Read La Bible en Malgache Lioka 2 Bible Online

Lioka 2 - La Bible en Malgache bible

Lioka 2

¹Tamin’izany andro izany dia nisy didy navoakan’i Aogosto Kaisara hampanoratra ny anaran’ny vahoaka rehetra amin’ny fanjakany.

²Izany no fanoratana voalohany natao fony i Kirenio nitondra tany Siria.

³Dia samy nankany amin’ny tanànany avy ny rehetra mba hosoratana.

⁴Ary i Josefa koa dia niakatra avy tany Galilia, avy tao an-tanàna Nazareta, hankany Jodia*, ho ao an-tanànan’i Davida, izay atao hoe: Betlehema, satria avy tamin’ny taranak’i Davida sy ny ankohonany izy,

⁵mba hosoratana izy sy i Maria fofombadiny, izay efa bevohoka.

⁶Tamin’ny fotoana naha tany azy ireo no tonga ny andro hiterahan’i Maria.

⁷Dia niteraka ny Lahimatoany izy, ary nohodidininy lamban-jaza ka nampandriany teo amin’ny fihinanam-bilona; fa tsy nisy nitoerany tao amin’ny tranom-bahiny.

⁸Nisy mpiandry ondry tamin’izany faritra izany nitoetra tany an-tsaha niandry ny ondriny tamin’ny alina.

⁹Ary nisy anjelin’ny Tompo nitsangana teo anilan’izy ireo; namirapiratra manodidina azy ny voninahitry ny Tompo ka raiki-tahotra indrindra izy.

¹⁰Ary hoy ny anjely taminy: Aza matahotra; fa indro, milaza teny soa mahafaly aminareo aho, dia fifaliana lehibe izay ho an’ny olona rehetra;

¹¹fa Mpamonjy no teraka ho anareo anio ao an-tanànan’i Davida, dia Kristy* Tompo.

¹²Izao no ho famantarana ho anareo: Ianareo dia hahita Zazakely voahodidina lamban-jaza sady mandry ao am-pihinanam-bilona.

¹³Ary nisy anjely maro be avy any an-danitra niseho tampoka niaraka tamin’ilay anjely teo ka nidera an’Andriamanitra hoe:

¹⁴Voninahitra any amin’ny avo indrindra ho an’Andriamanitra! Ary fiadanana ho etỳ ambonin’ny tany amin’ny olona ankasitrahiny.

¹⁵Tamin’izany, rehefa niala teo aminy ireo anjely ireo ka nankany an-danitra, dia niresaka ireo mpiandry ondry hoe: Andeha isika hankany Betlehema ka hizaha izany zavatra vao tonga izany, izay nampahafantarin’ny Tompo antsika.

¹⁶Dia nandeha haingana izy ireo ka nahita an’i Maria sy i Josefa ary ny Zazakely nandry teo am-pihinanam-bilona.

¹⁷Nony efa nahita izy ireo dia nampiely izay teny nolazaina taminy ny amin’izany Zaza izany.

¹⁸Izay rehetra nandre dia gaga tamin’izay zavatra nolazain’ny mpiandry ondry taminy.

¹⁹Fa i Maria kosa dia nitadidy izany teny rehetra izany ka nieritreritra azy tao am-pony.

²⁰Ary ny mpiandry ondry dia niverina nankalaza sy nidera an’Andriamanitra noho ny zavatra rehetra izay reny sy hitany, araka izay nolazaina taminy.

²¹Rehefa tapitra ny havaloana ka hoforana ny Zaza dia nataony hoe JESOSY ny anarany, araka ilay nolazain’ny anjely, fony tsy mbola torontoronina tao an-kibo Izy.

²²Rehefa tapitra ny andro fidiovany, araka ny lalànan’i Mosesy, dia nitondra Azy niakatra tany Jerosalema izy ireo mba hatolotra ho an’ny Tompo

²³araka ny voasoratra ao amin’ny lalànan’ny Tompo hoe: «Ny lahy voalohan-teraka rehetra dia hatao hoe Masina ho an’NY TOMPO» (Eks 13.2)

²⁴ary mba hanatitra fanatitra araka izay voalaza ao amin’ny lalànan’ny Tompo hoe: «Domohina roa, na zana-boromailala roa.» (Lev 12.8)

²⁵Ary indro, nisy lehilahy iray antsoina hoe Simeona, tao Jerosalema; marina sady mpivavaka tsara io lehilahy io ka niandry ny fampiononana ny Israely; ary ny Fanahy Masina dia tao aminy.

