Read La Bible en Malgache Marka 9 Bible Online

Marka 9 - La Bible en Malgache bible

Marka 9

¹Ary hoy koa Izy taminy: Lazaiko aminareo marina tokoa: Misy ny sasany eto izay tsy mba hahita fahafatesana mandra-pahitany ny fanjakan’Andriamanitra tonga amin’ny hery.

²Nony afaka henemana, Jesosy, dia naka an’i Petera sy i Jakoba ary i Jaona ka nitondra azy ireo nitokana, niakatra ho any an-tendrombohitra avo iray. Dia niova tarehy teo anatrehan’izy ireo Izy,

³ary niova ka tonga namirapiratra sady fotsy dia fotsy ny fitafiany ka tsy misy mpanasa lamba ambonin’ny tany mahafotsy lamba toy izany.

⁴Ary niseho tamin’izy ireo i Elia sy i Mosesy izay niresaka tamin’i Jesosy.

⁵Ary niteny tamin’i Jesosy i Petera hoe: Raby ô, tsara raha mitoetra eto isika; ary andeha hanao tranolay telo izahay: Ho Anao ny iray, ho an’i Mosesy ny iray ary ho an’i Elia ny iray.

⁶Tsy fantany mantsy izay hotenenina satria raiki-tahotra izy rehetra.

⁷Ary nisy rahona niseho nanarona azy ireo. Ary nisy feo avy tao amin’ny rahona hoe: Ity no Zanako malalako, Izy no henoy!

⁸Niaraka tamin’izay, nony nijery manodidina izy ireo dia tsy nisy hitany intsony na iza na iza afa-tsy Jesosy irery ihany izay teo aminy.

⁹Ary nony nidina avy teny an-tendrombohitra izy ireo dia nandrara azy Jesosy mba tsy hilazalaza amin’olona izay zavatra efa hitany mandra-pitsangan’ny Zanak’Olona* amin’ny maty.

¹⁰Ary nitana izany teny izany izy ireo ka niady hevitra ny amin’izay hevitr’izany fitsanganana amin’ny maty izany.

¹¹Ary izy ireo dia nanontany an’i Jesosy hoe: Nahoana no lazain’ny mpanoradalàna* fa tsy maintsy ho avy aloha i Elia?

¹²Dia hoy Izy tamin’izy ireo: I Elia dia tonga mialoha ihany ka mamerina amin’ny laoniny ny zavatra rehetra. Fa ahoana kosa ary no nanoratana ny amin’ny Zanak’Olona*, fa tsy maintsy hijaly mafy Izy sady hatao tsinontsinona?

¹³Nefa lazaiko aminareo: Efa tonga i Elia sady efa nanamparan’ny olona ny sitrapony izy, araka izay voasoratra ny aminy.

¹⁴Nony tonga teo amin’ny mpianatra izy ireo dia nahita vahoaka betsaka nanodidina ny mpianatra izay niady hevitra tamin’ny mpanoradalàna*.

¹⁵Ary niaraka tamin’izay, nony nahita an’i Jesosy ny vahoaka rehetra, dia talanjona ka nihazakazaka nanatona sy niarahaba Azy.

¹⁶Ary nanontany azy ireo Izy hoe: Inona no iadianareo hevitra amin’ireo?

¹⁷Ary nisy iray tamin’ny vahoaka namaly hoe: Mpampianatra ô, nentiko ho etỳ Aminao ny zanako lahy izay manana fanahy moana;

¹⁸ary na aiza na aiza no ihetsehan’izany dia ampihinjitrinjiriny amin’ny tany izy, ary mandoa vory, dia mikitro-nify sady valaka be. Niteny tamin’ny mpianatrao aho mba handroaka izany nefa tsy vitany.

¹⁹Dia hoy ny navalin’i Jesosy azy hoe: Ry taranaka tsy mino, mandra-pahoviana no hitoerako aminareo? Mandra-pahoviana no handeferako aminareo? Ento etỳ Amiko izy.

²⁰Dia noentiny teo Aminy izy. Fa nony nahita an’i Jesosy izy dia nampifanintontsintona ny tenany niaraka tamin’izay ilay fanahy. Dia lavo tamin’ny tany izy sady nitsinkasinkasina sy nandoa vory.

²¹Ary Jesosy nanontany ny rainy hoe: Hatramin’ny oviana izay no nahatongavan’izao taminy? Dia hoy izy: Hatry ny fony izy mbola zaza.

²²Fa nazerany matetika tao anaty afo sy tao anaty rano izy hamonoany azy. Fa raha mba misy hainao re dia mamindrà fo aminay ka vonjeo izahay!

²³Hoy Jesosy taminy: Hainao hoe? Ny zavatra rehetra dia hain’ny mino.

²⁴Ary niaraka tamin’izay dia niantso mafy sady nandrotsa-dranomaso ny rain-drazazalahy ka niteny hoe: Mino aho! Vonjeo aho ho afaka amin’ny tsy finoako!

