Read La Bible en Malgache Lioka 14 Bible Online

Lioka 14 - La Bible en Malgache bible

Lioka 14

¹Raha niditra mba hisakafo tao an-tranon’ny loholona iray amin’ny Fariseo* Izy tamin’ny Sabata* dia nanara-maso Azy ireo.

²Ary indro, nisy olona manirano iray teo anatrehany.

³Ary hoy Jesosy tamin’ireo mpahay lalàna sy ny Fariseo: Mety va ny manasitrana amin’ny Sabata sa tsia?

⁴Fa tsy nahateny izy ireo. Ary nandray ilay marary Izy dia nanasitrana azy ka nandefa azy handeha.

⁵Ary nilaza tamin’ireo Izy hoe: Iza moa aminareo, raha manana boriky na omby latsaka ao an-davaka fantsakana, no tsy hampakatra azy avy hatrany na dia amin’ny andro Sabata aza?

⁶Ary tsy nahavaly ny amin’izany zavatra izany izy ireo.

⁷Ary nilaza fanoharana tamin’izay nasaina Jesosy, raha nahita azy ireo nifidy ny toerana teny aloha, ka niteny taminy hoe:

⁸Raha misy manasa anao ho any amin’ny fampakaram-bady, aza mipetraka amin’ny toerana eny aloha, fandrao hisy olona nasaina izay mihaja kokoa noho ianao,

⁹ary ho avy izy sy ilay nanasa anao ka hilaza aminao hoe: Omeo toerana io olona io, dia ho menatra ianao ka hifindra ho amin’ny toerana any aoriana indrindra.

¹⁰Fa raha misy manasa anao, mandehana ka mipetraha amin’ny toerana any aoriana indrindra, ary rehefa tonga ilay nanasa anao dia hiteny aminao hoe: Ry sakaiza, mandrosoa etsy alohaloha kokoa; dia hahazo haja eo imason’izay rehetra miara-misakafo aminao ianao.

¹¹Fa izay rehetra manandra-tena no haetry ary izay manetry tena kosa no hasandratra.

¹²Hoy kosa Jesosy tamin’ilay nanasa Azy: Raha manasa olona amin’ny sakafo antoandro na ny sakafo hariva ianao dia aza ny namanao na ny rahalahinao na ny havanao na ny mpiaramonina manankarena no asainao, fandrao hanasa anao koa ireo ka ho voavaliny izay nataonao taminy.

¹³Fa raha manao fanasana ianao dia asao ny mahantra, ny kilemaina, ny mandringa, ny jamba;

¹⁴dia ho sambatra ianao satria tsy mba manana havaly izay nataonao ireo; fa hovalìna kosa ianao amin’ny fitsanganan’ny marina.

¹⁵Ary ny iray tamin’izay niara-nisakafo Taminy dia nandre izany ka niteny taminy hoe: Sambatra izay hisakafo ao amin’ny fanjakan’Andriamanitra.

¹⁶Fa hoy Jesosy taminy: Nisy olona iray nanao fanasana lehibe ka nanasa olona maro.

¹⁷Ary naniraka ny mpanompony izy tamin’ny fotoana fisakafoanana mba hilaza amin’ireo efa nasaina hoe: Andeha, fa efa vonona izao ny fanasana.

¹⁸Fa nitovy saina izy rehetra ka samy niala tsiny. Hoy ny voalohany taminy: Efa nividy tany aho ka tsy maintsy mandeha hizaha azy; miangavy anao aho, ekeo ny fialan-tsiniko.

¹⁹Ary hoy koa ny iray: Efa nividy omby folo aho ka handeha hamantatra azy; miangavy anao aho, ekeo ny fialan-tsiniko.

²⁰Ary hoy koa ny iray: Efa nampaka-bady aho, koa noho izany dia tsy afaka mankany.

²¹Nony tonga ilay mpanompo dia nambarany tamin’ny tompony izany. Dia tezitra ny tompon-trano ka nilaza tamin’ilay mpanompony hoe: Mandehana haingana ho eny amin’ny lalambe sy ny sakeli-dalana eto an-tanàna ka ampidiro ny mahantra sy ny kilemaina, ny jamba sy ny mandringa.

²²Ary hoy ilay mpanompo: Tompoko, efa tanteraka izay nampanaovinao, nefa mbola tsy feno ihany ny trano.

²³Dia hoy ny tompony tamin’ilay mpanompo: Mandehana ho eny amin’ny lalambe sy ny sisim-boly ka tereo ny olona hiditra mba ho feno ny tranoko.

²⁴Fa lazaiko aminareo: Tsy hisy hanandrana ny nahandroko ireny olona nasaiko ireny na dia iray akory aza.

²⁵Nisy vahoaka betsaka niaraka tamin’i Jesosy, dia nitodika Izy ka niteny taminy hoe:

²⁶Raha misy manaraka Ahy ka tsy mankahala ny rainy sy ny reniny, ny vadiny sy ny zanany, ny rahalahiny sy ny anabaviny; eny, ny ainy koa aza, dia tsy azo ekena ho mpianatro izy.

²⁷Na zovy na zovy no tsy mitondra ny hazofijaliana ka tsy manaraka Ahy dia tsy azo ekena ho mpianatro izy.

²⁸Fa iza moa aminareo, raha ta hanangana tilikambo, no tsy mipetraka aloha mihevitra izay ho lany hanaovany izany, na misy hahavitany azy na tsia?

²⁹Fandrao, rehefa mametraka ny fanorenana izy ka tsy mahavita, dia handatsa azy izay rehetra mahita

³⁰ka hilaza hoe: Io olona io dia nanomboka nanorina trano fa tsy nahavita.

³¹Ary iza moa no mpanjaka, raha handeha hiady amin’ny mpanjaka hafa, no tsy mipetraka aloha mba haka hevitra tsara, na ho vitany na tsia, miaraka amin’ny olona iray alina, ny hifanandrina amin’ilay mitondra roa alina?

³²Fa raha tsy izany, raha mbola lavitra ny mpanjaka iray, dia hampitondra teny izy ka hangataka fihavanana.

³³Toy izany koa ianareo rehetra, izay tsy mahafoy izay rehetra anananareo, dia tsy azo ekena ho mpianatro.

³⁴Tsara ny sira; fa raha ny sira no tonga matsatso, inona indray no hahasira azy?

³⁵Tsy mahasoa ny tany na ny zezika izy, fa harian’ny olona. Izay manan-tsofina hoenti-mihaino, aoka izy hihaino.