Read La Bible en Malgache Lioka 23 Bible Online

Lioka 23 - La Bible en Malgache bible

Lioka 23

¹Ary nitsangana ny olona rehetra ka nitondra an’i Jesosy tany amin’i Pilato.

²Dia nanomboka niampanga Azy izy ireo hoe: Izy ity hitanay nampiodina ny firenenay sady nandrara tsy handoa hetra ho an’i Kaisara ary nilaza ny tenany ho Kristy* Mpanjaka.

³Ary nanontany Azy i Pilato hoe: Ianao va no Mpanjakan’ny Jiosy*? Dia namaly azy Izy hoe: Voalazanao.

⁴Hoy i Pilato tamin’ireo lehiben’ny mpisorona sy ny vahoaka: Tsy hitako izay helok’ity Lehilahy ity.

⁵Fa vao mainka nanizingizina ireo hoe: Nampiodina ny olona Izy sady nampianatra manerana an’i Jodia* rehetra, nanomboka hatrany Galilia ka hatratỳ.

⁶Raha nandre izany i Pilato dia nanontany raha olona avy any Galilia Jesosy.

⁷Rehefa fantany fa avy tamin’ny tany tapahin’i Heroda Izy dia nampanateriny tany aminy, fa tany Jerosalema koa i Heroda tamin’izany andro izany.

⁸Faly dia faly i Heroda raha nahita an’i Jesosy; fa efa ela no naniriany hahita Azy satria efa nandre ny Aminy sy nanantena hahita Azy hanao famantarana izy.

⁹Nametraka fanontaniana maro Taminy izy; nefa tsy namaly teny azy akory Jesosy.

¹⁰Ary ireo lehiben’ny mpisorona sy ny mpanoradalàna nijanona teo dia nitompo teny fantatra hiampanga Azy.

¹¹Ary namingavinga Azy i Heroda sy ny miaramilany ka nanao Azy ho fihomehezana, dia nampiakanjo Azy akanjo marevaka ka namerina Azy tany amin’i Pilato.

¹²Ary nanjary mpinamana i Heroda sy i Pilato tamin’izany andro izany; kanefa nifankahala izy roa lahy taloha.

¹³Rehefa nasain’i Pilato novorina ireo lehiben’ny mpisorona sy ireo manampahefana ary ny vahoaka

¹⁴dia hoy izy tamin’izy ireo: Noentinareo atỳ amiko ity Lehilahy ity fa hoe nampiodina ny vahoaka; ary indro, efa nanadina Azy teto anatrehanareo aho, nefa tsy hitako izay helok’ity Lehilahy ity amin’izay iampanganareo Azy;

¹⁵na dia i Heroda koa aza dia tsy nahita, fa namerina Azy ho atỳ amintsika izy; ary indro, tsy nisy zavatra nataony izay tokony hahafaty Azy;

¹⁶koa hofaiziko Izy dia halefako.

¹⁷Fa tsy maintsy manafaka olona iray ho an’ny vahoaka izy amin’ny andro firavoravoana.

¹⁸Fa izy rehetra dia niantso mafy indray miredona hoe: Vonoy Io ka i Barabasy no alefaso ho anay!

¹⁹Io Barabasy io dia natao tao an-tranomaizina noho ny fikomiana tao an-tanàna sy noho ny vonoan’olona.

²⁰Ary satria tian’i Pilato hafahana Jesosy dia nifandahatra tamin’ireo indray izy.

²¹Fa ny olona kosa dia niantsoantso hoe: Homboy, homboy amin’ny hazofijaliana Izy!

²²Dia niteny tamin’izy ireo fanintelony izy hoe: Inona ary no ratsy nataony? Tsy hitako izay helony tokony hahafaty Azy; koa hofaiziko Izy dia halefako.

²³Fa mbola niantsoantso tamin’ny feo mahery ihany ny olona ka nangataka ny hanomboana an’i Jesosy amin’ny hazofijaliana. Ary nihanahery ny feon’ny olona.

²⁴Dia nanapa-kevitra hanaiky izay nangatahin’izy ireo i Pilato.

²⁵Koa nanafaka ilay natao tao an-tranomaizina noho ny fikomiana sy ny vonoan’olona izy satria io no nangatahin’ny olona; fa Jesosy kosa natolony araka ny sitrapon’ireo.

²⁶Raha nitondra an’i Jesosy izy ireo dia nisambotra lehilahy kireniana iray atao hoe Simona, izay vao avy any an-tsaha, ka nampitondra azy ny hazofijaliana tao aorianan’i Jesosy.

²⁷Dia nisy vahoaka betsaka nanaraka Azy ary nisy koa vehivavy maro izay niteha-tratra sady nitomany Azy.

²⁸Fa Jesosy nitodika tamin’izy ireo ka niteny hoe: Ry zanakavavin’i Jerosalema, aza mitomany Ahy fa mitomania ny tenanareo sy ny zanakareo.

