Read La Bible en Malgache Lioka 22 Bible Online

Lioka 22 - La Bible en Malgache bible

Lioka 22

¹Efa akaiky ny andro firavoravoana fihinanana ny mofo tsy misy masirasira, dia ilay atao hoe Paska.

²Ary ireo lehiben’ny mpisorona sy ny mpanoradalàna dia nitady izay hamonoany an’i Jesosy; nefa natahotra ny olona izy ireo.

³Fa i Satana dia niditra tao anatin’i Jodasy, ilay atao hoe iskariota, iray tamin’ny roa amby folo lahy,

⁴ka nankao amin’ireo lehiben’ny mpisorona sy ny lehiben’ny mpiambina izy ary niresaka taminy ny amin’izay hanolorany an’i Jesosy amin’ireo.

⁵Dia faly ireo ka nanaiky hanome vola azy.

⁶Ary nanaiky izy ka nitady izay fotoana azony hanolorana Azy amin’ireo, tsy ho fantatry ny olona.

⁷Tonga ny andro fihinanana ny mofo tsy misy masirasira, dia ilay tsy maintsy hamonoana ny Paska*.

⁸Ary Jesosy naniraka an’i Petera sy i Jaona ka niteny hoe: Mandehana, manomana ny Paska hohanintsika.

⁹Ary hoy ireo taminy: Aiza no tianao hanomananay azy?

¹⁰Dia hoy Izy tamin’izy ireo: Indro, raha miditra ao an-tanàna ianareo dia hisy lehilahy mitondra siny feno rano hifanena aminareo; manaraha azy ao amin’ny trano izay hidirany.

¹¹Dia lazao amin’ny tompon-trano hoe: Izao no lazain’ny Mpampianatra aminao: Aiza ny efitrano hiarahako mihinana ny Paska amin’ny mpianatro?

¹²Ary hanoro anareo efitrano malalaka ambony rihana, izay efa misy izay ilaina rehetra izy; any no ataovy ny fanomanana.

¹³Dia nandeha izy ireo ka nahita araka izay efa nolazainy taminy, ary nanomana ny Paska izy ireo.

¹⁴Nony tonga ny fotoana dia nipetraka hihinana Izy mbamin’ny Apostoly.

¹⁵Ary hoy Izy taminy: Naniry koa Aho raha naniry hiara-mihinana ity Paska* ity aminareo, dieny mbola tsy mijaly Aho.

¹⁶Fa lazaiko aminareo fa tsy mba hihinana izany intsony Aho ambara-pahatanterak’izany ao amin’ny fanjakan’Andriamanitra.

¹⁷Ary nandray kapoaka Izy, dia nisaotra ka hoy Izy: Raiso ity ka zarao aminareo;

¹⁸fa lazaiko aminareo fa hatramin’izao dia tsy hisotro ny vokatry ny voaloboka intsony Aho mandra-pahatongan’ny fanjakan’Andriamanitra.

¹⁹Dia nandray mofo Izy, koa rehefa nisaotra, dia novakiny ka natolony azy sady nataony hoe: Ity no tenako izay omena ho anareo; izao no ataovy ho fahatsiarovana Ahy.

²⁰Ary araka izany koa ny kapoaka, rehefa vita ny sakafo, dia hoy Izy: Ity kapoaka ity no fanekena vaovao amin’ny rako izay aidina ho anareo.

²¹Fa indro ny tanan’izay mamadika Ahy dia eto Amiko eto ambonin’ny latabatra.

²²Fa ny Zanak’Olona* dia mandeha tokoa, araka izay efa voatendry; nefa lozan’izay olona nahatonga Azy ho voatolotra!

²³Ary nifanontany ny amin’izay iray eo aminy mety hahavita izany izy ireo.

²⁴Nisy fifandirana koa teo amin’ny mpianatra ny amin’izay iray amin’izy ireo hatao ho lehibe indrindra.

²⁵Dia hoy Jesosy taminy: Ny mpanjakan’ny Jentilisa* dia mampanompo azy ary izay manapaka azy no atao hoe mpanao soa.

