Read La Bible en Malgache Marka 2 Bible Online

Marka 2 - La Bible en Malgache bible

Marka 2

¹Rehefa afaka andro vitsivitsy dia niditra tao Kapernaomy indray Izy. Re fa tao amin’ny trano iray Jesosy,

²ary maro ny olona tafavory tao ka tsy nisy hitoerana intsony na dia teny anoloan’ny varavarana aza. Ary nitoriany teny ireo.

³Dia nisy nanatona nitondra lehilahy malemy ho eo Aminy, marary izay nolanjain’olona efa-dahy.

⁴Ary satria tsy afaka nanakaiky Azy izy ireo noho ny habetsahan’ny vahoaka dia nanesorany ny tafon’ny trano nisy an’i Jesosy ka nony efa voasokatra izany dia nampidininy avy teo ny fandriana izay nandrian’ilay malemy.

⁵Ary Jesosy, nony nahita ny finoan’ireo, dia niteny tamin’ilay malemy hoe: Anaka, voavela ny helokao.

⁶Ary nisy mpanoradalàna* sasany nipetraka teo ka nieritreritra tao am-pony hoe:

⁷Nahoana Ilehity no miteny toy izany? Miteny ratsy Izy. Iza no mahavela heloka afa-tsy Iray ihany, dia Andriamanitra?

⁸Avy hatrany Jesosy dia nahalala tao am-panahiny fa izany no eritreritra tao am-pon’ireo ka hoy Izy taminy: Nahoana ianareo no mieritreritra izany zavatra izany ao am-ponareo?

⁹Inona moa no moramora kokoa, ny milaza amin’ilay malemy hoe: Voavela ny helokao, sa ny milaza hoe: Mitsangàna, batao ny fandriananao ka mandehana?

¹⁰Fa mba ho fantatrareo fa ny Zanak’Olona* dia manana fahefana etỳ ambonin’ny tany hamela heloka, dia hoy Izy tamin’ilay malemy:

¹¹Lazaiko aminao: Mitsangàna, batao ny fandriananao ka modia any an-tranonao.

¹²Dia nitsangana izy ka nibata ny fandrianany niaraka tamin’izay ary niala teo anatrehan’ny olona rehetra; dia talanjona izy rehetra ka nankalaza an’Andriamanitra hoe: Tsy mbola nahita izay toy izao izahay.

¹³Lasa nandeha teny amoron-dranomasina indray Jesosy; ary nanatona Azy ny vahoaka rehetra ka nampianatra azy ireo Izy.

¹⁴Teny am-pandehanana Izy dia nahita an’i Levy, zanak’i Alfeo, nipetraka teo am-pamorian-ketra; koa hoy Izy taminy: Manaraha Ahy. Dia nitsangana izy ka nanaraka Azy.

¹⁵Ary raha nipetraka nisakafo tao an-tranon’i Levy Izy dia maro ny mpamory hetra sy ny mpanota no niara-nipetraka nisakafo tamin’i Jesosy mbamin’ny mpianany, satria maro izy ireo no nanaraka Azy.

¹⁶Ary ny mpanoradalàna*, izay isan’ny Fariseo*, raha nahita Azy niara-nipetraka nisakafo tamin’ny mpanota sy ny mpamory hetra, dia niteny tamin’ny mpianatra hoe: Miara-mihinana sy misotro amin’ny mpamory hetra sy ny mpanota Izy!

¹⁷Raha nahare izany Jesosy dia niteny taminy hoe: Tsy ny salama no mila mpitsabo fa ny marary. Tsy tonga hiantso ny marina Aho fa ny mpanota.

¹⁸Tamin’izany fotoana izany dia nifady hanina ny mpianatr’i Jaona sy ny Fariseo*. Dia avy izy ireo ka niteny tamin’i Jesosy hoe: Nahoana ny mpianatr’i Jaona sy ny mpianatry ny Fariseo no mifady hanina fa ny mpianatrao kosa dia tsy mba mifady?

¹⁹Hoy Jesosy taminy: Afaka mifady hanina va ireo havan’ny mpampakatra raha mbola ao aminy ihany ny mpampakatra? Raha mbola ao aminy ny mpampakatra dia tsy afaka hifady hanina izy.

²⁰Fa ho avy ny andro izay hanalana ny mpampakatra hiala aminy ka amin’izay andro izay vao mifady hanina izy ireo.

²¹Tsy misy olona manjaitra tapa-damba vaovao izay mbola tsy voasasa, amin’ny lamba tonta; fa raha izany, ny vaovao izay natampina, dia handrovitra ny tonta ka hiitatra ny rovitra.

²²Ary tsy misy olona manisy divay vaovao ao anaty siny hoditra tonta; fa raha izany dia hahatriatra ny siny hoditra ny divay ka samy ho very foana ny divay sy ny siny hoditra; fa divay vaovao no hatao ao anaty siny hoditra vaovao.

²³Raha nandeha namakivaky tanimbary iray tamin’ny Sabata Jesosy dia nioty salohim-bary teny am-pandehanana ny mpianany.

²⁴Dia hoy ny Fariseo* Taminy: Jereo, nahoana ireo no manao izay tsy azo atao amin’ny Sabata?

²⁵Fa hoy Izy taminy: Tsy mbola novakinareo va ny teny milaza ilay nataon’i Davida, raha reraky ny hanoanana izy mbamin’izay nanaraka azy?

²⁶Fa niditra tao amin’ny tranon’Andriamanitra tamin’ny andron’i Abiatara mpisoronabe* izy ka nihinana ny mofo atao fanatitra, kanefa io mofo io dia mahadiso raha misy homana azy, afa-tsy ny mpisorona; ary nomeny koa izay nanaraka azy.

²⁷Ary hoy Izy taminy: Ny Sabata no natao ho an’ny olona fa tsy ny olona no natao ho an’ny Sabata,

²⁸koa Tompon’ny Sabata ihany koa ny Zanak’Olona*.