Read La Bible en Malgache Marka 8 Bible Online

Marka 8 - La Bible en Malgache bible

Marka 8

¹Tamin’izany andro izany, nony betsaka indray ny vahoaka teo sady tsy nanan-kohanina ireo, dia nantsoin’i Jesosy hanatona Azy ny mpianany ka nilazany hoe:

²Mahonena Ahy ireto vahoaka ireto, fa hateloana izay no nitoerany teto Amiko ka tsy manan-kohanina intsony izy.

³Koa raha hampodiko ho any an-tranony tsy misakafo izy dia ho reraka eny an-dalana sady avy lavitra ny sasany.

⁴Dia namaly Azy ny mpianatra hoe: Aiza no hahazoana mofo hahavoky ireto olona ireto atỳ an-tany efitra atỳ?

⁵Fa nanontany azy Izy hoe: Misy mofo firy ary any aminareo? Dia hoy ireo: Fito.

⁶Dia nasainy nipetraka tamin’ny tany ny vahoaka. Ary nandray ny mofo fito Izy, koa rehefa nisaotra Izy dia novakiny ka natolony ny mpianany mba harosony; dia naroson’izy ireo ny vahoaka izany.

⁷Ary nanana hazandrano madinika vitsy koa izy ireo, koa rehefa nanaovan’i Jesosy fisaorana ireo dia nasainy naroso teny koa.

⁸Dia nihinana ny olona ka voky; ary nangonina ny sombintsombiny sisa tsy lany ka nisy fito sobika.

⁹Tokony ho efatra arivo ireo vahoaka ireo. Dia nasainy nody ireo.

¹⁰Ary niaraka tamin’izay dia niondrana an-tsambokely Izy mbamin’ny mpianany ka tonga tany amin’ny faritanin’i Dalmanota.

¹¹Ary tonga teo ny Fariseo* dia nanomboka niady hevitra Taminy ka nitady famantarana avy any an-danitra mba hakany fanahy Azy.

¹²Ary nisento lalina am-panahy Jesosy ka niteny hoe: Nahoana ity taranaka ity no mitady famantarana? Lazaiko aminareo marina tokoa fa tsy homena famantarana akory ity taranaka ity.

¹³Ary nandao azy ireo Izy dia niondrana indray ka lasa nankeny ampita.

¹⁴Ary nanadino nitondra mofo izy ireo ka tsy nisy afa-tsy mofo iray ihany tao an-tsambokely.

¹⁵Dia nanafatrafatra azy Izy hoe: Diniho ka mitandrema ianareo mba tsy ho azon’ny masirasiran’ny Fariseo* sy ny masirasiran’i Heroda.

¹⁶Dia nifampiresaka izy ireo satria tsy nanana mofo.

¹⁷Ary fantatr’i Jesosy izany dia niteny taminy Izy hoe: Nahoana ianareo no mifampiresaka hoe tsy manana mofo? Tsy mbola azonareo an-tsaina na tsy fantatrareo ihany va? Efa mafy fo va ianareo?

¹⁸Mana-maso nefa tsy mahita va ianareo? Ary manan-tsofina nefa tsy mandre va ianareo? Ary tsy mahatadidy va ianareo

¹⁹fa tamin’ilay namakiako ny mofo dimy ho an’ny dimy arivo, firy harona moa ny sombintsombiny nangoninareo? Hoy ireo Taminy: Roa amby folo.

²⁰Tamin’ilay mofo fito ho an’ny efatra arivo, firy sobika moa ny sombintsombiny nangoninareo? Dia hoy ireo: Fito.

²¹Ary hoy Izy taminy: Mbola tsy azonareo ihany va?

²²Ary lasa nankany Betsaida izy ireo; ary nisy nitondra lehilahy jamba iray teo amin’i Jesosy ka niangaviany Izy mba hikasika ilay jamba.

²³Ary nitantana ilay jamba Izy ka nitondra azy teny ivelan’ny tanàna; ary rehefa nororany ny masony ka napetrany taminy ny tanany dia nanontaniany hoe: Mahita zavatra va ianao?

²⁴Dia nanokatra ny masony ilay jamba ka niteny hoe: Hitako ny olona, nefa tahaka ny hazo mandehandeha no fijeriko azy.

²⁵Dia napetrak’i Jesosy tamin’ny masony indray ny tanany dia nahita tsara Ralehilahy ka sitrana ary hitany mazava tokoa ny zavatra rehetra.

²⁶Ary Jesosy nampody azy ho any an-tranony ka niteny hoe: Aza mankao an-tanàna.

²⁷Ary Jesosy sy ny mpianany dia lasa nankeny amin’ireo tanàna kely miankina amin’i Kaisarian’i Filipo. Nony teny an-dalana dia nanontany ny mpianany Izy hoe: Lazain’ny olona ho iza moa Aho?

²⁸Ary hoy ireo taminy: I Jaona Mpanao batisa; ary hoy ny sasany hoe: I Elia; hoy koa ny sasany hoe: Iray amin’ireo mpaminany.

²⁹Ary Jesosy nanontany azy hoe: Fa ianareo kosa dia milaza Ahy ho iza? Dia namaly i Petera ka niteny taminy hoe: Ianao no Kristy*.

³⁰Ary nandrara azy rehetra Izy mba tsy hiteny ny momba Azy na amin’iza na amin’iza.

³¹Ary nanomboka nampianatra azy ireo Izy fa tsy maintsy hijaly mafy ny Zanak’Olona* ary holavin’ireo loholona sy ireo lehiben’ny mpisorona ary ireo mpanoradalàna* ka hovonoiny, kanefa rehefa afaka hateloana dia hitsangana indray Izy.

³²Ary nambarany mazava tsara izany teny izany. Ary nitondra Azy nihataka kely i Petera dia nanomboka niteny mafy Azy.

³³Fa Izy nitodika dia nijery ny mpianany ka niteny mafy an’i Petera hoe: Mandehana any aorianako, ry Satana! Satria tsy misaina izay an’Andriamanitra ianao fa izay an’ny olona.

³⁴Ary nantsoiny hanatona Azy ny vahoaka mbamin’ny mpianany, dia hoy Izy taminy: Raha misy ta hanaraka Ahy dia aoka izy handa ny tenany sy hitondra ny hazofijaliany ka hanaraka Ahy.

³⁵Fa na iza na iza no ta hamonjy ny ainy dia hahavery izany; ary na iza na iza no hahavery ny ainy noho ny Amiko sy ny Filazantsara dia hahavonjy azy.

³⁶Fa inona moa no soa azon’ny olona raha mahazo izao tontolo izao izy kanefa very ny ainy?

³⁷Ary inona no homen’ny olona ho takalon’ny ainy?

³⁸Fa na iza na iza no ho menatra Ahy sy ny teniko amin’ity taranaka sady mijangajanga no manota ity dia ho menatra azy koa ny Zanak’Olona*, rehefa avy amin’ny voninahitry ny Rainy mbamin’ny anjely masina Izy.