Read La Bible en Malgache Lioka 16 Bible Online

Lioka 16 - La Bible en Malgache bible

Lioka 16

¹Hoy koa Jesosy tamin’ny mpianatra: Nisy olona mpanankarena iray nanana mpitantana ny fananany; izy io dia nampangain’olona taminy ho mandany ny fananany.

²Dia nampiantso azy izy ka niteny taminy hoe: Inona izao reko momba anao izao? Manaova tatitra ny amin’ny fitantananao ny fananako; fa tsy mahazo mitantana ny fananako intsony ianao.

³Niteny anakampo ilay mpitantana ny fananana hoe: Inona re no hataoko, fa esorin’ny tompoko amin’ny fitantanana ny fananany aho? Ny miasa tany dia tsy tratry ny aiko, ny mangataka dia mahamenatra ahy.

⁴Fantatro izay hataoko, mba hisy handray ahy ho ao an-tranony, rehefa esorina amin’ny fitantanana fananana aho.

⁵Dia niantso izay rehetra nitrosa tamin’ny tompony izy hankao aminy ka nilaza tamin’ny voalohany hoe: Ohatrinona no trosan’ny tompoko aminao?

⁶Ary hoy izy: Diloilo injaton’ny bata*. Dia hoy izy taminy koa: Inty, raiso ny taratasinao, ary mipetraha haingana, ka dimampolo no soraty.

⁷Dia hoy izy tamin’ny iray koa: Ohatrinona kosa no trosa aminao? Vary injaton’ny kora*, hoy izy. Dia hoy izy taminy koa: Inty, raiso ny taratasinao, ka valopolo no soraty.

⁸Ary ny tompony dia nidera ilay mpitantana fananana tsy marina satria nampiseho hakingan-tsaina izy; fa ny zanak’izao tontolo izao dia kinga saina kokoa ny amin’ny karazany noho ny zanaky ny mazava.

⁹Ary hoy Aho aminareo: Aoka ny mamôna[10] tsy marina no hoentinareo mahazo namana, mba horaisin’ireo ho any amin’ny fonenana mandrakizay ianareo, rehefa lany izany.

¹⁰Izay mahatoky amin’ny kely indrindra dia mahatoky koa amin’ny be; ary izay tsy marina amin’ny kely indrindra dia tsy marina koa amin’ny be.

¹¹Koa raha tsy mahatoky amin’ny mamôna tsy marina ianareo, iza no hatoky anareo ny amin’ny tena harena?

¹²Ary raha tsy mahatoky amin’izay an’olona ianareo, iza no hanome anareo izay anareo?

¹³Tsy misy mpanompo mahay manompo tompo roa; fa ny iray dia ho halany ary ny iray dia ho tiany; na ny iray dia hombany ary ny iray dia hohamavoiny. Tsy mahay manompo an’Andriamanitra sy mamôna ianareo.

¹⁴Ary ireo Fariseo* izay fatra-pitia vola, raha nandre izany rehetra izany, dia naneso an’i Jesosy.

¹⁵Dia hoy Jesosy taminy: Mpanamarin-tena eo anatrehan’ny olona ianareo, nefa Andriamanitra mahafantatra ny fonareo; fa izay zavatra heverin’ny olona ho ambony dia fahavetavetana eo anatrehan’Andriamanitra.

¹⁶Ny Lalàna sy ny Mpaminany dia hatramin’i Jaona; hatramin’izany no efa nitoriana ny Filazantsaran’ny fanjakan’Andriamanitra, ary miditra an-keriny izay rehetra miditra ao.

¹⁷Fa ho moramora kokoa ny hahafoanan’ny lanitra sy ny tany noho ny hahafoanan’ny tendron-tsoratra iray monja aza amin’ny Lalàna.

¹⁸Izay rehetra misao-bady ka mampakatra hafa dia mijangajanga; ary izay mampakatra vehivavy voasaotra dia mijangajanga koa.

¹⁹Nisy lehilahy mpanankarena iray niakanjo volomparasy sy lamba rongony fotsy manify sady nanaram-po fatratra isanandro tamin’ny fahafinaretana.

²⁰Ary nisy mahantra ferena iray antsoina hoe Lazarosy napetraka teo anilan’ny vavahadiny;

²¹izy dia naniry mba hihinana izay latsaka avy tamin’ny latabatr’ilay mpanankarena, nefa ny amboa kosa no avy ka nilelaka ny feriny.

²²Ary maty ilay mahantra, dia noentin’ny anjely ho any an-tratran’i Abrahama; ary maty koa ilay mpanankarena, dia nalevina;

²³ary raha nijaly tao amin’ny fitoeran’ny maty* izy ka niandrandra dia nahita an’i Abrahama teny lavitra eny sy i Lazarosy teo an-tratrany.

²⁴Dia niantso izy hoe: Ry Abrahama raiko ô, mamindrà fo amiko! Mba iraho i Lazarosy hanatsoboka ny tendron’ny rantsantanany amin’ny rano mba hampangatsiatsiaka ny lelako; fa fadiranovana aho eto anatin’ity lelafo ity.

²⁵Fa hoy i Abrahama: Anaka, tsarovy fa efa nahazo ny zava-tsoanao ianao tamin’ny andro niainanao, ary i Lazarosy kosa dia ny zava-dratsy; fa ankehitriny dia izy no ampiononina atỳ ary ianao kosa no fadiranovana.

²⁶Ary amin’izany rehetra izany, misy tevana lehibe manelanelana antsika mba tsy ho afa-mita hankeny aminareo izay te hiala etỳ ary tsy ho afa-mita hankety aminay izay eny.

²⁷Dia hoy izy: Mangataka aminao ary aho, ry raiko: Mba iraho i Lazarosy hankany amin’ny tranon’ny raiko,

²⁸fa manana rahalahy dimy aho, ka hilaza tsara amin’izy ireo mba tsy ho tonga atỳ amin’ity fijaliana ity koa izy.

²⁹Fa hoy i Abrahama taminy: Manana an’i Mosesy sy ny mpaminany izy; aoka hihaino azy ireo izy!

³⁰Fa hoy kosa izy: Tsia, ry Abrahama, raiko; fa raha misy avy amin’ny maty hankany aminy dia hibebaka izy.

³¹Fa hoy i Abrahama taminy: Raha tsy mihaino an’i Mosesy sy ny mpaminany izy dia tsy hety hino izy na dia misy mitsangana amin’ny maty aza.