Read La Bible en Malgache Deoteronomia 12 Bible Online

Deoteronomia 12 - La Bible en Malgache bible

Deoteronomia 12

¹Toy izao ny didy sy fitsipika izay hotandremanareo ka harahinareo any amin’ny tany izay omen’NY TOMPO, Andriamanitry ny razanao, anao holovana amin’ny andro rehetra hiainanareo ambonin’ny tany:

²Horavanareo mihitsy ny toerana rehetra izay nanompoan’ireo firenen-tsamihafa izay noroahinareo, ny andriamaniny teny ambonin’ny tendrombohitra avo sy havoana ary teny ambanin’ny hazo maitso rehetra.

³Dia horavanareo ny alitarany, hotorotoroinareo ny tsangambaton-tsampiny, hodoranareo amin’ny afo ny tsangankazon-tsampy ho an’ny Aserahany* ary ny sarin-javatra voasokitra, izay andriamaniny, dia hokapainareo ka hofoananareo tsy ho eo amin’izany toerana izany intsony ny anarany.

⁴Aza manao toy izany amin’NY TOMPO Andriamanitrareo ianareo.

⁵Fa ny tany izay hofidin’NY TOMPO Andriamanitrareo amin’ny fokonareo rehetra hasiany ny anarany sy honenany no hohatoninareo sy halehanareo.

⁶Any no hitondranareo ny fanatitrareo dorana manontolo, ny fanatitrareo hafa alatsa-dra, ny fahafolonkarenanareo, ny fanomezana atolotrareo, ny fanalam-boadinareo, ny fanatitrareo an-tsitrapo ary ny voalohan-teraky ny ombinareo sy ny ondry aman’osinareo;

⁷any ianareo sy ny ankohonanareo no hihinana eo anatrehan’NY TOMPO Andriamanitrareo; ary aoka hifaly ianareo amin’izay rehetra noharìn’ny tananareo, izay efa nitahian’NY TOMPO Andriamanitrao anao.

⁸Aza manao toy izay rehetra ataontsika eto ankehitriny intsony ianareo, dia izao samy manao izay heveriny ho mahitsy izao.

⁹Fa ianareo dia tsy mbola tonga any amin’ny fitsaharana sy ny lova omen’NY TOMPO Andriamanitrao anao.

¹⁰Fa rehefa tafita an’i Jordana ianareo ka monina any amin’ny tany izay omen’NY TOMPO Andriamanitrareo anareo holovana, sady homeny fitsaharana amin’ny ady amin’ny fahavalonareo rehetra manodidina ianareo ka mandry fehizay,

¹¹dia eo amin’ny tany izay hofidin’NY TOMPO Andriamanitrareo hampitoerany ny anarany no hitondranareo izay rehetra andidiako anareo, dia ny fanatitrareo dorana manontolo, ny fanatitrareo hafa alatsa-dra, ny fahafolonkarenanareo, ny fanomezana atolotrareo ary izay zavatra tsara ataonareo voady amin’NY TOMPO.

¹²Dia hifaly eo anatrehan’NY TOMPO Andriamanitrareo ianareo, ny zanakareo lahy, ny zanakareo vavy, ny mpanompolahinareo, ny mpanompovavinareo, ary ny levita* izay ao an-tanànanareo; fa ny levita dia tsy mba manana anjara na lova eo aminareo.

¹³Mitandrema mba tsy hatolotrao eny amin’izay tany rehetra tianao any ny fanatitrao dorana manontolo;

¹⁴fa ao amin’ny tany izay hofidin’NY TOMPO ihany amin’ny iray amin’ireo fokonao no hanoloranao azy, sady ao koa no hanatanterahanao izay rehetra andidiako anao.

¹⁵Kanefa mahazo mamono zavatra sy mihinan-kena ianao, araka izay rehetra irinao eny amin’ny tanànanao rehetra, araka ny fitahian’NY TOMPO Andriamanitrao izay omeny anao; na ny olona tsy madio na ny madio, dia samy mahazo mihinana azy ihany, tahaka ny ahazoany mihinana ny gazela sy ny diera.

