Read La Bible en Malgache Lioka 7 Bible Online

Lioka 7 - La Bible en Malgache bible

Lioka 7

¹Rehefa vitan’i Jesosy teo anatrehan’ny olona izany toriteniny rehetra izany dia nankany Kapernaomy Izy.

²Narary efa ho faty ny mpanompon’ny kapiteny iray, izay tiany.

³Koa raha nahare ny amin’i Jesosy ilay kapiteny dia naniraka loholon’ny Jiosy* hankeo Aminy mba hangataka Azy ho avy ka hanasitrana ny mpanompony.

⁴Rehefa tonga teo amin’i Jesosy ireo dia nangataka mafy Taminy ka niteny hoe: Mendrika ny hanaovanao izany izy

⁵satria tia ny firenentsika izy sady izy no efa nanorina ny sinagoga* ho antsika.

⁶Ary nandeha niaraka taminy Jesosy. Rehefa teo akaikin’ny trano Izy dia naniraka namana hitsena Azy ilay kapiteny ka niteny Taminy hoe: Tompoko, aza misahirana Ianao; fa tsy mendrika hidiranao ao ambanin’ny tafon-tranoko aho.

⁷Koa na dia ny tenako aza dia nataoko fa tsy mendrika hankeo Aminao; fa mitenena ihany dia ho sitrana ny mpanompolahiko.

⁸Fa izaho koa mba lehilahy manana lehibe ihany ary manana miaramila izay feheziko; koa hoy aho amin’ny iray: Mandehana! Dia mandeha izy, ary amin’ny iray koa: Avia! Dia avy izy, ary amin’ny mpanompoko: Ataovy izao! Dia manatanteraka izy.

⁹Nony nahare izany Jesosy dia gaga taminy; ary nitodika Izy ka niteny tamin’ny vahoaka izay nanaraka Azy hoe: Lazaiko aminareo fa tsy mbola nahita finoana lehibe toy izany Aho na dia teo amin’ny Israely aza.

¹⁰Ary nony tafaverina tao an-trano ireo iraka ireo dia hitany fa sitrana ilay mpanompo.

¹¹Taoriana kelin’izany Jesosy dia nankany amin’ny tanàna iray atao hoe Naina; ary nanaraka Azy ny mpianany sy vahoaka betsaka.

¹²Ary rehefa nanakaiky ny vavahadin’ny tanàna Izy dia indro, nisy fatin’ny lehilahy iray noentina halevina, izay zanaka lahitokan’ny reniny sady mpitondratena Ravehivavy; ary nisy vahoaka betsaka avy tao an-tanàna nanaraka azy.

¹³Nony nahita an-dRavehivavy ny Tompo dia onena azy ka hoy Izy taminy: Aza mitomany!

¹⁴Ary nanatona Izy ka nikasika ny tranovorona dia nijanona ireo izay nilanja. Ary hoy Jesosy: Ry zatovo, hoy Aho aminao: Miarena!

¹⁵Dia niarina ny maty sady niteny ka natolony ny reniny.

¹⁶Ary raiki-tahotra ny olona rehetra ka nankalaza an’Andriamanitra hoe: Mpaminany lehibe no efa mitsangana eto amintsika; ary Andriamanitra efa nitsinjo ny olony.

¹⁷Dia niely nanerana an’i Jodia* sy ny tany manodidina rehetra ny lazan’i Jesosy ny amin’izany zavatra izany.

¹⁸Ny mpianatr’i Jaona dia nanambara izany rehetra izany taminy. Ary niantso ny mpianany roa lahy hankao aminy i Jaona,

¹⁹dia naniraka azy hankany amin’ny Tompo hilaza hoe: Ianao va Ilay ho avy sa mbola hafa no andrasantsika?

²⁰Nony tonga tany aminy ireo lehilahy ireo dia niteny hoe: Naniraka anay hankaty aminao i Jaona Mpanao batisa hanontany hoe: Ianao va Ilay ho avy sa mbola hafa no andrasantsika?

²¹Tamin’izany ora izany dia nahasitrana olona maro tamin’ny rofy sy ny aretina ary ny fanahy ratsy Jesosy sady nampahiratra ny jamba maro.

²²Dia namaly azy ireo Izy hoe: Mandehana ianareo, ambarao amin’i Jaona izao hitanareo sy renareo izao: mahiratra ny jamba, mandeha ny mandringa, diovina ny boka, mahare ny marenina, atsangana ny maty ary ny mahantra dia itoriana ny Filazantsara.

²³Ary sambatra izay tsy ho tafintohina noho ny Amiko!

²⁴Nony lasa ny irak’i Jaona dia nilaza ny amin’i Jaona tamin’ny vahoaka Jesosy hoe: Hizaha inona no nalehanareo tany an-tany efitra? Volotara nohozongozonin’ny rivotra va?

