Read La Bible en Malgache Marka 15 Bible Online

Marka 15 - La Bible en Malgache bible

Marka 15

¹Ary raha vao maraina ny andro, ireo lehiben’ny mpisorona sy ny loholona ary mpanoradalàna* mbamin’ny Sinedriona* manontolo, dia nivory niara-nihevitra, koa rehefa avy namatotra an’i Jesosy izy dia nitondra Azy ka nanolotra Azy tamin’i Pilato.

²Ary nanontany Azy i Pilato hoe: Ianao va no Mpanjakan’ny Jiosy*? Dia namaly azy Izy hoe: Voalazanao.

³Ary ireo lehiben’ny mpisorona dia niampanga Azy tamin-javatra maro.

⁴Dia nanontany Azy indray i Pilato hoe: Tsy manan-kavaly akory va Ianao? E izao hamaroan’ny zavatra iampangan’izy ireo Anao izao!

⁵Fa tsy namaly intsony Jesosy na dia indraimbava aza, hany ka gaga i Pilato.

⁶Ary isaky ny andro firavoravoana dia manafaka mpifatotra iray izay angatahin’ny vahoaka izy.

⁷Ary nisy iray, ilay antsoina hoe Barabasy, niara-nifatotra tamin’ny mpikomy sasany, izay efa nahafaty olona tamin’ny fikomiana.

⁸Dia niakatra ny vahoaka ka nangataka an’i Pilato hanao araka izay fanaony aminy.

⁹Fa namaly azy ireo i Pilato hoe: Tianareo va raha ny Mpanjakan’ny Jiosy* no hafahako ho anareo?

¹⁰Fantany mantsy fa fialonana no nanoloran’ireo lehiben’ny mpisorona Azy.

¹¹Fa nanome fo ny vahoaka ireo lehiben’ny mpisorona fa aleo, hoy izy ireo, i Barabasy no hafahan’i Pilato.

¹²Dia hoy indray i Pilato: Koa inona ary no hataoko amin’ilay ataonareo hoe Mpanjakan’ny Jiosy?

¹³Dia niantsoantso indray ny vahoaka hoe: Homboy amin’ny hazofijaliana Izy!

¹⁴Ary hoy i Pilato taminy: Fa inona moa no ratsy nataony? Nefa vao mainka niantsoantso izy ireo ka niteny hoe: Homboy amin’ny hazofijaliana Izy!

¹⁵Ary ta hanome fahafaham-po ny vahoaka i Pilato ka nanafaka an’i Barabasy ho azy ireo; fa Jesosy kosa dia natolony mba hokaravasina sy hohomboina amin’ny hazofijaliana.

¹⁶Ary ireo miaramila dia nitondra an’i Jesosy ho ao anatin’ny kianja izay ao anaty rova sady nanangona ny miaramila rehetra iray tarika aminy.

¹⁷Ary nampitafy Azy lamba volomparasy izy ireo sady nandrandrana satroka tsilo ho Azy ka nasatrony ny lohany.

¹⁸Dia niarahaba Azy izy ireo hoe: Arahaba, ry Mpanjakan’ny Jiosy*!

¹⁹Ary nikapoka ny lohany tamin’ny volotara izy ireo sady nandrora Azy ka nandohalika sy niankohoka teo anatrehany.

²⁰Rehefa avy nanao Azy ho fihomehezana izy ireo dia nesoriny Taminy ilay lamba volomparasy ka nampitafiany Azy indray ny akanjony. Dia noentin’ireo hohomboany amin’ny hazofijaliana Izy.

²¹Ary noterena hitondra ny hazofijalian’i Jesosy ny lehilahy iray izay nandalo avy tany an-tsaha, atao hoe Simona kireniana, rain’i Aleksandra sy i Rofosy.

²²Ary Jesosy dia noentin’ireo teo amin’ny toerana atao hoe Golgota, izany hoe, raha adika, Ikarandoha.

²³Dia notolorany divay miharo miora Izy nefa tsy nety nisotro.

²⁴Ary nohomboin’ireo tamin’ny hazofijaliana Izy, dia nataony antsapaka ny fizara ny fitafiany, hahitany izay ho azony avy.

²⁵Tamin’ny ora fahatelo no nanomboany Azy tamin’ny hazofijaliana.

