Read La Bible en Malgache Lioka 13 Bible Online

Lioka 13 - La Bible en Malgache bible

Lioka 13

¹Tamin’izany andro izany dia nisy ny sasany teo izay nanambara tamin’i Jesosy ny nanjo ireo Galiliana izay naharoharon’i Pilato tamin’ny fanatiny ny rany.

²Fa Jesosy namaly azy hoe: Heverinareo va fa ireny Galiliana ireny no mpanota mihoatra noho ny Galiliana rehetra satria niharan’izany zavatra izany?

³Tsia, hoy Aho aminareo; fa raha tsy mibebaka ianareo rehetra dia ho ringana toy izany koa.

⁴Ary ireny valo amby folo ireny, izay nianjeran’ny tilikambo tao Siloama ka maty, heverinareo va fa mpanota mihoatra noho ny olona rehetra izay monina ao Jerosalema ireny?

⁵Tsia, hoy Aho aminareo; fa raha tsy mibebaka ianareo rehetra dia ho ringana tahaka izany koa.

⁶Nilaza ity fanoharana ity koa Izy hoe: Nisy olona nanana aviavy nambolena teo amin’ny tanim-boalobony; dia nankeo izy nitady voa taminy fa tsy nahita.

⁷Dia hoy izy tamin’ny mpikarakara ny tanim-boaloboka: Indro, efa telo taona izay aho no tonga nitady voa tamin’ity aviavy ity fa tsy nahita; kapao io; nahoana io no manimba ny tany?

⁸Fa namaly ny mpikarakara hoe: Tompoko, avelao ihany izy amin’ity taona ity mandra-pihadiko manodidina azy ka hasiako zezika;

⁹mety mbola hamoa izy; fa raha tsy izany dia hokapainao ihany.

¹⁰Nampianatra tao amin’ny sinagoga* iray Jesosy tamin’ny Sabata*.

¹¹Ary indro, nisy vehivavy izay nanana fanahy mahafarofy nandritra ny valo amby folo taona; nanjoko izy ka tsy afa-nitraka mihitsy.

¹²Rehefa nahita azy Jesosy dia niantso azy ka niteny hoe: Ravehivavy, afaka amin’ny rofinao ianao.

¹³Dia nametraka ny tanany taminy Izy; ary niaraka tamin’izay dia nitraka Ravehivavy ka nankalaza an’Andriamanitra.

¹⁴Tezitra anefa ny mpanapaka ny sinagoga satria nanasitrana tamin’ny Sabata Jesosy ka niteny tamin’ny vahoaka hoe: Henemana no azo anaovan-draharaha; koa mandritra izany no tongava hositranina fa tsy amin’ny andro Sabata.

¹⁵Fa ny Tompo namaly azy hoe: Ry mpihatsaravelatsihy, moa tsy samy mamaha ny ombiny na ny borikiny hiala amin’ny fihinanam-bilona va ianareo amin’ny Sabata ka mitondra azy hisotro rano?

¹⁶Koa ity vehivavy zanak’i Abrahama ity, izay efa nafatotr’i Satana nandritra ny valo amby folo taona, moa tsy tokony hovahana ho afaka amin’izany fatorana izany amin’ny andro Sabata va?

¹⁷Ary raha nilaza izany Izy dia nangaihay izay rehetra nanohitra Azy; fa ny vahoaka rehetra dia nifaly noho ny zavatra malaza rehetra izay nataony.

¹⁸Dia hoy Jesosy: Tahaka ny inona ny fanjakan’Andriamanitra? Ary inona no hanoharako azy?

¹⁹Tahaka ny voantsinapy izy, izay nalain’olona ka namboleny tao an-tanimboly, ary naniry ka tonga hazo; ary ny voromanidina dia nanorina ny akaniny teo amin’ny rantsany.

²⁰Hoy koa Jesosy: Inona no hanoharako ny fanjakan’Andriamanitra?

²¹Tahaka ny masirasira izy, izay nalain’ny vehivavy iray ka nafangarony tamin’ny koba intelon’ny famarana, mandra-pahazon’ny masirasira azy rehetra.

²²Nandeha nitety tanàna sy vohitra Jesosy ka nampianatra sady nandroso hankany Jerosalema.

²³Dia hoy ny olona iray taminy: Tompoko, moa vitsy va no hovonjena? Ary hoy Izy tamin’ny olona:

²⁴Misisiha hiditra amin’ny varavarana ety ianareo; fa hoy Aho aminareo: Maro no hitady hiditra fa tsy ho afaka.

²⁵Raha vao mitsangana ny tompon-trano ka manidy ny varavarana, ary mijanona eo alatrano ianareo ka manomboka mandondòna ny varavarana ka miteny hoe: Tompoko, vohay izahay! Dia hamaly Izy ka hilaza aminareo hoe: Tsy fantatro na avy taiza na avy taiza ianareo;

²⁶ary amin’izay ianareo dia hilaza hoe: Nihinana sy nisotro teo anatrehanao izahay ary nampianatra teny an-dalambenay Ianao.

²⁷Fa Izy hiteny aminareo hoe: Tsy fantatro na avy taiza na avy taiza ianareo; mialà amiko, ianareo rehetra mpanao heloka.

²⁸Any no hisy ny fitomaniana sy ny fikitroha-nify, rehefa mahita an’i Abrahama sy Isaka ary i Jakoba sy ny mpaminany rehetra eo amin’ny fanjakan’Andriamanitra ianareo, fa ianareo kosa dia voaroaka any ivelany.

²⁹Ary ho tonga ny avy any atsinanana sy ny avy any andrefana ary ny avy any avaratra sy ny avy any atsimo ka hipetraka hisakafo eo amin’ny fanjakan’Andriamanitra.

³⁰Ary indro, misy izay farany ho voalohany ary izay voalohany ho farany.

³¹Tamin’izany ora izany indrindra dia nisy Fariseo* sasany nankeo amin’i Jesosy ka niteny taminy hoe: Mandehana Ianao ka mialà eto; fa ta hamono Anao i Heroda.

³²Fa hoy Izy taminy: Mandehana, lazao amin’izany amboahaolo izany hoe: Indro, mandroaka demonia* sy manasitrana Aho anio sy ampitso, ary raha afaka ampitso dia hotanterahina ny Amiko.

³³Kanefa tsy maintsy mandeha ihany Aho anio sy ampitso ary raha afaka ampitso; fa ny mpaminany dia tsy azo vonoina, raha tsy any Jerosalema.

³⁴Ry Jerosalema, ry Jerosalema, izay mamono ny mpaminany sy mitora-bato izay nirahina ho any aminao, impiry Aho no ta hanangona ny zanakao tahaka ny fanòmban’ny akoho ny zanany ao ambanin’ny elany fa tsy nety ianareo!

³⁵Indro, avela ho lao ny tranonareo! Ary lazaiko aminareo: Tsy hahita Ahy intsony ianareo mandra-pilazanareo hoe: «Isaorana anie Izay avy amin’ny anaran’NY TOMPO» (Sal 118.26).