Read La Bible en Malgache Marka 7 Bible Online

Marka 7 - La Bible en Malgache bible

Marka 7

¹Ary nivory teo Aminy ny Fariseo* sy ny mpanoradalàna* sasany izay avy tany Jerosalema

²ka nahita ny mpianany sasany misakafo tamin’ny tanana tsy madio, izany hoe, tsy voasasa.

³Fa ny Fariseo sy ny Jiosy* rehetra dia tsy mba misakafo raha tsy efa manasa tsara ny tanany, satria mitana ny fampianarana napetraky ny razana izy.

⁴Ary raha avy any an-tsena izy dia tsy misakafo raha tsy misasa aloha. Ary misy fomba maro hafa koa izay noraisiny ka nofikiriny, dia ny manasa kaopy sy siny, mbamin’izay lovia varahina.

⁵Dia nanontany Azy ny Fariseo sy ny mpanoradalàna hoe: Nahoana ny mpianatrao no tsy manaraka ny fampianarana napetraky ny razana fa misakafo amin’ny tanana tsy voasasa?

⁶Fa hoy Jesosy taminy: Marina ny naminanian’Isaia anareo mpihatsaravelatsihy, araka ny voasoratra hoe: «Ity firenena ity dia manaja Ahy amin’ny molony, fa ny fony kosa dia lavitra Ahy.

⁷Koa foana ny ivavahan’ireo Amiko raha mampianatra didin’olombelona ho fampianarana izy» (Isa. 29.13).

⁸Mahafoy ny didin’Andriamanitra ianareo ka mifikitra amin’ny fomba napetraky ny olona.

⁹Ary hoy koa Izy taminy: Hay, tsara ny nahafoizanareo ny didin’Andriamanitra mba hitandremanareo ny fampianarana napetraka ho anareo!

¹⁰Fa hoy Mosesy: «Manajà ny rainao sy ny reninao» (Eks 20.12), ary koa: «Izay manozona ny rainy sy ny reniny dia hovonoina ho faty tokoa» (Eks 21.17).

¹¹Fa hoy kosa ianareo: Raha misy olona milaza amin’ny rainy na amin’ny reniny hoe: Efa nataoko fanatitra ho an’Andriamanitra izay fanampiana tokony ho anao avy amiko,

¹²dia tsy avelanareo hanao na inona na inona ho an’ny rainy sy ny reniny intsony izy

¹³koa foananareo ny tenin’Andriamanitra amin’ny fampianarana napetraka ho anareo, izay nasainareo hotandremana. Ary zavatra maro mifanahatahaka amin’izany koa no ataonareo.

¹⁴Ary niantso ny vahoaka hankeo Aminy indray Izy ka niteny taminy hoe: Mihainoa Ahy ianareo rehetra ka fantaro.

¹⁵Fa tsy ny zavatra avy eo ivelany izay miditra ao anatin’ny olona no mahaloto azy. Fa izay mivoaka avy ao anatin’ny olona no mahaloto azy.

¹⁶Raha misy manan-tsofina hoenti-mihaino, aoka izy hihaino.

¹⁷Ary rehefa niala teo amin’ny vahoaka Izy ka niditra tao an-trano iray dia nanontany Azy ny mpianany ny amin’izany fanoharana izany.

¹⁸Ary hoy Izy taminy: Hay! Ianareo koa aza mba tsy mahafantatra! Tsy fantatrareo va fa izay rehetra eo ivelan’ny olona ka miditra ao anatiny dia tsy mahaloto azy?

¹⁹Satria tsy miditra ao am-pony izany fa ao an-kibony ihany ka mivoaka any amin’ny toeram-pivoahana. Izany no nolazainy mba hampadio ny sakafo rehetra.

²⁰Ary hoy koa Izy: Izay mivoaka avy ao amin’ny olona, dia izany, no mahaloto azy.

²¹Fa avy ao anatin’ny olona, dia avy ao am-pony, no ivoahan’ny sain-dratsy, dia ny fijangajangana, ny halatra, ny vonoan’olona,

²²ny fakam-badin’olona, ny fitiavan-karena, ny faharatsiam-panahy, ny fitaka, ny fijejojejoana, ny fijery ratsy, ny fitenenan-dratsy, ny avonavona, ny fahadalana.

²³Ireny zavatra ratsy rehetra ireny no mivoaka avy ao anatin’ny olona ka mahaloto azy.

²⁴Ary niala teo Jesosy ka lasa nankany amin’ny sisintanin’i Tiro sy i Sidona. Dia niditra tao amin’ny trano iray Izy, ary tsy tiany ho fantatry ny olona izany; kanefa tsy afaka niery Izy.

²⁵Fa niaraka tamin’izay dia nisy vehivavy iray izay azom-panahy maloto ny zanany vavy kely; nandre ny Aminy izy ka tonga niankohoka teo amin’ny tongony.

²⁶Jentilisa* Ravehivavy, avy amin’ny firenena siro-foinikiana. Nangataka Taminy izy mba handroaka ny demonia* amin’ny zanany vavy.

²⁷Fa hoy Jesosy taminy: Aoka ho voky aloha ny zaza; fa tsy mety raha maka ny mofon-jaza ka manipy azy ho an’ny amboa kely.

²⁸Fa namaly Azy Ravehivavy hoe: Eny, Tompoko; kanefa na dia ny amboa kely ao ambanin’ny latabatra aza dia mba mihinana ny sombintsombin’ny mofon-jaza ihany.

²⁹Dia hoy Jesosy taminy: Noho izany teny izany dia mandehana ianao; efa niala tamin’ny zanakao vavy ny demonia.

³⁰Ary rehefa tonga tany an-tranony Ravehivavy dia hitany nandry teo ambonin’ny farafara ny zanany vavy, ary ny demonia dia efa niala taminy.

³¹Ary niala indray avy tamin’ny faritanin’i Tiro Jesosy dia namakivaky an’i Sidona sy ny faritanin’i Dekapolisy ka nankany amoron’ny ranomasin’i Galilia.

³²Ary nisy marenina sady raiki-dela iray noentin’olona teo Aminy ka niangavy Azy izy ireo mba hametra-tanana aminy.

³³Ary nitondra an-dRalehilahy niala kely ny vahoaka Izy dia nangarona ny sofiny tamin’ny rantsantanany, dia nandrora ka nikasika ny lelany;

³⁴ary niandrandra ny lanitra Izy dia nisento ka niteny taminy hoe: Efata, izany hoe: Maladia!

³⁵Dia nalady ny sofiny sady voavaha ny fatoran’ny lelany ka afaka niteny tsara izy.

³⁶Ary nandrara ny olona teo Jesosy mba tsy hilaza na amin’iza na amin’iza; kanefa na dia norarany aza ireo dia vao mainka nampiely izany bebe kokoa.

³⁷Dia talanjona indrindra ny olona ka niteny hoe: Tsara ny nanaovany ny zavatra rehetra; fa sady mampalady ny marenina Izy no mampiteny ny moana.