Read La Bible en Malgache Lioka 21 Bible Online

Lioka 21 - La Bible en Malgache bible

Lioka 21

¹Nanopy ny masony Jesosy ka nahita ny mpanankarena nandrotsaka rakitra tao amin’ny fandatsahan-drakitra;

²ary nahita mpitondratena mahantra iray koa Izy izay nandrotsaka lepta roa tao.

³Dia hoy Izy: Lazaiko aminareo marina tokoa fa io mpitondratena mahantra io no nandrotsaka be noho izy rehetra.

⁴Fa ireo rehetra ireo dia tamin’ny haben’ny fananany no nandrotsahany tao amin’ny rakitra; fa izy kosa tamin’ny fahantrany no nandrotsahany ny fivelomany rehetra izay nananany.

⁵Nisy nilaza fa voaravaka vato tsara sy fanatitra ny tempoly; fa hoy Jesosy:

⁶Ny amin’ireo zavatra hitanareo ireo dia ho avy ny andro, koa tsy havela hisy vato hifanongoa eto ka tsy horavana.

⁷Ary nanontany Azy izy ireo hoe: Mpampianatra ô, rahoviana no ho avy izany? Ary inona no ho famantarana, rehefa ho tonga izany?

⁸Dia hoy Izy: Mitandrema fandrao ho voafitaka ianareo; fa maro no ho avy amin’ny anarako sady hilaza hoe: Izaho no Izy, ary koa: Efa akaiky ny andro; koa aza manaraka azy.

⁹Raha handre ady sy tabataba ianareo, aza matahotra; fa tsy maintsy ho tonga aloha izany, nefa tsy mbola miaraka amin’izay akory ny farany.

¹⁰Ary hoy Izy taminy: Hisy firenena hitsangana hamely firenena, hisy fanjakana hitsangana hamely fanjakana.

¹¹Hisy horohoron-tany lehibe sy mosary ary areti-mandringana any amin’ny tany samihafa, ary hisy zava-mahatahotra sy famantarana lehibe avy any an-danitra.

¹²Raha tsy mbola tonga izany rehetra izany dia hisambotra anareo izy ka hanenjika ary hanolotra anareo ao amin’ny sinagoga* sy any an-tranomaizina ka hoentina eo anatrehan’ny mpanjaka sy ny manampahefana ianareo noho ny anarako.

¹³Dia ho tonga ho vavolombelona aminareo izany.

¹⁴Koa aoreno ao am-ponareo ny tsy hihevitra mialoha izay ho fiarovan-tenanareo;

¹⁵fa Izaho no hanome anareo teny sy fahendrena izay tsy ho azon’ny fahavalonareo rehetra toherina na valìna.

¹⁶Hatolotry ny ray sy ny reny, ny rahalahy sy ny havana aman-tsakaiza koa aza ianareo, koa ny sasany aminareo dia hovonoiny.

¹⁷Ary ho halan’ny olona rehetra ianareo noho ny anarako.

¹⁸Nefa tsy hisy ho very na dia singam-bolo iray eo amin’ny lohanareo aza.

¹⁹Amin’ny faharetanareo no hahatananareo ny ainareo.

²⁰Rehefa mahita an’i Jerosalema voahodidin’ny miaramila ianareo dia aoka ho fantatrareo fa efa manakaiky ny fandravana azy.

²¹Ary izay any Jodia* amin’izany andro izany, aoka handositra ho any an-tendrombohitra; izay ao Jerosalema, aoka handositra ho any ivelany; ary izay any an-tsaha, aoka tsy hiditra ao an-tanàna intsony.

²²Fa ireo dia andro famaliana mba hahatanteraka izay rehetra voasoratra.

²³Fa loza no hanjo ny bevohoka sy ny mitaiza kely amin’izany andro izany! Satria hisy fahoriana lehibe eo amin’ny tany ary fahatezerana amin’ity firenena ity.

²⁴Dia ho ringana amin’ny lelan-tsabatra izy ka hoentina ho babon’ny firenena rehetra, ary hohitsahin’ny Jentilisa* i Jerosalema mandra-pahatanteraka ny andron’ny Jentilisa.

²⁵Hisy famantarana eny amin’ny masoandro sy ny volana ary ny kintana, ary etỳ ambonin’ny tany dia hitebiteby ny firenena amin’ny fahaverezan-kevitra noho ny firohondrohon’ny ranomasina sy ny fanonjany,

²⁶koa ho reraka ny fon’ny olona noho ny fahatahorany sy ny fiandrasany izay zavatra ho tonga ambonin’ny tany; fa ireo herin’ny lanitra dia hohozongozonina.

²⁷Amin’izany dia hahita ny Zanak’Olona* tonga eo amin’ny rahona amin-kery sy voninahitra lehibe izy.

²⁸Ary raha vao miandoha izany zavatra izany dia miandrandrà ka asandrato ny lohanareo; fa manakaiky ny fanavotana anareo.

²⁹Ary nilaza fanoharana tamin’izy ireo Izy hoe: Jereo ny aviavy sy ny hazo rehetra.

³⁰Raha hitanareo fa vao mitsiry ny rantsany dia fantatrareo ihany fa efa akaiky ny lohataona.

³¹Dia tahaka izany koa ianareo, raha vao hitanareo fa tonga izany zavatra izany, dia aoka ho fantatrareo fa akaiky ny fanjakan’Andriamanitra.

³²Lazaiko aminareo marina tokoa fa tsy ho tapitra ity taranaka ity mandra-pahatongan’izany rehetra izany.

³³Ny lanitra sy ny tany ho levona, fa ny teniko dia tsy mba ho levona.

³⁴Mitandrema, fandrao ny fonareo hovesaran’ny vokatry ny fisotroan-toaka sy ny fahamamoana ary ny fiahiahian’izao fiainana izao ka ho avy tampoka aminareo tahaka ny fandrika izany andro izany.

³⁵Fa hihatra amin’izay rehetra mitoetra etỳ ambonin’ny tany rehetra izany.

³⁶Fa miambena ka mivavaha mandrakariva mba hahery ianareo ka ho afa-mandositra izany zavatra ho avy rehetra izany ary hitsangana eo anatrehan’ny Zanak’Olona*.

³⁷Nony antoandro dia nampianatra tao amin’ny tempoly Izy; ary nony alina dia niala tao izy ka nitoetra teny amin’ny tendrombohitra atao hoe Oliva.

³⁸Ary ny vahoaka rehetra dia tonga vao maraina teo Aminy, tao amin’ny tempoly, mba hihaino Azy.