²⁶Ary ny soratra milaza ny nanamelohana Azy dia voasoratra teo amboniny hoe: NY MPANJAKAN’NY JIOSY.

²⁷Ary nisy jiolahy roa nohomboin’izy ireo niaraka Taminy tamin’ny hazofijaliana, ny iray dia teo ankavanany ary ny iray dia teo ankaviany

²⁸Dia tanteraka ny Soratra Masina izay milaza hoe: «Ary natao ho isan’ny mpanota Izy» (Isa 53.12).

²⁹Ary niteny ratsy Azy sady nihifikifi-doha ny mpandalo ka niteny hoe: Akory izay! Ry Ilay maharava ny tempoly sy mahatsangana azy ao anatin’ny hateloana,

³⁰vonjeo ny tenanao ka midìna hiala teo amin’ny hazofijaliana!

³¹Ary toy izany koa no faneson’ireo lehiben’ny mpisorona, fa niresaka izy ireo sy ny mpanoradalàna hoe: Namonjy ny sasany Izy fa ny tenany dia tsy hainy vonjena.

³²Aoka ny Kristy*, Mpanjakan’ny Israely, hidina hiala teo amin’ny hazofijaliana ankehitriny mba ho hitantsika ka hinoantsika! Ary ireo izay niaraka nohomboina Taminy tamin’ny hazofijaliana dia naneso Azy koa.

³³Ary nony tamin’ny ora fahenina dia tonga maizina ny tany rehetra ary naharitra hatramin’ny ora fahasivy izany.

³⁴Ary tamin’ny ora fahasivy dia niantso tamin’ny feo mahery Jesosy ka niteny hoe: Elỳ, Elỳ, lamà sabaktàny? Izany hoe raha adika: «Andriamanitro ô, Andriamanitro ô, nahoana no dia mahafoy Ahy Ianao?» (Sal 22.2)

³⁵Ary ny sasany tamin’ireo izay nanatrika teo raha nandre izany dia niteny hoe: Indro, miantso an’i Elia Izy.

³⁶Ary nisy iray nihazakazaka dia nanatsoboka sipaonjy tamin’ny vinaingitra ka natohiny tamin’ny volotara izany dia natohony hotsentsefin’i Jesosy ary hoy izy: Avelao ho hitantsika na ho avy hampidina Azy i Elia na tsia.

³⁷Jesosy anefa niantso tamin’ny feo mahery dia afaka ny ainy.

³⁸Ary ny efitra lamba tao amin’ny tempoly dia triatra nizara roa hatrany ambony ka hatrany ambany.

³⁹Ary ny kapiteny izay nanatrika nanandrify Azy, raha nahita fa toy izany no nahafaka ny ainy, dia niteny hoe: Marina tokoa fa Zanak’Andriamanitra io Lehilahy io.

⁴⁰Ary nisy vehivavy koa nitsinjo teny lavidavitra eny ary isan’ireny i Maria Magdalena sy i Maria, renin’i Jakoba kely, ary i Josesy sy i Salome;

⁴¹ireo dia nanaraka Azy ka nanompo Azy fony Izy tany Galilia; tao koa ireo vehivavy maro izay niara-niakatra Taminy tany Jerosalema.

⁴²Nony hariva ny andro, satria andro fiomanana, dia ny andro alohan’ny Sabata*,

⁴³dia avy i Josefa avy any Arimatia, lehilahy manankaja izay isan’ny Sinedriona* sady niandry ny fanjakan’Andriamanitra koa. Sahy niditra tao amin’i Pilato izy nangataka ny fatin’i Jesosy.

⁴⁴Ary gaga i Pilato raha maty sahady Jesosy ka niantso ny kapiteny hankao aminy izy ka nanontaniany azy raha efa ela ny nahafatesany.

⁴⁵Ary rehefa nandre tamin’ilay kapiteny izy dia nomeny malalaka an’i Josefa ny faty.

⁴⁶Ary nividy lamba hariry madinika i Josefa dia nampidininy ny fatin’i Jesosy ka nofonosiny an’ilay lamba hariry madinika ary napetrany tao amin’ny fasana izay voalavaka tao amin’ny vatolampy, dia nanakodia vato teo amin’ny varavaran’ny fasana izy.

⁴⁷Ary i Maria Magdalena sy i Maria, renin’i Josesy, dia nijery izay nametrahany Azy.