¹⁶Kanefa, aza hanina ny rany, fa aidino amin’ny tany toy ny rano.

¹⁷Tsy azonao hanina ao an-tanànanao, na ny ampahafolon’ny varinao sy ny ranom-boalobokao ary ny diloilonao, na ny voalohan-teraky ny ombinao sy ny ondry aman’osinao, na ny zavatra rehetra hataonao voady, na ny fanatitrao an-tsitrapo, na ny fanomezana atolotrao.

¹⁸Fa eo anatrehan’NY TOMPO Andriamanitrao no hihinananao azy, dia eo amin’ny tany izay hofidin’NY TOMPO Andriamanitrao, dia ianao, ny zanakao lahy, ny zanakao vavy, ny mpanompolahinao, ny mpanompovavinao, ary ny levita izay ao an-tanànanao; hifaly eo anatrehan’NY TOMPO Andriamanitrao ianao amin’izay rehetra noharìn’ny tananao.

¹⁹Mitandrema mba tsy hataonao an-tsirambina ny levita amin’ny andro rehetra hiainanao amin’ny taninao.

²⁰Raha hitarin’NY TOMPO Andriamanitrao ny faritaninao, araka izay nolazainy taminao, ka hoy ianao: Hihinan-kena aho, satria maniry hihinan-kena ianao, dia mahazo mihinan-kena araka izay rehetra irinao ianao.

²¹Raha lavitra anao loatra ny tany izay hofidin’NY TOMPO Andriamanitrao hasiany ny anarany dia hamonoanao ny ombinao sy ny ondry aman’osinao izay nomen’NY TOMPO anao, araka izay nandidiako anao, ary hohaninao ao an-tanànanao, araka izay rehetra irinao izany.

²²Kanefa tahaka ny ahazoanao mihinana ny gazela sy ny diera no hahazoanao mihinana ireny; na ny olona tsy madio na ny madio dia samy mahazo mihinana azy.

²³Kanefa tandremo tsara mba tsy hohaninao ny ra, fa ny ra no aina, ary tsy mahazo mihinana ny aina miaraka amin’ny hena ianao.

²⁴Aza mihinana ny ra ianao fa aidino amin’ny tany toy ny rano izy;

²⁵eny, aza mihinana azy ianao, mba hahita soa ianao sy ny taranakao mandimby anao, raha manao izay mahitsy eo imason’NY TOMPO.

²⁶Fa ny zava-masinao sy ny zavatra nataonao voady dia ento mankany amin’ny tany izay hofidin’NY TOMPO.

²⁷Ary atolory eo amin’ny alitaran’NY TOMPO Andriamanitrao ny fanatitrao dorana manontolo, dia ny henany sy ny rany; ary ny ran’ny fanatitrao hafa dia aidino eo amin’ny alitaran’NY TOMPO Andriamanitrao, fa ny henany dia azonao hohanina ihany.

²⁸Tandremo ka henoy izao teny rehetra izao izay omeko anao, mba hahita soa ianao sy ny taranakao mandimby anao mandrakizay, raha manatanteraka izay tsara sy mahitsy eo imason’NY TOMPO Andriamanitrao ianao.

²⁹Rehefa aringan’NY TOMPO Andriamanitrao eo anoloanao ny firenen-tsamihafa izay alehanao ka horesenao, ary handresy azy ireny ianao ka honina eo amin’ny taniny,

³⁰dia mitandrema, fandrao voafandrika hanaraka ny fanaony ianao, rehefa voaringana eo anoloanao izy; ary andrao mamotopototra ny amin’ny andriamaniny ianao ka miteny hoe: Nanao ahoana no nanompoan’ireny firenena ireny ny andriamaniny? Fa izaho koa dia mba hanao toy izany.

³¹Aza manao toy izany amin’NY TOMPO Andriamanitrao; fa ny fahavetavetana rehetra, izay halan’NY TOMPO, no nataony tamin’ny andriamaniny; ny zanany lahy sy ny zanany vavy aza dia nodorany tamin’ny afo ho an’ny andriamaniny.