Read La Bible en Malgache Lioka 5 Bible Online

Lioka 5 - La Bible en Malgache bible

Lioka 5

¹Koa satria nifanizina Taminy ny vahoaka mba hihaino ny tenin’Andriamanitra dia nijanona teo amoron’ny farihin’i Genesareta Jesosy;

²ary nahita sambokely roa nijanona teo an-tsisin’ny farihy Izy; fa ny mpanarato dia efa niala taminy ka nanasa ny haratony.

³Dia niditra teo amin’ny sambokely iray izay an’i Simona Izy, ary nangataka taminy mba hihataka kely amin’ny tany. Dia nipetraka teo an-tsambokely Izy ka nampianatra ny vahoaka.

⁴Rehefa nitsahatra niteny Jesosy dia hoy Izy tamin’i Simona: Mandrosoa ho any amin’ny lalina dia alatsaho ny haratonareo hahazoana hazandrano.

⁵Fa namaly i Simona hoe: Tompoko, nandritra ny alina no efa nikelezanay aina, nefa tsy nahazo na inona na inona; kanefa noho ny teninao dia halatsako ihany ny harato.

⁶Rehefa nataony izany dia nahazo hazandrano be dia be izy ireo ka efa nisy triatra ny haratony.

⁷Ary niantso ny namany izay teo amin’ny sambokely hafa izy ireo mba ho avy hanampy azy. Dia avy ireny, ary nofenoiny ny sambokely roa, ka efa saika nilentika.

⁸Rehefa hitan’i Simona Petera izany dia niankohoka teo an-tongotr’i Jesosy izy ka niteny hoe: Tompoko, mialà amiko, fa olona mpanota aho.

⁹Fa talanjona izy sy izay rehetra teo aminy noho ny haben’ny hazandrano izay azony.

¹⁰Ary toy izany koa i Jakoba sy i Jaona, zanak’i Zebedio, izay niombon-draharaha tamin’i Simona. Dia hoy Jesosy tamin’i Simona: Aza matahotra; hatramin’izao ankehitriny izao dia olombelona kosa no ho azonao.

¹¹Ary rehefa nampiantsona ny sambokeliny teo an-tanety izy ireo dia nahafoy ny zavatra rehetra ka nanaraka an’i Jesosy.

¹²Raha tao an-tanàna iray Jesosy, indro, nisy lehilahy heniky ny habokana. Nony nahita Azy io dia niankohoka ka nitaraina taminy hoe: Tompoko, raha mety Ianao, dia afaka manadio ahy.

¹³Ary nanatsotra ny tanany Jesosy dia nikasika azy ka niteny hoe: Mety Aho; madiova ianao. Ary niala taminy niaraka tamin’izay ny habokany.

¹⁴Ary nandrara azy Jesosy tsy hilaza amin’olona na dia iray akory aza; fa mandehana, hoy Izy, misehoa amin’ny mpisorona, ka manaova fanatitra noho ny fanadiovana anao, araka ny nandidian’i Mosesy, ho vavolombelona amin’ireo.

¹⁵Fa vao mainka niely bebe kokoa ny lazany, dia niangona ny vahoaka betsaka hihaino Azy sy mba ho sitranina tamin’ny aretiny.

¹⁶Dia niala nankany an-tany efitra Izy ka nivavaka.

¹⁷Indray andro, raha nampianatra Jesosy, dia nipetraka teo ny Fariseo* sasany sy ny mpampianatra ny Lalàna, izay tonga avy tamin’ny tanàna rehetra any Galilia sy Jodia* ary Jerosalema; ary ny herin’ny Tompo dia tao Aminy mba hanasitranany.

¹⁸Indro, nisy nitondra lehilahy iray izay malemy, tamin’ny fandriana, ka nitady izay hampidirany sy hametrahany azy teo anatrehany.