²⁶Fa tsy mba toy izany ianareo; fa izay lehibe indrindra aminareo dia aoka ho toy ny zandriny indrindra; ary izay manapaka dia aoka ho toy ny mpanompo.

²⁷Fa iza moa no lehibe, izay mipetraka misakafo va sa izay manompo? Tsy izay mipetraka misakafo va? Fa Izaho dia eo aminareo toy izay manompo.

²⁸Ary ianareo no naharitra nanaraka Ahy tamin’ny fakam-panahy nihatra Tamiko;

²⁹koa Izaho dia manendry anareo, tahaka ny nanendren’ny Raiko ho Ahy ny fanjakana,

³⁰mba hihinana sy hisotro eo amin’ny latabatro amin’ny fanjakako ianareo sady hipetraka ambony sezafiandrianana hitsara ny fokon’ny Israely roa amby folo.

³¹Hoy ny Tompo: Ry Simona, ry Simona, indro i Satana efa nitaky anareo hokororohiny toy ny vary.

³²Nefa Izaho nangataka ho anao mba tsy ho levona ny finoanao; ary rehefa mibebaka ianao dia ampaherezo ireo rahalahinao.

³³Ary hoy izy taminy: Tompoko, vonona hanaraka Anao aho, na dia ho any an-tranomaizina aza, na dia ho any amin’ny fahafatesana aza.

³⁴Nefa hoy Jesosy: Lazaiko aminao, ry Petera: Raha tsy mbola misy akoho maneno anio dia handa intelo ho tsy mahafantatra Ahy ianao.

³⁵Hoy koa Izy tamin’izy ireo: Raha nirahiko tsy nitondra kitapom-bola na kitapom-batsy na kapa ianareo, moa nisy zavatra nahory anareo va? Dia hoy ireo: Tsy nisy.

³⁶Fa hoy Izy taminy: Amin’izao kosa, izay manana kitapom-bola dia aoka izy hitondra; ary toy izany koa ny kitapom-batsy; ary izay tsy manan-tsabatra kosa dia aoka izy hivarotra ny lambany ka hividy.

³⁷Fa lazaiko aminareo: Tsy maintsy ho tanteraka Amiko izao voasoratra izao hoe: «Ary natao ho isan’ny mpanota Izy» (Isa 53.12); fa efa ho tanteraka ny Amiko.

³⁸Ary hoy ireo: Tompoko, indreto sabatra roa. Dia hoy Jesosy taminy: Ampy izay.

³⁹Dia niala teo Jesosy, koa araka ny fanaony dia nankany an-tendrombohitra Oliva Izy, ary nanaraka Azy koa ny mpianatra.

⁴⁰Ary raha vao tonga tao amin’izany toerana izany Izy dia niteny taminy hoe: Mivavaha mba tsy hidiranareo amin’ny fakam-panahy.

⁴¹Ary nihataka tokony ho indray mitora-bato tamin’izy ireo Izy, dia nandohalika ka nivavaka hoe:

⁴²Raiko ô, raha sitrakao dia esory Amiko ity kapoaka ity; nefa aoka tsy ny sitrapoko anie no hatao fa ny Anao.

⁴³Ary nisy anjely avy tany an-danitra niseho Taminy ka nampahery Azy.

⁴⁴Ary fadiranovana Izy ka nivavaka mafimafy kokoa; koa ny hatsembohany dia tahaka ny vaingan-dra nitete tamin’ny tany.

⁴⁵Nony nitsangana avy nivavaka Izy dia nankeo amin’ny mpianatra ka nahita azy ireo resin-tory noho ny alahelo.

⁴⁶Dia hoy Izy taminy: Nahoana no dia matory ianareo? Mitsangàna ka mivavaha mba tsy hidiranareo amin’ny fakam-panahy.

⁴⁷Raha mbola niteny Jesosy, indreo, tamy ny vahoaka, ary ilay atao hoe Jodasy, isan’ny roa amby folo lahy, dia nandeha teo alohany ka nanatona an’i Jesosy mba hanoroka Azy.

