Read La Bible en Malgache Lioka 12 Bible Online

Lioka 12 - La Bible en Malgache bible

Lioka 12

¹Tamin’izany, raha niangona ny vahoaka betsaka, an’arivony maro, ka nifanitsa-kitro, dia niteny tamin’ny mpianany aloha Jesosy hoe: Mitandrema ianareo amin’ny masirasiran’ny Fariseo*, dia ny fihatsarambelatsihy.

²Fa tsy misy nafenina izay tsy haseho, na takona izay tsy ho fantatra.

³Koa na inona na inona teneninareo ao amin’ny maizina dia ho re eo amin’ny mazava; ary izay bitsihinareo mangingina ao amin’ny efitrano dia hotorìna eny amin’ny tampon-trano*.

⁴Ary lazaiko aminareo sakaizako hoe: Aza matahotra izay mamono ny tena, nefa aorianan’izany dia tsy mahavita na inona na inona mihoatra noho izany.

⁵Fa hasehoko anareo izay hatahoranareo: Matahora Izay manampahefana hanary any amin’ny afobe*, rehefa nahafaty; eny, hoy Aho aminareo: Matahora Azy.

⁶Tsy asariona* roa va no vidin’ny tsintsina dimy? Nefa tsy misy hadinoina eo anatrehan’Andriamanitra ireny na dia iray akory aza.

⁷Fa na dia ny volon-dohanareo aza dia voaisa avokoa. Aza matahotra; fa mihoatra noho ny tsintsina maro ianareo.

⁸Fa lazaiko aminareo: Na zovy na zovy no manaiky Ahy eo anatrehan’ny olona dia heken’ny Zanak’Olona* izy eo anatrehan’ny anjelin’Andriamanitra;

⁹fa izay mandà Ahy eo anatrehan’ny olona dia holavina kosa izy eo anatrehan’ny anjelin’Andriamanitra.

¹⁰Fa na zovy na zovy no hiteny hanohitra ny Zanak’Olona dia hahazo famelan-keloka; fa izay miteny ratsy ny Fanahy Masina dia tsy mba hahazo famelan-keloka.

¹¹Ary raha entina ho ao amin’ny sinagoga* sy ny mpitsara ary ny manampahefana ianareo dia aza manahy izay havalinareo na izay holazainareo;

¹²fa ny Fanahy Masina no hampianatra anareo amin’izany ora izany izay tokony holazainareo.

¹³Nisy olona iray teo amin’ny vahoaka niteny tamin’i Jesosy hoe: Mpampianatra ô, teneno ny rahalahiko mba hizara lova amiko.

¹⁴Fa hoy Izy taminy: Ralehilahy, iza no nanendry Ahy ho mpitsara na mpizara eo aminareo?

¹⁵Ary hoy Izy tamin’ny olona: Mitandrema ianareo ka miarova tena amin’ny fitiavan-karena; fa ny ain’ny olona dia tsy miankina amin’ny habetsahan’ny zavatra ananany.

¹⁶Dia nilaza fanoharana taminy Izy hoe: Nahavokatra be ny tanin’ny lehilahy manankarena iray.

¹⁷Ary nihevitra tao am-pony izy hoe: Ahoana no hataoko fa tsy manana toerana hamoriako ny vokatro aho?

¹⁸Ary hoy izy: Izao no hataoko: handrava ny trano fitahirizako aho ka hanangana izay lehibe kokoa, ary ao no hamoriako ny variko rehetra sy ny fananako.

¹⁹Dia hilaza amin’ny fanahiko aho hoe: Ry fanahy ô, manana fananana be voatahiry ho amin’ny taona maro ianao; mitsahara, mihinàna, misotroa, mifalia.

²⁰Fa Andriamanitra kosa niteny taminy hoe: Ry adala, anio alina no halaina aminao ny fanahinao, koa ho an’iza izay zavatra noharìnao?

²¹Toy izany izay mihary harena ho an’ny tenany ihany, nefa tsy mba manankarena ny amin’Andriamanitra.

²²Hoy Jesosy tamin’ny mpianany: Noho izany dia lazaiko aminareo hoe: Aza manahy ny amin’ny ainareo, dia izay hohaninareo, na ny amin’ny tenanareo, dia izay hotafinareo.

²³Fa ny aina dia mihoatra noho ny hanina ary ny tena noho ny fitafiana.

²⁴Hevero ny goaika; fa tsy mba mamafy na mijinja ireny; ary tsy manana fitoeran-javatra na trano fitahirizana, nefa Andriamanitra no mamelona azy ireny; tsy mihoatra lavitra noho ny vorona va ianareo?

²⁵Ary iza moa ao aminareo, na dia manahy aza, no mahay manampy ny andro iainany, na dia hakiho* iray aza?

²⁶Koa raha ny kely indrindra aza tsy hainareo, nahoana ianareo no manahy ny amin’ny sisa?

²⁷Hevero ny fanirin’ny voninkazo; tsy mba miasa na mamoly ireny; nefa lazaiko aminareo: Na dia i Solomona teo amin’ny voninahiny rehetra aza tsy mba nitafy tahaka ny iray amin’ireny.

²⁸Koa raha ny ahitra izay any an-tsaha anio, nefa hatao ao am-patana rahampitso, no ampitafin’Andriamanitra toy izany, tsy mainka va ianareo ry kely finoana?

²⁹Koa aza mitady izay hohaninareo na izay hosotroinareo ianareo, ary aza miahiahy foana.

³⁰Fa ny Jentilisa* amin’izao tontolo izao dia fatra-pitady izany rehetra izany; nefa ny Rainareo mahalala fa tokony ho anareo izany zavatra izany.

