Read La Bible en Malgache Deoteronomia 10 Bible Online

Deoteronomia 10 - La Bible en Malgache bible

Deoteronomia 10

¹Tamin’io andro io no nilazan’NY TOMPO tamiko hoe: Aoka ianao hipaika vato fisaka roa tahaka ireo teo aloha dia miakara ho etỳ Amiko, etỳ an-tendrombohitra, ary manaova vata hazo;

²fa hosoratako amin’io vato fisaka vaovao io indray ireo teny teo amin’ny vato fisaka nomontsamontsanina ka hataonao ao anatin’ny vata ireny.

³Dia nanamboatra vata tamin’ny hazo akasia aho ary nipaika vato fisaka roa tahaka ny teo dia niakatra tao an-tendrombohitra aho; avy eo dia nitondra ny vato fisaka roa teny an-tanako.

⁴Dia nasiany soratra tahaka ny teo ihany ny vato fisaka, dia ny Teny Folo izay nolazain’NY TOMPO taminareo tao an-tendrombohitra, tao afovoan’ny afo, tamin’ny andro nivoriana; dia nomen’NY TOMPO ahy ireny.

⁵Nihodina aho ka nidina niala teo amin’ny tendrombohitra, ary napetrako tao anatin’ny vata izay nataoko ny vato fisaka ka mbola ao ihany ireny araka izay nandidian’NY TOMPO ahy.

⁶Ary nandeha niala tamin’ny fantsakan’i Bene-Jakana ny Zanak’Israely ka nankany Mosera; tao no nahafatesan’i Arona sy nandevenana azy; ary i Eleazara zanany no tonga mpisorona nandimby azy.

⁷Nony niala tao izy ireo dia nankany Godgoda; ary nony niala tao Godgoda izy dia nankany Jotbata, tany be ony.

⁸Tamin’io andro io no nanokanan’NY TOMPO ny fokon’i Levy hitondra ny vata misy ny faneken’NY TOMPO sy hijoro eo anatrehan’NY TOMPO, hanao fanompoam-pivavahana Aminy sy hitsodrano amin’ny anarany, mandraka androany.

⁹Izany no tsy ananan’ny levita* anjara na lova eo amin’ny rahalahiny; NY TOMPO no lovany, araka izay nolazain’NY TOMPO Andriamanitrao taminy.

¹⁰Nitoetra efapolo andro sy efapolo alina tao an-tendrombohitra tahaka ilay teo ihany aho, dia nihaino ahy NY TOMPO ka tamin’io andro io dia tsy nety nandringana anareo Izy.

¹¹Ary hoy NY TOMPO tamiko: Miaingà, mandehana eo alohan’ny olona, mba hidirany sy handovany ny tany izay nianianako tamin’ny razany homena azy.

¹²Ary ankehitriny, ry Israely ô, inona moa no andrasan’NY TOMPO Andriamanitrao aminao, afa-tsy ny hatahotra NY TOMPO Andriamanitrao sy ny handeha amin’ny lalany rehetra ary ny ho tia Azy sy hanompo NY TOMPO Andriamanitrao amin’ny fonao manontolo sy ny fanahinao manontolo,

¹³hitandrina ny didin’NY TOMPO sy ny lalànany izay omeko anao anio, mba hahita soa ianao?

¹⁴Indro, an’NY TOMPO Andriamanitrao ny lanitra sy ny lanitry ny lanitra ary ny tany mbamin’izay rehetra eo aminy.

¹⁵Kanefa ny razanao no niraiketan’ny fitiavan’NY TOMPO ka nifidy anareo zanany mandimby azy Izy mihoatra noho ny firenena rehetra, tahaka ny amin’izao anio izao.

¹⁶Koa forao ny fonareo fa aza mafy hatoka intsony ianareo.

¹⁷Fa NY TOMPO Andriamanitrareo no Andriamanitry ny andriamanitra sy Tompon’ny tompo, Andriamanitra lehibe sy mahery ary mahatahotra, izay tsy mizaha tavan’olona na mandray kolikoly;

¹⁸manome rariny ny kamboty sy ny mpitondratena Izy sady tia ny vahiny ka manome azy hanina sy fitafiana.

¹⁹Koa tiavo ny vahiny, fa efa mba vahiny tany amin’ny tany Ejipta ianareo.

²⁰NY TOMPO Andriamanitrao no hatahoranao; Izy no hotompoinao, Izy no hifikiranao, ary ny anarany no hianiananao.

²¹Izy no fideranao ary Izy no Andriamanitrao izay efa nanatanteraka ireo zavatra lehibe sy mahatahotra ireo taminao, dia ireo izay efa hitan’ny masonao.

²²Olona fitopolo ny razanao izay nidina tany Ejipta; nefa ankehitriny dia efa nataon’NY TOMPO Andriamanitrao maro tahaka ny kintana eny amin’ny lanitra ianao.