Read La Bible en Malgache Marka 5 Bible Online

Marka 5 - La Bible en Malgache bible

Marka 5

¹Ary tonga teny ampitan’ny ranomasina tao amin’ny tanin’ny Geraseniana izy ireo.

²Nony niala teo an-tsambokely Izy, avy hatrany dia nifanena Taminy avy tany amin’ny fasana ny lehilahy iray, azom-panahy maloto.

³Teny amin’ny fasana izy io no nitoetra ary tsy nisy olona nahafatotra azy intsony na dia tamin’ny rojo vy aza.

⁴Fa efa nafatotra matetika tamin’ny rojo vy, na ny tanany, na ny tongony; nefa notapahiny ny rojo vy tamin’ny tanany, ary ny rojo vy tamin’ny tongony dia notorotoroiny ka tsy nisy olona nahafolaka azy.

⁵Ary mandrakariva, na andro na alina, dia nitoetra teny amin’ny fasana sy teny an-tendrombohitra izy ka ninananana sady niteti-tena tamin’ny vato.

⁶Fa nony nahatsinjo an’i Jesosy teny lavitra teny izy dia nihazakazaka ka niankohoka teo anatrehany

⁷sady niantso tamin’ny feo mahery hoe: Moa mifaninona akory izaho sy Ianao, ry Jesosy, Zanak’Andriamanitra Avo Indrindra ô? Mangataka Aminao amin’ny anaran’Andriamanitra aho, aza mampijaly ahy!

⁸Satria hoy Jesosy taminy hoe: Mialà amin’ity lehilahy ity, ry fanahy maloto!

⁹Dia nanontany azy Jesosy hoe: Iza moa no anaranao? Ary hoy izy: Legiona no anarako, satria maro izahay.

¹⁰Ary nifona mafy Taminy izy mba tsy horoahiny hiala amin’izany faritany izany.

¹¹Ary nisy andian-kisoa maro, izay niraoka ahitra teny akaikin’ny tendrombohitra.

¹²Ary nifona Taminy ireo fanahy maloto ka niteny hoe: Alefaso izahay ho eny amin’iretsy kisoa iretsy mba hiditra any anatiny.

¹³Dia neken’i Jesosy izany. Ary ny fanahy maloto, rehefa niala tamin’ilay lehilahy, dia niditra tao anatin’ireo kisoa; ary ilay andian-kisoa, izay tokony ho roa arivo ny isany, dia nitratrevatreva teny amin’ny hantsana nankany amin’ny ranomasina ka maty sempotra tany anatin’ny ranomasina ireo.

¹⁴Ary ny mpiandry azy ireo dia nandositra ka nilaza ny zava-nitranga tao an-tanàna sy tany an-tsaha. Dia tonga ny olona mba hizaha izany zavatra izany;

¹⁵ary tonga tany amin’i Jesosy izy ireo ka nandinika ilay demoniaka, izay nisy ny legiona, fa indro izy efa nipetraka sy niakanjo sady ary saina; dia raiki-tahotra ny olona.

¹⁶Ary ireo izay nahita dia nitantara tamin’ny olona izay zava-nitranga tamin’ilay demoniaka sy ny amin’ny kisoa.

¹⁷Ary nifona tamin’i Jesosy izy ireo mba hialany amin’ny faritaniny.

¹⁸Ary rehefa hiondrana ho ao an-tsambokely Jesosy dia nangataka Taminy ilay demoniaka sitrana mba hijanona eo Aminy.

¹⁹Tsy navelan’i Jesosy anefa izy, fa hoy kosa Izy taminy: Modia ihany any an-tranonao, any amin’ny havanao, ka lazao aminy izay zava-dehibe nataon’ny Tompo taminao sy ny namindrany fo taminao.

²⁰Dia nandeha izy ka nitory tany Dekapolisy izay zava-dehibe efa nataon’i Jesosy taminy. Dia gaga ny olona rehetra.

²¹Ary rehefa nita an-tsambokely indray Jesosy ka tonga teny ampita dia nisy vahoaka betsaka tafangona teo Aminy. Ary teo amoron-dranomasina Izy.

