Read La Bible en Malgache Lioka 4 Bible Online

Lioka 4 - La Bible en Malgache bible

Lioka 4

¹Ary feno ny Fanahy Masina Jesosy dia niverina avy tany Jordana, ary noentin’ny Fanahy tany an-tany efitra nandritra ny efapolo andro Izy

²ka nalain’ny devoly* fanahy. Tsy nihinana na inona na inona akory Izy nandritra izany andro izany, koa rehefa tapitra izany dia noana Izy.

³Ary hoy ny devoly Taminy: Raha Zanak’Andriamanitra Ianao, teneno io vato io mba ho tonga mofo.

⁴Fa Jesosy namaly azy hoe: Voasoratra hoe: «Tsy mofo ihany no iveloman’ny olona» (Deo 8.3).

⁵Ary nitondra Azy niakatra ny devoly dia naneho Azy indray mipy maso ny fanjakana rehetra amin’izao tontolo izao.

⁶Hoy ny devoly Taminy: Homeko Anao izao fahefana rehetra izao mbamin’ny voninahiny, fa efa natolotra ahy izany ka izay tiako no omeko azy;

⁷koa raha hiankohoka eto anatrehako Ianao dia ho Anao avokoa izany rehetra izany.

⁸Fa Jesosy namaly azy hoe: Voasoratra hoe: «NY TOMPO Andriamanitrao no hiankohofanao ary Izy irery ihany no hotompoinao» (Deo 6.13; 10.20).

⁹Ary nitondra Azy nankany Jerosalema izy dia nampitoetra Azy teo an-tampon’ny tempoly ka niteny Taminy hoe: Raha Zanak’Andriamanitra Ianao, mivarìna avy eto mankany ambany any;

¹⁰fa voasoratra hoe: «Izy handidy ny anjeliny ny aminao mba hiaro Anao;

¹¹ary eny an-tanany no hitondran’ireo Anao, fandrao ho tafintohina amin’ny vato ny tongotrao» (Sal 91.11, 12).

¹²Fa Jesosy namaly azy hoe: Voalaza hoe: «Aza maka fanahy NY TOMPO Andriamanitrao» (Deo 6.16).

¹³Rehefa nahatapitra izay fakam-panahy rehetra ny devoly dia nandao Azy izy aloha.

¹⁴Ary niverina tamin’ny herin’ny Fanahy nankany Galilia Jesosy; dia niely tamin’ny faritra rehetra manodidina ny lazany.

¹⁵Nampianatra teny amin’ny sinagogan’ny olona koa Izy ka nankalazain’izy rehetra.

¹⁶Dia tonga tao Nazareta, izay nahabe Azy, Izy; ary araka ny fanaony dia niditra tao amin’ny sinagoga* Izy tamin’ny andro Sabata* ka nitsangana hamaky teny.

¹⁷Dia natolotra Azy ny bokin’Isaia mpaminany[5]; ary nony namelatra ny boky Izy dia nahita ny teny voasoratra hoe:

¹⁸«Ny Fanahin’NY TOMPO no ato Amiko, satria nanosotra Ahy hitory teny soa mahafaly amin’ny mahantra Izy; naniraka Ahy hitory fanafahana amin’ny gadra Izy sy fampahiratana amin’ny jamba, hamerina izay nampahorina ho amin’ny fahafahana,

¹⁹hitory taona ankasitrahan’NY TOMPO» (Isa 61.1, 2).

²⁰Rehefa nahorony ny boky ka naveriny tamin’ny mpanao raharaha dia nipetraka Izy. Ary nandinika Azy ny mason’izay rehetra tao amin’ny sinagoga.

²¹Dia hoy Jesosy taminy: Androany no efa tanteraka eto anatrehanareo izany soratra izany.

²²Ary izy rehetra dia niaiky Azy sady talanjona noho ny tenim-pahasoavana naloaky ny vavany, koa hoy izy: Tsy Zanak’i Josefa va Ity?

²³Hoy kosa Jesosy taminy: Hataonareo Amiko tokoa izao ohabolana izao hoe: Ry mpitsabo, sitrano ny tenanao! Izay renay fa nataonao tao Kapernaomy dia mba ataovy eto amin’ny taninao koa.