²⁶Efa nambaran’ny Fanahy Masina taminy fa tsy hahita fahafatesana izy mandra-pahitany ny Kristin’ny Tompo.

²⁷Ary noentin’ny Fanahy Masina niditra tao amin’ny tempoly izy; koa rehefa nampidirin’ny ray aman-dreniny Jesosy zaza mba hanatanterahany Aminy izay fomba fanao araka ny lalàna,

²⁸dia nitrotro Azy izy ka nidera an’Andriamanitra hoe:

²⁹Tompo ô, ankehitriny ny mpanomponao dia alefanao amin’ny fiadanana, araka ny teninao.

³⁰Fa ny masoko dia efa nahita ny famonjenao

³¹izay nomaninao teo anatrehan’ny firenena rehetra,

³²dia fahazavana ho fanambaràna amin’ireo firenena sady voninahitry ny Israely olonao.

³³Gaga ny ray aman-dreniny noho ny teny nilazana Azy.

³⁴Ary nitsodrano azy ireo i Simeona ka niteny tamin’i Maria, renin’ny Zaza, hoe: Indro ity Zaza ity no voatendry ho fandavoana sy ho fananganana ny maro ao amin’ny Israely ary ho famantarana holavina,

³⁵koa ny fanahinao aza dia hotsatohana sabatra mba haseho ny hevitry ny fo maro.

³⁶Nisy mpaminanivavy iray koa, dia i Ana, zanakavavin’i Fanoela, avy tamin’ny fokon’i Asera; efa antitra tokoa izy ary efa niara-niaina tamin’ny vadiny nandritra ny fito taona taorianan’ny naha virijiny azy,

³⁷efa mpitondratena tokony ho efatra amby valopolo taona izy ary tsy niala teo amin’ny tempoly fa nanompo andro aman’alina tamin’ny fifadian-kanina sy ny fivavahana.

³⁸Nony niditra izy tamin’izany ora izany dia nisaotra an’Andriamanitra ka nilaza Azy tamin’izay rehetra niandry ny fanavotana an’i Jerosalema.

³⁹Rehefa vitany ny zavatra rehetra araka ny lalànan’ny Tompo dia niverina tany Galilia izy ireo, dia tao Nazareta tanànany.

⁴⁰Ary ny Zaza dia nihalehibe ka nitombo hery sady feno fahendrena; ary ny fahasoavan’Andriamanitra no teo Aminy.

⁴¹Nankany Jerosalema isan-taona ny ray aman-dreniny, rehefa tonga ny andro firavoravoana amin’ny Paska*.

⁴²Koa rehefa roa amby folo taona Jesosy dia niakatra izy ireo, araka ny fanao amin’ny andro firavoravoana.

⁴³Rehefa tapitra izany andro izany ka nody izy ireo, Jesosy zaza, dia mbola nijanona tany Jerosalema ihany, nefa tsy fantatry ny ray aman-dreniny izany;

⁴⁴koa satria noheveriny fa niaraka tamin’ireo izay niara-dia taminy Izy dia nandeha lalana indray andro izy vao nitady Azy tamin’ny havany sy ny olom-pantany.

⁴⁵Nony tsy nahita Azy izy ireo dia niverina ho any Jerosalema nitady Azy.

⁴⁶Rehefa afaka hateloana dia hitany tao amin’ny tempoly Izy, nipetraka teo afovoan’ny mpampianatra ka nihaino sady nanontany azy.

⁴⁷Dia talanjona izay rehetra nandre Azy noho ny fahalalany sy ny famaliany.

⁴⁸Ary raha nahita Azy izy ireo dia gaga ka hoy ny reniny taminy: Anaka, nahoana no nanao izao taminay Ianao? E izato alahelonay sy ny rainao nitady Anao!

⁴⁹Fa hoy Izy taminy: Nahoana no nitady Ahy ianareo? Tsy fantatrareo va fa tsy maintsy ho eto amin’ny tranon[3]’ny Raiko Aho?

⁵⁰Nefa tsy azon’izy ireo ny teny izay nolazainy taminy.

⁵¹Dia niara-nidina taminy nankany Nazareta Izy ka nanoa azy. Ary ny reniny dia nitahiry izany teny rehetra izany tao am-pony.

⁵²Ary Jesosy nitombo fahendrena sy tena ary fahasoavana teo amin’Andriamanitra sy ny olona.