahantra io dia nandatsaka be noho izay rehetra nandatsaka tao amin’ny fandatsahan-drakitra;

⁴⁴fa ireo rehetra ireo dia tamin’ny haben’ny fananany no nandatsahany tao; fa izy kosa dia tamin’ny tsy fananany no nandatsahany izay rehetra teo am-pelatanany, dia ny fivelomany rehetra.