Read La Bible en Malgache Lioka 19 Bible Online

Lioka 19 - La Bible en Malgache bible

Lioka 19

¹Rehefa tafiditra tao Jeriko Jesosy dia nandeha namakivaky ny tanàna.

²Ary indro, nisy lehilahy iray antsoina hoe Zakaiosy izay lehiben’ny mpamory hetra sady mpanankarena.

³Nitady hahita izy hoe iza moa Jesosy, kanefa tsy afaka noho ny vahoaka satria fohy izy.

⁴Dia nihazakazaka nialoha izy ka nananika tamin’ny aviavy iray mba hahatazanany an’i Jesosy; fa efa handalo tamin’izany lalana izany Izy.

⁵Rehefa tonga teo Jesosy dia niandrandra ka niteny taminy hoe: Ry Zakaiosy, midìna haingana; fa tsy maintsy mitoetra ao an-tranonao Aho anio.

⁶Dia nidina haingana izy ka nampiantrano Azy sady faly.

⁷Ary raha nahita izany ny rehetra dia nimonomonona ka niteny hoe: Lasa nandeha hiantrano amin’izay lehilahy mpanota Izy.

⁸Fa i Zakaiosy kosa dia nitsangana ka niteny tamin’ny Tompo hoe: Indro Tompoko, ny antsasaky ny fananako, omeko ho an’ny mahantra; ary raha misy zavatr’olona nalaiko tamin’ny fanambakana dia honerako avo efatra heny izany.

⁹Ary hoy Jesosy taminy: Anio no tonga eto amin’ity trano ity ny famonjena, fa izy dia zanak’i Abrahama koa.

¹⁰Fa efa tonga ny Zanak’Olona* hitady sy hamonjy ny very.

¹¹Raha mbola nihaino izany ny olona dia nandroso niteny ihany Jesosy ka nilaza fanoharana, satria efa akaiky an’i Jerosalema Izy ka noheverin’ny olona fa hiseho haingana ny fanjakan’Andriamanitra.

¹²Dia hoy Izy: Nisy olona ambony iray nandeha nankany an-tany lavitra mba handray fahefana hanjaka, dia mbola hiverina.

¹³Dia niantso folo lahy tamin’ny mpanompony izy ary nanome azy mina folo ka niteny taminy hoe: Manaova varotra mandra-piaviko.

¹⁴Fa nankahala azy ny vahoakany, dia nampitondra teny nanaraka azy nilaza hoe: Tsy manaiky hanjakan’iny lehilahy iny izahay.

¹⁵Nony tafaverina avy nandray fahefana hanjaka izy dia nasainy nantsoina hankeo aminy ireo mpanompo izay nomeny izany vola izany mba hahafantarany izay tombony azony.

¹⁶Dia tonga ny voalohany ka niteny hoe: Tompoko, ny mina iray taminao dia efa nahazoana tombony mina folo.

¹⁷Dia hoy izy taminy: Tsara izany, ry mpanompo tsara; satria nahatoky tamin’ny kely indrindra ianao dia manàna fahefana amin’ny tanàna folo.

¹⁸Tonga koa ny iray ka nilaza hoe: Tompoko, ny mina iray taminao dia efa tonga mina dimy.

¹⁹Ary hoy koa izy tamin’io: Mifeheza tanàna dimy koa ianao.

²⁰Fa tonga kosa ny iray ka niteny hoe: Tompoko, inty ny mina taminao, izay notahiriziko voafono tapa-damba.

²¹Fa natahotra anao aho satria olona mila voa tsy ary ianao ka maka izay tsy napetrakao ary mijinja izay tsy nafafinao.

²²Ary hoy ny tompony taminy: Ny vavanao no hitsarako anao, ry mpanompo ratsy fanahy. Fantatrao fa izaho dia olona mila voa tsy ary ka maka izay tsy napetrako ary mijinja izay tsy nafafiko;

²³koa nahoana no tsy napetrakao tamin’ny mpampanjanaka vola ny volako, koa rehefa tonga aho dia ho nandray ny ahy miaraka amin’ny zanany?