²²Dia avy ny mpanapaka ny sinagoga* iray, Jairo no anarany. Rehefa nahita an’i Jesosy izy dia niankohoka teo an-tongony

²³ka niangavy fatratra Taminy hoe: Marary efa ho faty ny zanako vavy kely; andeha re, apetraho aminy ny tananao, mba ho sitrana izy ka ho velona.

²⁴Dia nandeha niaraka taminy Jesosy. Ary nisy vahoaka betsaka nanaraka Azy ka nifanizina Taminy.

²⁵Ary nisy vehivavy iray izay efa narary nandeha ra nandritra ny roa amby folo taona

²⁶sady efa niaritra zavatra be tamin’ny mpitsabo maro ka nandany ny fananany rehetra nefa tsy nety sitrana, fa vao mainka niha narary kokoa aza.

²⁷Rehefa nahare ny amin’i Jesosy izy dia nankao aorianany namakivaky ny vahoaka ary nikasika ny akanjony.

²⁸Fa hoy izy: Na dia ny fitafiany ihany aza no voakasiko dia ho sitrana aho.

²⁹Ary niaraka tamin’izay dia ritra ny loharanon’aretiny ka tsaroany tao amin’ny tenany fa sitrana izy.

³⁰Ary teo no eo dia fantatr’i Jesosy fa nisy hery niala Taminy ka nihodina teo afovoan’ny vahoaka Izy sady niteny hoe: Iza izany nikasika ny akanjoko izany?

³¹Fa hoy ny mpianany taminy: Hitanao izao vahoaka mifanositosika Aminao izao, koa hoy Ianao hoe: Iza no nikasika Ahy?

³²Ary nijery manodidina Izy hahitany ilay nanao izany.

³³Dia raiki-tahotra sady toran-kovitra Ravehivavy satria fantany izay nitranga taminy, koa nankeo Aminy izy sady niankohoka teo anatrehany ary nanambara Taminy ny marina rehetra.

³⁴Ary hoy Izy taminy: Anaka, ny finoanao no nahasitrana anao; mandehana amin’ny fiadanana ary sitràna amin’ny aretinao.

³⁵Raha mbola niteny Jesosy dia nisy olona tonga avy tany amin’ilay mpanapaka ny sinagoga ka nilaza hoe: Efa maty ny zanakao vavy; koa nahoana ianao no mbola manahirana ny Mpampianatra ihany?

³⁶Tsy nahoan’i Jesosy anefa izany teny nataony izany, fa hoy Izy tamin’ilay mpanapaka ny sinagoga: Aza matahotra, minoa fotsiny ihany.

³⁷Ary tsy nisy olona navelany hanaraka Azy afa-tsy i Petera sy i Jakoba ary i Jaona, rahalahin’i Jakoba.

³⁸Dia tonga tao an-tranon’ilay mpanapaka ny sinagoga izy ireo ka hitan’i Jesosy ny fikotaban’ny olona izay nitomany sy ninaonaona be ihany.

³⁹Rehefa niditra Izy dia niteny taminy hoe: Nahoana ianareo no mikorontana sy mitomany? Tsy maty Razazavavy fa matory.

⁴⁰Dia nihomehy Azy fatratra ny olona. Fa nandroaka azy rehetra Izy dia nitondra ny ray aman-drenin’ny zaza mbamin’izay olona teo aminy ka niditra tao amin’izay nisy ny zaza.

⁴¹Dia nandray ny tanan’ilay zaza Izy ka niteny taminy hoe: Talita komỳ, izany hoe, raha adika: Ry zazavavy, hoy Aho aminao: Mitsangàna!

⁴²Dia nitsangana niaraka tamin’izay Razazavavy ka afaka nandeha; fa efa roa amby folo taona izy. Dia talanjona indrindra ny olona.

⁴³Ary Jesosy nandrara azy mafy mba tsy ho fantatr’olona izany; ary nasainy nomena hanina Razazavavy.