Read La Bible en Malgache Lioka 20 Bible Online

Lioka 20 - La Bible en Malgache bible

Lioka 20

¹Indray andro, raha nampianatra ny olona teo amin’ny tempoly Jesosy ka nitory ny Filazantsara, dia nanatona ireo lehiben’ny mpisorona sy mpanoradalàna ary ny loholona

²ka niteny Taminy hoe: Lazao aminay: Fahefana avy aiza no anaovanao izao zavatra izao? Ary iza no nanome Anao izany fahefana izany?

³Dia namaly azy ireo Jesosy hoe: Izaho kosa mba hanontany anareo zavatra iray loha, koa lazao amiko:

⁴Ny batisan’i Jaona avy tany an-danitra va sa avy tamin’ny olona?

⁵Dia nikaon-doha izy ireo ka niteny hoe: Raha holazaintsika mantsy hoe: Avy tany an-danitra, dia hataony hoe: Nahoana no tsy nino azy ianareo?

⁶Fa raha holazaintsika kosa hoe: Avy tamin’ny olona, dia hitora-bato antsika ny vahoaka rehetra satria inoany ho mpaminany i Jaona.

⁷Dia namaly ireo fa tsy fantany izay niaviany.

⁸Ary hoy Jesosy tamin’izy ireo: Izaho kosa tsy hilaza aminareo izay fahefana anaovako izao zavatra izao.

⁹Dia nilaza izao fanoharana izao tamin’ny olona Izy: Nisy olona iray namboly tamin’ny tanim-boaloboka, dia nahofany tamin’olona mpiasa tany izany ka nandeha nitoetra ela tany an-tany lavitra izy.

¹⁰Rehefa tonga ny fotoanan’ny vokatra dia naniraka mpanompo hankany amin’ireo mpiasa tany izy mba handray amin’ny vokatry ny tanim-boaloboka; fa nikapoka azy ireo mpiasa tany ka nampandeha azy tanam-polo.

¹¹Dia naniraka mpanompo iray koa izy, izay nokapohin’ireo mafy koa sady nalany baraka ka nampandehaniny tanam-polo.

¹²Dia naniraka fanintelony izy; ary iny koa dia nataony naratra ka noroahiny.

¹³Dia hoy ny tompon’ny tanim-boaloboka: Inona re no hataoko? Haniraka ny zanako malalako aho; angamba hanaja azy izy ireo.

¹⁴Fa raha nahita azy ireo mpiasa tany dia nikaon-doha ka niteny hoe: Ity no mpandova; andeha hovonointsika io mba ho antsika ny lova.

¹⁵Dia namoaka azy tany ivelan’ny tanim-boaloboka izy ireo ka namono azy. Hataon’ny tompon’ny tanim-boaloboka ahoana moa izy ireo amin’izany?

¹⁶Hankany izy, dia hamono ireo mpiasa tany ireo, ka homeny olon-kafa ny tanim-boaloboka. Ary raha nahare izany ireo mpisorona sy mpanoradalàna ary loholona dia niteny hoe: Sanatria izany!

¹⁷Fa Jesosy nijery azy ireo ka niteny hoe: Ahoana moa izao voasoratra izao: «Ny vato izay nolavin’ny mpanao trano, dia izany no efa tonga fehizoro» (Sal 118.22)?

¹⁸Izay rehetra potraka amin’izany vato izany dia ho torotoro; ary na iza na iza no ianjerany dia ho montsamontsana.

¹⁹Ary tamin’izany ora izany dia nitady hisambotra Azy ny mpanoradalàna sy ny lehiben’ny mpisorona; nefa natahotra ny olona izy ireo satria fantany fa ho azy ireo no nilazany izany fanoharana izany.

²⁰Nanara-maso an’i Jesosy izy ireo ka naniraka mpitsikilo, izay mody niseho ho marina, mba hamandrika Azy amin’ny teniny ka hanolorany Azy ho amin’ny hery sy ny fahefan’ny governora.

²¹Ary nanontany Azy izy ireo hoe: Mpampianatra ô, fantatray fa miteny sy mampianatra marina Ianao ka tsy mizaha tavan’olona, fa mampianatra marina ny lalànan’Andriamanitra:

²²Mety va raha mandoa vola hetra ho an’i Kaisara izahay sa tsia?