³¹Kanefa katsaho ny fanjakany; dia hanampy ho anareo izany zavatra izany.

³²Aza matahotra, ry ondry vitsy, fa efa sitraky ny Rainareo ny hanome anareo ny fanjakana.

³³Amidio ny fanananareo ka atolory ho fiantrana, manaova kitapom-bola tsy mety ho tonta ho anareo, dia harena any an-danitra tsy mety ho lany, izay tsy azon’ny mpangalatra atonina sady tsy misy kalalao manimba.

³⁴Fa izay itoeran’ny harenanareo dia ho any koa ny fonareo.

³⁵Aoka hisikina ianareo, ary aoka hirehitra ny jironareo;

³⁶aoka ianareo ho tahaka ny olona izay miandry ny tompony, raha mody avy amin’ny fampakaram-bady izy, koa nony tonga sy mandondòna izy dia vohàny miaraka amin’izay.

³⁷Sambatra ny mpanompo izay ho hitan’ny tompony miambina, raha avy izy. Lazaiko aminareo marina tokoa fa hisikina ny tompony dia hampipetraka azy ireo hisakafo, ary ho avy ka hanompo azy.

³⁸Ary na amin’ny fotoam-piambenana faharoa amin’ny alina izy no tonga na amin’ny fotoam-piambenana fahatelo ka mahita toy izany dia sambatra ireo mpanompo ireo.

³⁹Fantaro izao, fa raha fantatry ny tompon-trano izay ora hiavian’ny mpangalatra dia ho niambina izy ka tsy namela ny tranony hovakina.

⁴⁰Dia miomàna koa ianareo; fa ho avy ny Zanak’Olona* amin’izay ora tsy ampoizinareo.

⁴¹Hoy i Petera: Tompoko, ho anay va no ilazanao izany fanoharana izany sa ho an’ny olona rehetra?

⁴²Hoy ny Tompo: Iza moa no mpitandrin-draharaha mahatoky sy manan-tsaina, izay hotendren’ny tompony hifehy ny mpanompony mba hanome azy anjara sakafo ara-potoana?

⁴³Sambatra ny mpanompo izay ho hitan’ny tompony fa indro, manatanteraka izany, raha avy izy.

⁴⁴Lazaiko aminareo marina fa hotendreny ho mpiandraikitra ny fananany rehetra izy.

⁴⁵Fa raha miteny anakampo kosa izany mpanompo izany hoe: Mbola ho ela ny tompoko vao ho avy; dia mikapoka ny mpanompolahy sy ny mpanompovavy izy sady mihinana sy misotro ka mamo,

⁴⁶dia ho avy ny tompon’izany mpanompo izany amin’ny andro izay tsy ampoiziny sy amin’ny ora izay tsy fantany, dia hofaiziny mafy izy ka homeny anjara any amin’ny tsy mahatoky.

⁴⁷Ilay mpanompo izay mahafantatra ny sitrapon’ny tompony ihany nefa tsy miomana na manatanteraka izay sitraky ny fony dia hokapohina be.

⁴⁸Fa izay tsy nahafantatra kosa ka nanatanteraka izay zavatra tokony hikapohana azy dia hokapohina kely. Fa izay nomena be no hitadiavana be; ary izay nampitahirizina be no hitakina bebe kokoa.

⁴⁹Tonga hanipy afo etỳ ambonin’ny tany Aho; koa toy inona ny faniriako mba hirehetan’izany sahady?

⁵⁰Ary manana batisa hanaovana Ahy batisa Aho; koa toy inona ny tebitebiko ambara-pahatanterany!

⁵¹Heverinareo va fa tonga hanome fihavanana etỳ ambonin’ny tany Aho? Tsia, hoy Aho aminareo fa fampisarahana.

⁵²Fa hatramin’izao dia hisy dimy hisara-tsaina ao amin’ny trano iray, ny telo dia hanohitra ny roa ary ny roa dia hanohitra ny telo.

⁵³Hisara-tsaina ireo, koa ny ray dia hanohitra ny zanakalahy ary ny zanakalahy dia hanohitra ny ray; ny reny dia hanohitra ny zanakavavy ary ny zanakavavy dia hanohitra ny reny; ny rafozam-bavy dia hanohitra ny vinantovaviny, ary ny vinantovavy dia hanohitra ny rafozam-bavy.

⁵⁴Hoy Jesosy tamin’ny vahoaka: Raha mahita rahona miposaka any andrefana ianareo, miaraka amin’izay, dia hoy ianareo: Ho avy ny ranonorana; dia tonga izany.

⁵⁵Ary raha avy any atsimo ny rivotra dia hoy ianareo: Hafana ny andro; dia tonga izany.

⁵⁶Ianareo mpihatsaravelatsihy, ny tarehin’ny tany sy ny lanitra dia hainareo fantarina; fa ahoana kosa no tsy ahaizanareo mamantatra izao andro izao?

⁵⁷Nahoana ianareo no tsy mahay mitsara izay marina?

⁵⁸Fa raha miara-mandeha amin’ny manana ady aminao ianao hanatrika ny lehibe, raha mbola any an-dalana, dia ezaho izay hifanarahanao aminy, fandrao hitondra anao any amin’ny mpitsara izy, ary ny mpitsara dia hanolotra anao amin’ny mpamatotra, ary ny mpamatotra dia hampiditra anao any an-tranomaizina.

⁵⁹Lazaiko aminao fa tsy ho afaka ao ianao, ambara-pandoanao ny kaodiranta* farany indrindra.