Read La Bible en Malgache Lioka 3 Bible Online

Lioka 3 - La Bible en Malgache bible

Lioka 3

¹Tamin’ny taona fahadimy amby folo nanjakan’i Tiberio Kaisara, fony i Pontio Pilato no governora tany Jodia*, i Heroda no mpanapaka tany Galilia, i Filipo rahalahiny no mpanapaka ny tany Itoria sy Trakonitisy, i Lisaniasy no mpanapaka tany Abilena

²ary i Anasy sy i Kaiafa no Mpisoronabe*, dia tonga tamin’i Jaona, zanak’i Zakaria, tany an-tany efitra ny tenin’Andriamanitra.

³Ary nankany amin’ny faritra rehetra any amoron’i Jordana izy nitory ny batisan’ny fibebahana ho famelan-keloka;

⁴araka ny voasoratra ao amin’ny bokin’ny tenin’Isaia mpaminany[4] hoe: «Injany misy feon’ny miantso mafy any an-tany efitra hoe: Amboary ny lalan’NY TOMPO, ataovy mahitsy ny lalan-kalehany.

⁵Ny lohasaha rehetra dia hototofana, ny tendrombohitra sy ny havoana rehetra dia haetry, ny miolikolika dia hahitsy, ny lalana mikitoantoana dia hohamarinina;

⁶Ary ny nofo rehetra dia hahita ny famonjen’Andriamanitra» (Isa 40.3-5).

⁷Hoy izy tamin’ny vahoaka izay nankeo aminy mba hataony batisa: Ry taranaky ny menarana, iza no nanoro hevitra anareo handositra ny fahatezerana ho avy?

⁸Koa mamoaza voa mendrika ny fibebahana; ary aza miteny anakampo hoe: Manana an’i Abrahama ho rainay izahay; fa lazaiko aminareo fa Andriamanitra mahay manangana zanaka ho an’i Abrahama avy amin’ireto vato ireto.

⁹Indro, efa mipetraka ao amin’ny fototry ny hazo sahady ny famaky; koa ny hazo rehetra izay tsy mamoa voa tsara dia hokapaina ka hatsipy any anaty afo.

¹⁰Nanontany an’i Jaona ny vahoaka hoe: Inona ary no hataonay?

¹¹Namaly azy izy hoe: Izay manana akanjo roa dia aoka hanome ho an’ny tsy manana ary izay manan-kanina dia aoka hanao toy izany koa.

¹²Dia avy koa ny mpamory hetra sasany mba hataony batisa ka niteny taminy hoe: Mpampianatra ô, inona no hataonay?

¹³Hoy izy taminy: Aza mampandoa mihoatra noho izay notendrena halainareo.

¹⁴Nisy miaramila koa nanontany azy hoe: Inona kosa no mba hataonay? Dia hoy izy taminy: Aza mampiasa hery amin’ny tsy antony na miampanga lainga, ary aoka ho afa-po amin’ny karamanareo ianareo.

¹⁵Raha mbola niandry ny olona ka samy nieritreritra an’i Jaona tao am-pony, na izy no Kristy* na tsia,

¹⁶dia hoy i Jaona tamin’izy rehetra: Izaho dia manao batisa anareo amin’ny rano, fa avy Izay mahery noho izaho ka tsy mendrika hamaha ny fehin-kapany akory aza aho; Izy no hanao batisa anareo amin’ny Fanahy Masina sy ny afo;

¹⁷eny an-tanany ny fikororohany hanadiovany tsara ny ao am-pamoloany ka hanangonany ny vary ho ao amin’ny sompiny; fa ny akofa sy ny mololo dia hodorany amin’ny afo tsy azo vonoina.

¹⁸Fananarana maro hafa koa no notorìny tamin’ny olona.

¹⁹Fa i Heroda mpanapaka, nony nanarin’i Jaona noho ny amin’i Herodiasy, vadin’ny rahalahiny, sy noho ny ratsy rehetra izay nataony,

²⁰dia nanidy an’i Jaona tao an-tranomaizina ho fanampin’izany rehetra izany koa.

²¹Rehefa natao batisa ny vahoaka rehetra, ary Jesosy koa efa natao batisa sy nivavaka, dia nisokatra ny lanitra;

²²ary ny Fanahy Masina nidina teo amboniny, koa ny endriny dia tahaka ny voromailala. Dia nisy feo avy tany an-danitra hoe: Ianao no Zanako malalako; Ianao no sitrako.

²³Tokony ho telopolo taona Jesosy, rehefa nanomboka ny raharahany, ka natao ho zanak’i Josefa izay zanak’i Hely,

²⁴zanak’i Matata, zanak’i Levy, zanak’i Melky, zanak’i Janay, zanak’i Josefa,

²⁵zanak’i Matatia, zanak’i Amosa, zanak’i Nahoma, zanak’i Esly, zanak’i Nagay,

²⁶zanak’i Mata, zanak’i Matatia, zanak’i Semeina, zanak’i Joseka, zanak’i Joda,

²⁷zanak’i Joanana, zanak’i Resa, zanak’i Zerobabela, zanak’i Salatiela, zanak’i Nery,

²⁸zanak’i Melky, zanak’i Ady, zanak’i Kosama, zanak’i Elmadama, zanak’i Era,

²⁹zanak’i Jesosy, zanak’i Eliezera, zanak’i Jorima, zanak’i Matata, zanak’i Levy,

³⁰zanak’i Simeona, zanak’i Joda, zanak’i Josefa, zanak’i Jonama, zanak’i Eliakima,

³¹zanak’i Melea, zanak’i Mena, zanak’i Matata, zanak’i Natama, zanak’i Davida,

³²zanak’i Jese, zanak’i Jobeda, zanak’i Boaza, zanak’i Salmona, zanak’i Nahasona,

³³zanak’i Aminadaba, zanak’i Admina, zanak’i Arny, zanak’i Hezroma, zanak’i Fareza, zanak’i Joda,

³⁴zanak’i Jakoba, zanak’Isaka, zanak’i Abrahama, zanak’i Tera, zanak’i Nahora,

³⁵zanak’i Seroga, zanak’i Reo, zanak’i Palega, zanak’i Ebera, zanak’i Sela,

³⁶zanak’i Kenama, zanak’i Arpaksada, zanak’i Sema, zanak’i Noa, zanak’i Lameka,

³⁷zanak’i Metosela, zanak’i Enoka, zanak’i Jareda, zanak’i Mahalalila, zanak’i Kenama,

³⁸zanak’i Enosy, zanak’i Seta, zanak’i Adama, zanak’Andriamanitra.