²³Fa Jesosy nahafantatra ny teti-dratsiny ka niteny taminy hoe:

²⁴Mampisehoa denaria* iray Amiko. An’iza moa io sary sy soratra eo aminy io? Hoy ireo: An’i Kaisara.

²⁵Dia hoy Jesosy taminy: Aloavy ho an’i Kaisara ary izay an’i Kaisara ary ho an’Andriamanitra izay an’Andriamanitra.

²⁶Ary tsy sahiny nitanana Azy teo anatrehan’ny olona izany teny izany, sady gaga izy ireo noho ny famaliny ka nangina.

²⁷Ary ny sasany tamin’ny Sadoseo*, izay milaza fa tsy misy ny fitsanganan’ny maty, dia nanatona ka nanontany Azy hoe:

²⁸Mpampianatra ô, i Mosesy dia nanoratra ho antsika hoe: «Raha misy manana rahalahy maty momba, ka mbola velona ny vadin’ny maty, dia aoka ny rahalahiny hampakatra an-dRavehivavy ka hiteraka hamelo-maso ny rahalahiny» (Deo 25.5).

²⁹Koa nisy fito mirahalahy; ary nampaka-bady ny zokiny dia maty momba.

³⁰Ny faharoa

³¹sy ny fahatelo koa dia nampakatra azy; ary tahaka izany avokoa no nataon’izy fito mirahalahy; nefa maty momba avokoa izy.

³²Ary farany dia maty koa Ravehivavy.

³³Koa amin’ny fitsanganana amin’ny maty, ho vadin’iza moa Ravehivavy? Fa samy efa nanambady azy avokoa izy fito mirahalahy.

³⁴Ary hoy Jesosy taminy: Ny zanak’izao fiainana izao dia mampaka-bady sady avoaka hampakarina;

³⁵fa izay atao mendrika hahazo izany fiainana izany sy ny fitsanganana amin’ny maty kosa dia tsy mba mampaka-bady na avoaka hampakarina;

³⁶ary tsy mety maty intsony izy, fa mitovy amin’ny anjely sady zanak’Andriamanitra satria zanaky ny fitsanganana amin’ny maty.

³⁷Ary i Mosesy aza dia nanambara teo amin’ilay teny milaza ny roimemy[11] fa hatsangana ny maty, raha niantso NY TOMPO hoe: «Andriamanitr’i Abrahama sy Andriamanitr’Isaka ary Andriamanitr’i Jakoba» (Eks 3.6).

³⁸Fa tsy mba Andriamanitry ny maty Izy fa an’ny velona; fa velona ho an’Andriamanitra avokoa izy rehetra.

³⁹Ary hoy ny mpanoradalàna sasany: Mpampianatra ô, marina izay nolazainao.

⁴⁰Fa tsy nisy sahy nanontany Azy na inona na inona intsony ireo.

⁴¹Hoy Jesosy tamin’ireo: Nahoana no lazaina fa Kristy* no Zanak’i Davida?

⁴²Nefa i Davida ihany no milaza eo amin’ny bokin’ny Salamo hoe: «NY TOMPO nilaza tamin’ny Tompoko hoe: Mipetraha eo ankavanako

⁴³ambara-panaoko ny fahavalonao ho fitoeran’ny tongotrao» (Sal 110.1).

⁴⁴Miantso Azy hoe: Tompo izany i Davida; koa ahoana no maha Zanany Azy?

⁴⁵Raha mbola nihaino ny olona rehetra dia hoy Izy tamin’ny mpianany:

⁴⁶Mitandrema ianareo amin’ny mpanoradalàna izay mazoto mandehandeha miakanjo akanjo lava, ary te hoarahabain’ny olona eny an-tsena sady tia ny toerana eny aloha ao amin’ny sinagoga* sy ny toerana aloha any amin’ny fanasana,

⁴⁷ary mandany ny tranon’ny mpitondratena sy manao vavaka lavareny mba ho fisehoana ivelany; ireo dia hahazo fanamelohana mafimafy kokoa.