Read La Bible en Malgache Lioka 10 Bible Online

Lioka 10 - La Bible en Malgache bible

Lioka 10

¹Taorianan’izany dia nanendry olona hafa koa ny Tompo, fitopolo[9] lahy, ka naniraka azy tsiroaroa hialoha Azy any amin’ny tanàna sy ny toerana rehetra izay nokasainy haleha.

²Ary hoy Izy taminy: Be ny vokatra, fa ny mpiasa no vitsy; koa amin’izany, mangataha amin’ny Tompon’ny vokatra mba handefa mpiasa hanangona ny vokatra.

³Mandehana; indro Aho maniraka anareo tahaka ny zanak’ondry eo ampovoan’ny amboadia.

⁴Aza mitondra kitapom-bola, na kitapom-batsy, na kapa; ary aza miarahaba olona akory eny an-dalana.

⁵Ao amin’izay trano idiranareo dia milazà aloha hoe: Fiadanana ho amin’ity trano ity!

⁶Raha misy zanaky ny fiadanana ao dia hitoetra ao aminy ny fiadanana tononinareo; fa raha tsy izany dia hiverina ho aminareo ihany izany.

⁷Ary mitoera ao amin’izany trano izany ka mihinàna sy misotroa izay zavatra omeny; fa ny mpiasa dia mendrika hahazo ny karamany. Aza mifindrafindra trano.

⁸Ary ao amin’izay tanàna idiranareo, ka mandray anareo ny olona, dia hano izay aroso anareo.

⁹Sitrano izay marary ao ka lazao amin’ny olona hoe: Efa akaiky anareo ny fanjakan’Andriamanitra.

¹⁰Fa ao amin’izay tanàna idiranareo, ka tsy mandray anareo kosa ny olona, dia mankanesa eny amin’ny lalambe ka lazao hoe:

¹¹Ny vovoky ny tanànanareo aza, izay miraikitra amin’ny tongotray, dia ahintsanay ho anareo; nefa aoka ho fantatrareo fa efa akaiky anareo ny fanjakan’Andriamanitra.

¹²Lazaiko aminareo fa ho moramora kokoa ny ho amin’i Sodoma amin’izany andro izany noho ny ho amin’izany tanàna izany.

¹³Lozanao, ry Korazina! Lozanao, ry Betsaida! Fa raha mba tany Tiro sy Sidona no natao ny asa lehibe izay natao teo aminareo, dia ho efa nibebaka ela izy ka nanao akanjo fisaonana sy nipetraka tamin’ny lavenona.

¹⁴Fa ho moramora kokoa ny ho amin’i Tiro sy i Sidona amin’ny andro fitsarana noho ny ho aminareo.

¹⁵Ary ianao, ry Kapernaomy, hasandratra hatrany an-danitra va ianao? Haetry hatrany amin’ny fitoeran’ny maty* ianao.

¹⁶Izay mihaino anareo dia mihaino Ahy; ary izay mandà anareo dia mandà Ahy; ary izay mandà Ahy dia mandà Izay naniraka Ahy.

¹⁷Niverina tamin’ny fifaliana ny fitopolo lahy ka nilaza hoe: Tompo ô, na dia ny demonia* aza dia manaiky anay noho ny anaranao.

¹⁸Fa hoy Jesosy taminy: Izaho nahita an’i Satana nilatsaka avy tany an-danitra tahaka ny varatra.

¹⁹Indro, efa nomeko fahefana hanitsaka menarana sy maingoka sy handresy ny hery rehetra ananan’ny fahavalo ianareo ka tsy hisy hampaninona anareo akory.

²⁰Kanefa aza mifaly ianareo satria manaiky anareo ny fanahy, fa mifalia satria voasoratra any an-danitra ny anaranareo.

²¹Tamin’izany ora izany dia ravoravo tamin’ny Fanahy Masina Jesosy ka niteny hoe: Midera Anao Aho, Raiko ô, Tompon’ny lanitra sy ny tany, fa nafeninao tamin’ny hendry sy ny manan-tsaina izany ka nasehonao tamin’ny zaza madinika; eny, Raiko, fa izany no sitrakao.