²⁴Ary hoy izy tamin’ireo izay nitsangana teo anilany: Alaivo ny mina eny aminy ka omeo ilay manana mina folo.

²⁵Fa hoy ireo taminy: Tompoko, efa manana mina folo izy.

²⁶Lazaiko aminareo: Izay rehetra manana dia homena; fa ny amin’izay tsy manana kosa, na dia izay ananany aza, dia halaina aminy.

²⁷Fa ireo fahavaloko tsy nanaiky hanjakako ireo dia ento atỳ ka vonoy eto anatrehako.

²⁸Rehefa niteny izany Izy dia nandeha nialoha hiakatra ho any Jerosalema.

²⁹Raha nanakaiky an’i Betifaga sy Betania teo an-tendrombohitra atao hoe Oliva Izy dia naniraka roa lahy tamin’ny mpianatra

³⁰ka niteny hoe: Mankanesa amin’iroa vohitra tandrifinareo iroa; ary raha vao miditra ao ianareo dia hisy zana-boriky mifatotra ho hitanareo, izay tsy mbola nitaingenan’olona; vahao izy ka ento atỳ.

³¹Raha misy manontany anareo hoe: Nahoana no vahànareo io? Dia izao no holazainareo: Misy raharaha ilàn’ny Tompo azy.

³²Nony nandeha ireo nirahina dia nahita araka izay nolazainy taminy.

³³Rehefa namaha ny zana-boriky izy dia hoy ireo tompony taminy: Nahoana no vahànareo ny zana-boriky?

³⁴Dia hoy ireo: Misy ilàn’ny Tompo azy.

³⁵Dia nitondra azy ho any amin’i Jesosy izy ireo ary nametraka ny lambany teo ambonin’ny zana-boriky ka nampitaingeniny azy Jesosy.

³⁶Ary raha nandroso Jesosy dia namelatra ny lambany teny an-dalana izy ireo.

³⁷Rehefa nanakaiky Izy ka tonga teo am-pidinana amin’ny tendrombohitra Oliva dia faly avokoa ny mpianatra marobe ka nidera an’Andriamanitra tamin’ny feo mahery noho ny asa lehibe rehetra izay efa hitany

³⁸ka niteny hoe: Isaorana anie ny Mpanjaka, Ilay avy amin’ny anaran’NY TOMPO. Fiadanana any an-danitra ary voninahitra any amin’ny avo indrindra!

³⁹Fa ny Fariseo* sasany, izay teo amin’ny vahoaka, dia niteny Taminy hoe: Mpampianatra ô, rarao ny mpianatrao!

⁴⁰Fa Izy namaly hoe: Lazaiko aminareo fa raha mangina ireo dia ny vato no hiantsoantso.

⁴¹Raha nanakaiky Izy ka nahita ny tanàna dia nitomany azy

⁴²ka niteny hoe: Raha mba nahafantatra mantsy ianao, na anio ihany aza, ny amin’izay momba ny fiadanana! Nefa ankehitriny, nafenina tamin’ny masonao izany.

⁴³Fa ho avy aminao ny andro izay hananganan’ny fahavalonao tovon-tany manodidina anao, dia hihodidina aminao izy ka hanery anao avy amin’ny lafiny rehetra

⁴⁴ary hamongotra anao sy ny zanakao ao aminao izy ka tsy havelany hisy vato mifanongoa eo aminao, ho valin’ny tsy nahafantaranao ny fotoana namangiana anao.

⁴⁵Ary niditra teo amin’ny tempoly Jesosy dia nandroaka izay nivarotra

⁴⁶ka niteny taminy hoe: Voasoratra hoe: «Ny tranoko dia trano fivavahana (Isa 56.7); fa ianareo kosa dia nampiasa azy ho zohy fieren’ny jiolahy» (Jer 7.11).

⁴⁷Ary nampianatra isanandro teo amin’ny tempoly Izy. Fa ireo lehiben’ny mpisorona sy ny mpanoradalàna ary ny loholona dia nitady hahafaty Azy;

⁴⁸nefa tsy hitan’izy ireo izay hatao satria ny vahoaka rehetra dia liana nihaino Azy.