²⁹Fa indro, ho avy ny andro izay hilazana hoe: Sambatra ny momba sy ny kibo izay tsy nitoeran-jaza ary ny nono izay tsy ninonoan-jaza.

³⁰Dia hilaza amin’ny tendrombohitra ny olona hoe: «Mianjerà aminay; ary amin’ny havoana hoe: Saròny izahay» (Hos 10.8).

³¹Fa raha ataony amin’ny hazo maitso izao, inona no hanjo ny hazo maina?

³²Ary nisy koa olon-dratsy roa lahy noentina hiaraka hovonoina Aminy.

³³Rehefa tonga teo amin’ny toerana atao hoe Ikarandoha izy ireo dia teo no nanomboany an’i Jesosy sy ireo olon-dratsy ireo, ny iray dia teo ankavanany ary ny iray dia teo ankaviany.

³⁴Ary hoy Jesosy: Raiko ô, mamelà ny helony fa tsy fantany izay ataony. Dia nanaovany antsapaka no fizara ny fitafiany.

³⁵Nijanona teo ny olona ka nijery. Ireo loholona koa dia nandatsa hoe: Namonjy ny sasany Izy; aoka hovonjeny koa ny tenany, raha Izy no Kristin’Andriamanitra, dia Ilay voafidy.

³⁶Ary nihomehy Azy koa ny miaramila, dia nanatona ka nanome Azy vinaingitra

³⁷sady niteny hoe: Raha Ianao no Mpanjakan’ny Jiosy*, vonjeo ny tenanao.

³⁸Ary nisy soratra koa teo amboniny hoe: ITY NO MPANJAKAN’NY JIOSY.

³⁹Ny iray tamin’ireo olon-dratsy nahantona teo dia niteny ratsy Azy hoe: Tsy Ianao va no Kristy*? Vonjeo ny tenanao sy izahay.

⁴⁰Fa niteny kosa ilay iray sady nananatra ny namany hoe: Moa tsy mba matahotra an’Andriamanitra va ianao na dia ianao voaheloka izao koa aza?

⁴¹Marina ny anamelohana antsika satria mandray ny valin’ny nataontsika isika; fa ity Lehilahy ity kosa, tsy mba nanao ratsy na dia kely akory aza.

⁴²Ary hoy izy: Jesosy ô, tsarovy aho, rehefa tonga any amin’ny fanjakanao Ianao.

⁴³Dia hoy Jesosy taminy: Lazaiko aminao marina tokoa: Anio no hiarahanao Amiko any Paradisa*.

⁴⁴Rehefa tokony ho tamin’ny ora fahenina dia nisy haizina nandrakotra ny tany manontolo ka naharitra hatramin’ny ora fahasivy izany

⁴⁵satria nihamaizina ny masoandro, ary triatra misasaka ny efitra lamba tao amin’ny tempoly.

⁴⁶Dia niantso tamin’ny feo mahery Jesosy hoe: «Ray ô, eo an-tananao no atolotro ny fanahiko» (Sal 31.5); rehefa niteny izany Izy dia afaka ny ainy.

⁴⁷Raha nahita izay zava-nitranga teo ny kapiteny dia nankalaza an’Andriamanitra hoe: Tena olona marina tokoa io Lehilahy io.

⁴⁸Ary ny vahoaka rehetra dia niara-nirohotra mba hijery izay niseho, ary raha nahita ny zava-nitranga ireo dia niverina sady niteha-tratra.

⁴⁹Fa ny olom-pantany rehetra sy ny vehivavy izay nanaraka Azy avy tany Galilia kosa dia nijanona teny lavidavitra teny nijery izany zavatra izany.

⁵⁰Ary indro, nisy lehilahy antsoina hoe Josefa, izay isan’ny mpanolotsaina tao amin’ny Sinedriona, lehilahy tsara fanahy sady marina.

⁵¹Izany lehilahy izany dia tsy mba nanaiky ny hevitra sy ny zavatra nataon’ny sasany; avy tany Arimatia tanànan’ny Jiosy* izy sady niandry ny fanjakan’Andriamanitra.

⁵²Nankao amin’i Pilato izy ka nangataka ny fatin’i Jesosy.

⁵³Dia nampidininy ny faty ka nofonosiny lamba hariry madinika, dia naleviny tao amin’ny fasana voalavaka tao amin’ny vatolampy, izay tsy mbola nandevenana olona.

⁵⁴Andro fiomanana izany andro izany, fa efa antomotra ny Sabata*.

⁵⁵Ary ny vehivavy, izay niaraka Taminy hatrany Galilia, dia nanaraka tao aoriana ka nahita ny fasana sy izay fomba nametrahany ny faty.

⁵⁶Ary niverina ireo ka nanomana zavamanitra sy menaka manitra. Ary tamin’ny Sabata dia nitsahatra ihany izy ireo araka ny lalàna.