²²Ny zavatra rehetra dia natolotry ny Raiko Ahy; tsy misy mahalala ny Zanaka afa-tsy ny Ray ary ny Ray afa-tsy ny Zanaka sy izay tian’ny Zanaka hanehoana Azy.

²³Ary nitodika tamin’ny mpianatra Izy dia nilaza taminy manokana hoe: Sambatra ny maso mahita izay hitanareo.

²⁴Fa lazaiko aminareo fa mpaminany sy mpanjaka maro no naniry hahita izay hitanareo fa tsy nahita, ary naniry hahare izay renareo fa tsy nahare.

²⁵Ary indro, nisy mpahay lalàna iray nitsangana ka naka fanahy an’i Jesosy hoe: Mpampianatra ô, inona no hataoko handovako ny fiainana mandrakizay?

²⁶Ary hoy Izy taminy: Inona no voasoratra ao amin’ny Lalàna? Ahoana no famakianao azy?

²⁷Ary hoy izy hoe: «Tiava NY TOMPO Andriamanitrao amin’ny fonao manontolo sy ny fanahinao manontolo sy ny herinao manontolo ary ny sainao manontolo» (Deo 6.5); ary, «Tiava ny namanao tahaka ny tenanao» (Lev 19.18).

²⁸Dia hoy Jesosy taminy: Marina ny navalinao; ataovy izany dia ho velona ianao.

²⁹Fa izy ta hanamarin-tena ka niteny tamin’i Jesosy hoe: Iza ary no namako?

³⁰Ary Jesosy namaly hoe: Nisy lehilahy iray nidina avy any Jerosalema hankany Jeriko ka nifanojo tamin’ny jiolahy, dia nendahany sady nokapohiny, ary nilaozany, rehefa saika maty.

³¹Ary sendra nisy mpisorona iray nidina tamin’izany lalana izany; ary raha nahita an-dRalehilahy izy dia nandalo azy.

³²Ary toy izany koa ny levita* iray, izay tonga teo, dia nahita azy, nefa nandalo koa.

³³Fa nisy kosa Samaritana* iray nandeha tamin’ny nalehany ka tonga teo aminy, ary nony nahita azy dia onena.

³⁴Dia nanatona izy ka nofeheziny ny feriny sady nasiany diloilo sy divay; dia napetrany teo ambonin’ny borikiny izy ka noentiny ho any amin’ny tranom-bahiny dia nokarakarainy.

³⁵Ary ny ampitson’iny dia naka vola denaria* roa izy ka nomeny ny tompon’ny tranom-bahiny sady hoy izy taminy hoe: Karakarao izy; ary na ohatrinona na ohatrinona no laninao mihoatra noho ireto dia honerako rehefa miverina aho.

³⁶Iza moa amin’izy telo lahy no heverinao ho naman’ilay azon’ny jiolahy?

³⁷Dia hoy izy: Ilay niantra azy. Hoy Jesosy taminy: Mandehana ianao ka mba manaova toy izany koa.

³⁸Raha nandeha izy ireo dia niditra teo amin’ny vohitra iray Jesosy; ary nisy vehivavy iray antsoina hoe Marta, nampiantrano Azy.

³⁹Nanana rahavavy antsoina hoe Maria izy, izay nipetraka teo anilan’ny tongotry ny Tompo ka nihaino ny teniny.

⁴⁰Fa i Marta kosa dia sahirana tamin’ny fanompoana maro; dia avy izy ka niteny hoe: Tompoko, moa tsy mampaninona Anao va ny amelan’ny rahavaviko ahy hanompo irery? Koa teneno izy mba hanampy ahy.

⁴¹Fa ny Tompo namaly azy hoe: Marta, Marta, maro ahina sy maro herehina ianao;

⁴²nefa zavatra iray loha no ilaina; fa i Maria no efa nifidy ny anjara tsara, izay tsy halaina aminy.