Read La Bible en Malgache Marka 3 Bible Online

Marka 3 - La Bible en Malgache bible

Marka 3

¹Ary niditra tao amin’ny sinagoga* indray Jesosy. Ary indro, nisy lehilahy iray maty tanana tao.

²Ary nijery izay ho fihetsiny ny olona, na hanasitrana an’ilay marary amin’ny Sabata* Izy na tsia, mba hiampangany Azy.

³Dia hoy Jesosy tamin’ilay lehilahy maty tanana: Mitsangàna etsy afovoany.

⁴Ary hoy koa Izy tamin’ny olona: Inona moa no tokony hatao amin’ny Sabata, ny manao soa va sa ny manao ratsy? Ny mamonjy aina va sa ny mamono? Fa tsy nisy niteny ny olona.

⁵Ary nibanjina azy ireo tamim-pahatezerana Izy sady nalahelo noho ny hamafin’ny fony ka hoy Izy tamin-dRalehilahy: Atsory ny tananao. Dia natsotrany ka sitrana ny tanany.

⁶Ary niala tao amin’ny sinagoga ny Fariseo* ka avy hatrany dia nikaon-doha niaraka tamin’ny Herodiana hanohitra an’i Jesosy mba hahafaty Azy.

⁷Ary niala teo Jesosy mbamin’ny mpianany ka nankany amin’ny ranomasina. Nisy olona marobe avy tany Galilia nanaraka Azy, ary nisy olona marobe koa avy tany Jodia*,

⁸Jerosalema, Edoma, avy tany andafin’i Jordana sy ny tany manodidina an’i Tiro sy i Sidona izay nandre izay zavatra nataony ka nankany Aminy.

⁹Ary nilaza tamin’ny mpianany Izy mba hanomana sambokely iray ho Azy noho ny habetsahan’ny vahoaka, mba tsy hifanositosika Aminy ny olona.

¹⁰Fa efa nanasitrana olona maro Izy ka nirohotra nankeo Aminy mba hikasika Azy izay rehetra nanana aretina.

¹¹Ary ny fanahy maloto, raha nahita Azy, dia niankohoka teo anatrehany ka niteny mafy hoe: Ianao no Zanak’Andriamanitra!

¹²Nefa nandrara azy ireo mafy Izy mba tsy hanao izay hahafantarana Azy.

¹³Ary niakatra teo an-tendrombohitra Jesosy ka niantso izay tiany hankeo Aminy, dia nankeo Aminy ireo.

¹⁴Ary nanendry roa amby folo lahy Izy mba ho eo Aminy sy hirahiny hitoriteny

¹⁵sady hanana fahefana handroaka ny demonia*.

¹⁶I Simona dia nomeny anarana hafa koa hoe Petera;

¹⁷i Jakoba, zanak’i Zebedio, sy i Jaona, rahalahin’i Jakoba; izy mirahalahy ireo dia nomeny anarana hafa koa hoe Boanerjesy, izany hoe Zana-baratra;

¹⁸i Andrea, i Filipo, i Bartolomeo, i Matio, i Tomasy, i Jakoba zanak’i Alfeo, i Tadeo, i Simona kananeana[1]

¹⁹ary i Jodasy iskariota, ilay namadika Azy.

²⁰Ary niditra tao amin’ny trano iray Jesosy, dia vory indray ny vahoaka ka tsy afaka nisakafo akory Izy.

²¹Ary ny havany, raha nandre izany, dia tonga mba haka Azy; fa hoy ireo: Efa very saina Izy.

²²Ary ny mpanoradalàna* izay nidina avy tany Jerosalema dia niteny hoe: Manana an’i Belzeboba Izy, ary koa: Ny lohan’ny demonia* no androahany ny demonia.

²³Ary Jesosy niantso azy ireo hankeo Aminy ary nilaza fanoharana taminy hoe: Hataon’i Satana ahoana no fandroaka an’i Satana?

²⁴Raha misy fanjakana miady an-trano dia tsy haharitra izany fanjakana izany.

²⁵Ary raha misy mpiray trano miady an-trano dia tsy haharitra izany mpiray trano izany.

²⁶Ary raha i Satana no mitsangana hanohitra ny tenany ka miady an-trano dia tsy haharitra izy fa ho rava ny heriny.

²⁷Kanefa tsy misy olona afaka miditra ao an-tranon’ny mahery ka handroba ny entany raha tsy afatony aloha ilay mahery dia izay vao robainy ny ao an-tranony.

²⁸Lazaiko aminareo marina tokoa: Hahazo famelan-keloka ny zanak’olombelona amin’ny ota rehetra sy ny fitenenan-dratsy rehetra izay ataony;

²⁹fa izay miteny ratsy ny Fanahy Masina kosa dia tsy hahazo famelan-keloka mandrakizay, fa mendrika hohelohina ny amin’ny ota mandrakizay izy.

³⁰Ny olona mantsy dia niteny hoe: Azom-panahy maloto Izy.

³¹Ary tonga ny reniny mbamin’ireo rahalahiny ka nijanona teo alatrano, dia naniraka olona hankao Aminy hiantso Azy.

³²Ary nipetraka manodidina Azy ny vahoaka ka nilaza Taminy hoe: Indreo, ao alatrano ny reninao sy ireo rahalahinao ary ireo anabavinao mitady Anao.

³³Ary Izy namaly azy ireo hoe: Iza no reniko sy rahalahiko?

³⁴Ary nijery izay nipetraka manodidina Azy Izy ka niteny hoe: Ireto ny reniko sy ny rahalahiko!

³⁵Fa na iza na iza no manao ny sitrapon’Andriamanitra dia izy no rahalahiko sy anabaviko ary reniko.