²⁵Ary nony hitan’i Jesosy fa nihazakazaka nanatona azy ny vahoaka dia niteny mafy ny fanahy maloto Izy hoe: Ry fanahy moana sy marenina! Mandidy anao Aho: Mialà aminy ka aza miditra ao anatiny intsony!

²⁶Ary rehefa ninananana izy sady nampifanintontsintona mafy ilay zazalahy dia niala taminy. Ary efa toy ny maty ilay zazalahy ka nolazain’ny maro hoe maty.

²⁷Fa nandray ny tanany kosa Jesosy ka nampiarina azy dia nitsangana izy.

²⁸Ary rehefa tonga tao an-trano Jesosy dia nanontany Azy mangingina ny mpianany hoe: Nahoana izahay no tsy afaka nandroaka an’iny?

²⁹Ary hoy Izy taminy: Iny karazana iny dia tsy mba azo roahina na amin’inona na amin’inona, afa-tsy amin’ny fivavahana[2] ihany.

³⁰Dia niala teo izy ireo ka nizotra namakivaky an’i Galilia, ary tsy tian’i Jesosy ho fantatry ny olona izany.

³¹Fa nampianatra ny mpianany Izy ka niteny taminy hoe: Ny Zanak’Olona* dia hatolotra eo an-tanan’ny olona ka hovonoiny; ary rehefa maty Izy dia hitsangana rehefa afaka hateloana.

³²Tsy azon’ireo anefa izany teny izany sady natahotra ny hanontany Azy izy.

³³Ary nankany Kapernaomy izy ireo, koa rehefa tonga tao an-trano Jesosy dia nanontany ny mpianany hoe: Inona no niadianareo hevitra teny an-dalana?

³⁴Tsy nisy nahateny anefa izy ireo satria niady hevitra teny an-dalana ny amin’izay lehibe indrindra.

³⁵Rehefa tafapetraka Jesosy dia niantso ny roa amby folo lahy Izy ka niteny taminy hoe: Raha misy te ho voalohany dia aoka izy no ho farany amin’izy rehetra sy ho mpanompon’izy rehetra.

³⁶Ary nandray zaza iray Izy ka nametraka azy teo afovoan’izy rehetra; rehefa notrotroiny ilay zaza dia hoy Izy tamin’ny mpianany:

³⁷Na zovy na zovy no mandray iray amin’itony zaza itony amin’ny anarako dia mandray Ahy; ary na zovy na zovy no mandray Ahy dia tsy Izaho no raisiny fa Ilay naniraka Ahy.

³⁸Ary hoy i Jaona taminy: Mpampianatra ô, nahita olona iray nandroaka demonia* tamin’ny anaranao izahay ka noraranay izy satria tsy nanaraka antsika.

³⁹Fa hoy Jesosy: Aza mandrara azy; fa tsy misy olona izay hanao asa lehibe amin’ny anarako ka hahateny ratsy Ahy eo no eo.

⁴⁰Fa izay tsy manohitra antsika dia momba antsika.

⁴¹Fa na iza na iza no manome anareo rano eran’ny kaopy hosotroinareo satria an’i Kristy* ianareo dia lazaiko aminareo marina tokoa fa tsy ho very ny valim-pitiany.

⁴²Na iza na iza no manafintohina na iray aza amin’ireo madinika mino Ahy ireo dia tsara ho azy raha anantonana vato lehibe fikosoham-bary ny tendany ka hatsipy any anaty ranomasina izy.

⁴³Ary raha ny tananao no mahatafintohina anao dia tapaho izy; fa tsara ho anao ny miditra kilemaina any amin’ny fiainana noho ny manana tanana roa, nefa hariana any amin’ny afobe*, dia any amin’ny afo tsy azo vonoina;

⁴⁴any ny kankany tsy maty ary ny afo tsy mety maty.

⁴⁵Ary raha ny tongotrao no mahatafintohina anao dia tapaho izy; fa tsara ho anao ny hiditra mandringa any amin’ny fiainana noho ny manana tongotra roa, nefa hariana any amin’ny afobe, any amin’ny afo tsy azo vonoina;

⁴⁶any ny kankany tsy maty ary ny afo tsy mety maty.

⁴⁷Ary raha ny masonao no manafintohina anao dia esory hiala izy; fa tsara ho anao ny hiditra toka-maso any amin’ny fanjakan’Andriamanitra noho ny manana maso roa, nefa hariana any amin’ny afobe;

⁴⁸any ny kankany tsy maty ary ny afo tsy mety maty.

⁴⁹Fa samy hosedraina amin’ny afo izy rehetra, ary ny fanatitra rehetra dia samy hosedraina amin’ny fanasina.

⁵⁰Tsara ny sira, kanefa raha tonga matsatso izy, inona indray no hoentinareo mampody ny tsirony? Aoka hisy sira ao anatinareo ary mihavàna tsara ianareo.