²⁴Ary hoy koa Izy: Lazaiko aminareo marina tokoa: Tsy misy mpaminany izay ankasitrahana ao amin’ny taniny.

²⁵Fa lazaiko aminareo marina tokoa: Maro no mpitondratena teo amin’ny Israely tamin’ny andron’i Elia, raha tsy nilatsaka ny orana[6] nandritra ny telo taona sy enim-bolana, ka nisy mosary mafy tamin’ny tany manontolo;

²⁶nefa tsy mba nirahina na dia ho any amin’ny iray tamin’ireo aza i Elia, afa-tsy tany Zarefata, any amin’ny tanin’i Sidona ho any amin’ny vehivavy mpitondratena iray.

²⁷Ary maro no boka teo amin’ny Israely tamin’ny andron’i Elisa mpaminany, nefa tsy mba nisy nodiovina na dia iray akory aza, afa-tsy i Namàna Siriana ihany.

²⁸Ary feno hatezerana izay rehetra teo amin’ny sinagoga, raha nandre izany,

²⁹dia nitsangana izy ireo ka nandroaka Azy ho any ivelan’ny tanàna ary nitondra Azy ho any an-tampon’ny havoana niorenan’ny tanàna mba hazerany amin’ny hantsana.

³⁰Nefa namakivaky teo afovoan’izy ireo Izy ka lasa nandeha.

³¹Nidina tany Kapernaomy, tanàna any Galilia, Jesosy ka nampianatra ny olona tamin’ny Sabata*.

³²Dia talanjona tamin’ny fampianarany ny olona satria nisy fahefana ny teniny.

³³Nisy olona nanana fanahin’ny demonia* maloto tao amin’ny sinagoga*, izay niantso tamin’ny feo mahery hoe:

³⁴Indrisy! Moa mifaninona akory izahay sy Ianao, ry Jesosy avy any Nazareta? Avy handringana anay va Ianao? Fantatro fa Ilay Masin’Andriamanitra Ianao.

³⁵Fa niteny mafy azy Jesosy hoe: Mangìna ianao ka mialà aminy. Ary nony nampianjera azy teo afovoan’ny olona ny demonia dia niala taminy nefa tsy nandratra azy.

³⁶Dia talanjona avokoa izy rehetra ka niresaka hoe: Ahoana izao teny izao! Fa amim-pahefana sy hery no andidiany ny fanahy maloto dia miala ireny.

³⁷Ary niely teny amin’ny faritra manodidina rehetra ny lazany.

³⁸Nony nitsangana niala tao amin’ny sinagoga* Jesosy dia niditra tao an-tranon’i Simona. Ary tratry ny tazo mafy ny rafozambavin’i Simona; koa nangataka Taminy izy ireo mba hanasitrana azy.

³⁹Dia niondrika teo aminy Izy ka noteneniny mafy ny tazo dia niala tamin-dRavehivavy izany; ary nitsangana niaraka tamin’izay izy ka nanompo azy ireo.

⁴⁰Rehefa nilentika ny masoandro, ny olona rehetra izay nanana marary tamin’ny aretina samihafa, dia nitondra azy teo Aminy; dia nametra-tanana tamin’izy rehetra tsirairay Izy ka nanasitrana azy.

⁴¹Ary nisy demonia* niala tamin’ny maro ka niantso hoe: Ianao no Zanak’Andriamanitra. Nefa norarany ireo ka tsy navelany hiteny, satria nahalala Azy ho Kristy*.

⁴²Nony maraina ny andro dia niala teo Jesosy ka nankany an-tany efitra; ary ny vahoaka nitady Azy, dia nankeo Aminy ka te hihazona Azy mba tsy hialany tao aminy.

⁴³Nefa hoy Izy taminy: Tsy maintsy mitory ny teny soa mahafaly ny amin’ny fanjakan’Andriamanitra any amin’ny tanàna hafa koa Aho, satria izany no nanirahana Ahy.

⁴⁴Ary nitoriteny tany amin’ny sinagoga* manerana an’i Galilia Izy.