⁴⁸Fa hoy Jesosy taminy: Ry Jodasy, fanorohana va no anoloranao ny Zanak’Olona*?

⁴⁹Ary izay teo Aminy, raha nahita izay efa hanjo, dia niteny hoe: Tompoko, hamely amin’ny sabatra va izahay?

⁵⁰Ny iray teo aminy dia namely ny mpanompon’ny Mpisoronabe ka nahafaka ny sofiny havanana.

⁵¹Fa Jesosy namaly hoe: Aoka ihany na dia izao aza. Dia nikasika ny sofiny Izy ka nanasitrana azy.

⁵²Ary hoy Jesosy tamin’ireo lehiben’ny mpisorona sy ireo lehiben’ny mpiambina ny tempoly ary ireo loholona izay tonga hisambotra Azy: Tonga mitondra sabatra sy langilangy toy ny hisambotra jiolahy va ianareo?

⁵³Raha teo aminareo isanandro teo amin’ny tempoly Aho dia tsy nanatsotra tanana Tamiko ianareo; fa izao no fotoananareo sy ny herin’ny maizina.

⁵⁴Dia nisambotra an’i Jesosy izy ireo ka nitondra Azy ho ao an-tranon’ny Mpisoronabe. Ary i Petera dia nanaraka teny lavidavitra teny.

⁵⁵Raha nandrehitra afo teo an-kianja ireo ka nipetraka dia mba nipetraka teo aminy koa i Petera.

⁵⁶Ary ny mpanompovavy iray, nony nahita azy nipetraka teo anilan’ny hazavana, dia nandinika azy ka niteny hoe: Ity koa niaraka Taminy.

⁵⁷Fa nandà izy ka niteny hoe: Ravehivavy, tsy fantatro Izy.

⁵⁸Vetivety foana taorianan’izay dia nisy olona hafa koa nahita azy ka niteny hoe: Ianao koa mba naman’ireny. Fa hoy i Petera: Ralehilahy, tsy izy aho.

⁵⁹Rehefa tokony ho ora iray no lasa dia nisy olona iray koa nanizingizina hoe: Izy io dia niaraka Taminy marina tokoa fa Galiliana izy.

⁶⁰Fa hoy i Petera: Ralehilahy, tsy fantatro izay lazainao. Ary niaraka tamin’izay, raha mbola niteny izy, dia nisy akoho naneno.

⁶¹Ary nitodika ny Tompo dia nibanjina an’i Petera. Ary nahatsiaro ilay tenin’ny Tompo taminy i Petera hoe: Raha tsy mbola misy akoho maneno anio dia handa Ahy intelo ianao.

⁶²Dia lasa nankany ivelany i Petera ka nitomany mafy tokoa.

⁶³Ary ireo lehilahy izay nitana an’i Jesosy dia nanao Azy ho fihomehezana sady nikapoka Azy.

⁶⁴Rehefa notampenan’izy ireo ny masony dia nanontaniany hoe: Maminania; iza moa no nikapoka Anao?

⁶⁵Teny ratsy maro hafa koa no nataony hanaratsiany Azy.

⁶⁶Raha vao nazava ny andro dia nivory ny filankevitry ny loholona dia ireo lehiben’ny mpisorona sy ny mpanoradalàna ka nitondra an’i Jesosy ho eo amin’ny Sinedrionany

⁶⁷ary niteny hoe: Raha Ianao no Kristy* dia lazao aminay. Dia hoy Izy taminy: Na dia hilaza aminareo aza Aho dia tsy hino ianareo.

⁶⁸Ary na dia hanontany aza Aho dia tsy hamaly akory ianareo.

⁶⁹Fa hatramin’izao ny Zanak’Olona* dia hipetraka eo ankavanan’ny herin’Andriamanitra.

⁷⁰Hoy izy rehetra: Zanak’Andriamanitra ary va Ianao? Dia hoy Izy taminy: Voalazanareo fa Izaho no Izy.

⁷¹Ary hoy ireo: Ka inona indray no ilàntsika vavolombelona? Fa ny tenantsika no efa nandre tamin’ny vavany.