Read La Bible en Malgache Lioka 17 Bible Online

Lioka 17 - La Bible en Malgache bible

Lioka 17

¹Hoy Jesosy tamin’ny mpianany: Tsy maintsy ho avy ny fahatafintohinana; nefa lozan’izay olona mahatonga izany!

²Aleo anantonana vato fikosoham-bary ny vozony ka atsipy any an-dranomasina izy, toy izay hanafintohina na dia ny iray aza amin’ireo madinika ireo.

³Mitandrema ianareo; fa raha manota ny rahalahinao dia teneno mafy izy, koa raha mibebaka izy dia mamelà ny helony.

⁴Ary raha manota aminao impito ao anatin’ny indray andro izy, ary mifona aminao impito kosa hoe: Mibebaka aho, dia mamelà ny helony.

⁵Hoy ny Apostoly tamin’ny Tompo: Ampitomboy ny finoanay.

⁶Fa hoy ny Tompo: Raha manana finoana na dia ohatry ny voantsinapy iray aza ianareo dia azonareo lazaina amin’io voaroihazo io hoe: Miongota, ary maniria any anatin’ny ranomasina, dia hanaiky anareo izy.

⁷Iza moa aminareo no manana mpanompo miasa tany na miandry ondry, koa raha tonga avy tany an-tsaha ilay mpanompo dia hiteny aminy hoe: Avia haingana ka mipetraha hisakafo?

⁸Fa tsy hilaza aminy kosa va izy hoe: Karakarao ny sakafoko ary misikìna ka rosoy sakafo aho, ambara-pitsahatro mihinana sy misotro; fa rehefa vita izany dia izay vao mahazo mihinana sy misotro ianao?

⁹Moa misaotra izany mpanompo izany va izy satria nataony izay nampanaoviny?

¹⁰Dia tahaka izany koa ianareo, rehefa vitanareo izay rehetra nampanaovina anareo, dia mitenena hoe: Mpanompo tsy mahasoa izahay; izay tokony ho nataonay ihany no efa nataonay.

¹¹Rehefa nandeha ho any Jerosalema Jesosy dia nandalo tao anelanelan’i Samaria sy i Galilia.

¹²Ary raha niditra tao amin’ny vohitra iray Izy dia nisy boka folo lahy nifanena Taminy, izay nijanona lavitra Azy.

¹³Ary niantso mafy izy ireo hoe: Ry Jesosy Mpampianatra ô, mamindrà fo aminay!

¹⁴Raha nahita ireo Izy dia niteny hoe: Mandehana, misehoa amin’ny mpisorona. Rehefa lasa izy ireo dia nadio teny am-pandehanana.

¹⁵Ary ny iray tamin’ireo, raha nahita fa sitrana ny tenany, dia niverina ka nankalaza an’Andriamanitra tamin’ny feo mahery

¹⁶sady niankohoka teo amin’ny tongotr’i Jesosy ka nisaotra Azy; izy io dia Samaritana*.

¹⁷Dia hoy Jesosy: Tsy efa voadio avokoa va izy folo lahy? Fa aiza ny sivy?

¹⁸Moa tsy nisy hita niverina hanome voninahitra an’Andriamanitra afa-tsy ity olona hafa firenena ity ihany va?

¹⁹Ary hoy Izy taminy: Mitsangàna, mandehana; ny finoanao no efa nahavonjy anao.

²⁰Nony nanontanian’ireo Fariseo* izay andro hiavian’ny fanjakan’Andriamanitra Jesosy dia namaly azy Izy hoe: Tsy misehoseho no fiavin’ny fanjakan’Andriamanitra.

²¹Ary ny olona dia tsy hiteny hoe: Indro, etỳ! Na, erỳ! Fa indro ny fanjakan’Andriamanitra dia ao aminareo.

²²Hoy Izy tamin’ny mpianatra: Ho avy ny andro hanirianareo hahita ny iray amin’ireo Andron’ny Zanak’Olona* nefa tsy hahita ianareo.

²³Ary hilaza aminareo ny olona hoe: Indro, erỳ! Na: Indro, etỳ! Nefa aza mandeha ianareo na manaraka azy.

²⁴Fa tahaka ny tselatra manelatra hatramin’ny faravodilanitra ka mahazava hatramin’ny farany koa dia ho toy izany ny Zanak’Olona amin’ny androny.

²⁵Fa tsy maintsy mijaly mafy Izy aloha sady holavin’ity taranaka ity.

²⁶Tahaka ny tamin’ny andron’i Noa dia hisy toy izany koa amin’ny andron’ny Zanak’Olona:

²⁷Nihinana ny olona, nisotro, nampaka-bady, navoaka hampakarina, mandra-piavin’ny andro izay nidiran’i Noa tao amin’ny sambofiara, dia tonga ny safodrano ka nandringana azy rehetra.

²⁸Tahaka ny tamin’ny andron’i Lota koa: Nihinana ny olona, nisotro, nividy, nivarotra, namboly, nanangana trano;

²⁹fa tamin’ny andro izay nialan’i Lota avy tao Sodoma dia nisy afo sy solifara nilatsaka avy tany an-danitra ka nandringana azy rehetra.

³⁰Dia ho tahaka izany koa amin’ny andro hampisehoana ny Zanak’Olona.

³¹Amin’izany andro izany, izay eo an-tampon-trano ka ao an-trano ny entany, dia aoka tsy hidina haka izany; ary toy izany koa izay any an-tsaha, aoka tsy hiverina amin’izay efa nilaozany.

³²Tsarovy ny vadin’i Lota.

³³Na zovy na zovy mitady hiaro ny ainy dia hahavery azy ary na zovy na zovy no hahavery ny ainy dia hahatana izany.

³⁴Lazaiko aminareo fa amin’izany alina izany dia hisy roa lahy miray fandriana; ny iray dia horaisina ary ny iray dia havela.

³⁵Hisy roa vavy miara-mitoto vary; ny iray dia horaisina ary ny iray dia havela,

³⁶Hisy roa lahy any an-tsaha; ny iray dia horaisina ary ny iray dia havela.

³⁷Dia nanontany Azy izy ireo hoe: Aiza, Tompoko? Ary hoy Izy taminy: Izay itoeran’ny faty dia any koa no hiangonan’ny voromahery.