¹⁹Koa satria tsy hitan’izy ireo izay hampidirany azy noho ny habetsahan’ny vahoaka dia niakatra teo an-tafontrano ireo ka nanesorany ny tafo tanimanga, dia nampidininy Ralehilahy mbamin’ny fandrianany ho eo afovoan’ny olona, dia teo anatrehan’i Jesosy.

²⁰Ary raha hitan’i Jesosy ny finoan’ireo dia hoy Izy: Ralehilahy, voavela ny helokao.

²¹Fa ny mpanoradalàna sy ny Fariseo* niady hevitra hoe: Iza moa Ity miteny ratsy Ity? Iza no mahavela heloka, afa-tsy Andriamanitra ihany?

²²Fa Jesosy nahafantatra ny eritreriny ka niteny taminy hoe: Nahoana ianareo no mieritreritra izany ao am-ponareo?

²³Inona moa no moramora kokoa, ny milaza hoe: Voavela ny helokao sa ny milaza hoe: Mitsangàna ka mandehana?

²⁴Fa mba ho fantatrareo fa ny Zanak’Olona* manana fahefana etỳ ambonin’ny tany hamela heloka, dia hoy Izy tamin’ilay malemy: Izaho milaza aminao hoe: Mitsangàna, batao ny fandriananao ary modia any an-tranonao.

²⁵Niaraka tamin’izay dia nitsangana teo anatrehan’ny olona izy ka nibata ny fandrianany, dia lasa nody sady nankalaza an’Andriamanitra.

²⁶Ary talanjona avokoa ny olona rehetra, dia nankalaza an’Andriamanitra sady raiki-tahotra indrindra ka niteny hoe: Efa nahita zava-mahagaga isika androany.

²⁷Taorianan’izany dia nandeha Jesosy ka nahita mpamory hetra iray antsoina hoe Levy, nipetraka teo am-pamorian-ketra; dia hoy Izy taminy: Manaraha Ahy.

²⁸Ary nahafoy ny zavatra rehetra izy ka nitsangana dia nanaraka Azy.

²⁹Nanao fanasana lehibe ho an’i Jesosy tao an-tranony i Levy; ary nisy mpamory hetra maro sy olon-kafa koa, izay nipetraka niara-nisakafo taminy.

³⁰Fa ny Fariseo* sy ny mpanoradalàna izay teo aminy dia nimonomonona tamin’ny mpianatr’i Jesosy hoe: Nahoana ianareo no miara-mihinana sy misotro amin’ny mpamory hetra sy ny mpanota?

³¹Fa Jesosy namaly hoe: Tsy ny salama no mila mpitsabo fa ny marary;

³²tsy tonga hiantso ny marina Aho fa ny mpanota mba hibebaka.

³³Ary hoy izy ireo Taminy: Ny mpianatr’i Jaona dia mifady hanina matetika sy mivavaka, ary ny an’ny Fariseo* koa mba tahaka izany ihany, fa ny Anao kosa dia mihinana sy misotro ihany.

³⁴Hoy Jesosy taminy: Azonareo atao va ny mampifady hanina ny havan’ny mpampakatra, raha mbola ao aminy ny mpampakatra?

³⁵Fa ho avy ny andro izay hanesorana ny mpampakatra hiala aminy, dia amin’izay andro izay vao hifady hanina izy.

³⁶Ary nilaza fanoharana taminy koa Izy hoe: Tsy misy olona mandrovitra akanjo vaovao hanalany tapa-damba hanampenana akanjo tonta; fa raha izany dia maharovitra ny vaovao izany, ary ilay tapa-damba nalaina tamin’ny vaovao dia tsy hifanaraka amin’ny tonta.

³⁷Tsy misy olona manisy divay vaovao ao anaty siny hoditra tonta; fa raha izany, ny divay vaovao, dia handoaka ny siny hoditra ka ho raraka ny divay sady ho simba foana ny siny hoditra;

³⁸fa ny divay vaovao dia tsy maintsy hatao ao anaty siny hoditra vaovao.

³⁹Tsy misy olona, rehefa nisotro ny divay ela, no maniry ny vaovao; fa hoy izy: Ny ela no tsara.