²⁵Sa hizaha inona no nalehanareo? Olona mitafy lamba mirentirenty va? Indro, ny mitafy lamba mirentirenty sy miaina amin’ny fahafinaretana dia ao an-dapan’ny mpanjaka.

²⁶Sa hizaha inona no nalehanareo? Mpaminany[7] va? Eny, hoy Aho aminareo sady mihoatra lavitra noho ny mpaminany izy.

²⁷Fa izy ilay voasoratra hoe: «Indro Aho maniraka ny irako hialoha Anao, izay hamboatra ny lalanao eo alohanao» (Mal 3.1).

²⁸Lazaiko aminareo: Tsy misy lehibe noho i Jaona amin’izay nateraky ny vehivavy; nefa ny kely indrindra amin’ny fanjakan’Andriamanitra dia lehibe noho izy.

²⁹Ary ny vahoaka rehetra sy ny mpamory hetra raha nandre dia nanamarina an’Andriamanitra satria natao batisa tamin’ny batisan’i Jaona izy ireny.

³⁰Fa ny Fariseo* sy ny mpahay lalàna kosa dia nandà ny fikasan’Andriamanitra satria tsy mba nanatona hataon’i Jaona batisa.

³¹Tahaka ny inona ary no hanoharako ny olona amin’ity taranaka ity? Tahaka ny inona moa izy?

³²Tahaka ny ankizy madinika mipetraka eny an-tsena izy, izay mifampiantso hoe: Efa nitsoka sodina taminareo izahay nefa tsy nandihy ianareo, efa nanao hira fisaonana izahay nefa tsy nitomany ianareo.

³³Fa tonga i Jaona Mpanao batisa, tsy nihinan-kanina na nisotro divay, dia hoy ianareo: Manana demonia* izy.

³⁴Tonga ny Zanak’Olona* mihinana sy misotro kosa, dia hoy ianareo: Indro, olona fatra-pitia hanina sy mpisotro divay, sakaizan’ny mpamory hetra sy ny mpanota.

³⁵Fa ny fahendrena dia hamarinin’ny zanany rehetra.

³⁶Nisy Fariseo* iray nanasa an’i Jesosy hiara-misakafo aminy; dia niditra tao an-tranon’ilay Fariseo Izy ka nipetraka nisakafo.

³⁷Ary indro, nisy vehivavy mpanota tao an-tanàna, koa rehefa fantany fa nipetraka nisakafo tao an-tranon’ilay Fariseo Jesosy dia nitondra tavoara alabasitara feno menaka manitra izy;

³⁸ary nijanona tao aorianany teo anilan’ny tongony izy ka nitomany, dia nahakotsa ny tongony tamin’ny ranomasony sy namaoka azy tamin’ny volon-dohany, dia nanoroka fatratra ny tongony ka nanosotra azy tamin’ny menaka manitra.

³⁹Nony nahita izany ilay Fariseo nanasa Azy dia niteny anakampo hoe: Raha mpaminany Ity dia ho nahafantatra io vehivavy mikasika Azy io sy ny momba azy; fa mpanota io.

⁴⁰Fa hoy Jesosy taminy: Ry Simona, manan-kolazaina aminao Aho. Dia hoy izy: Mpampianatra ô, lazao ary.

⁴¹Nisy roa lahy nananan’ny mpampindram-bola iray trosa: Ny iray dia nananany denaria* dimanjato, ary ny iray kosa dia dimampolo.

⁴²Ary raha tsy nanan-kaloa izy roa lahy dia samy navelany. Koa iza moa amin’ireo no ho tia azy kokoa?

⁴³Dia namaly i Simona hoe: Heveriko fa ilay namoizany be. Dia hoy Izy taminy: Marina ny hevitrao.

⁴⁴Ary nitodika nijery an-dRavehivavy Jesosy ka niteny tamin’i Simona hoe: Hitanao va io vehivavy io? Niditra teto an-tranonao Aho; nefa tsy mba nanome Ahy rano hanasana ny tongotro ianao; fa izy kosa dia nahakotsa ny tongotro tamin’ny ranomasony ary namaoka azy tamin’ny volon-dohany.

⁴⁵Tsy mba nanoroka Ahy akory ianao; nefa izy, hatrizay nidirako, dia tsy mbola nitsahatra nanoroka fatratra ny tongotro.

⁴⁶Ny lohako dia tsy mba nohosoranao diloilo akory; fa izy kosa dia nanosotra menaka manitra ny tongotro.

⁴⁷Koa amin’izany dia lazaiko aminao: Voavela ny helony marobe, fa be fitiavana izy; fa izay voavela tamin’ny kely dia kely fitiavana.

⁴⁸Dia hoy Izy tamin-dRavehivavy: Voavela ny helokao.

⁴⁹Ary izay niara-nihinana taminy dia niresaka hoe: Iza moa Ity no mba mamela heloka?

⁵⁰Ary hoy Izy tamin-dRavehivavy: Ny finoanao efa namonjy anao; mandehana amin’ny fiadanana.