Read La Bible en Malgache Deoteronomia 14 Bible Online

Deoteronomia 14 - La Bible en Malgache bible

Deoteronomia 14

¹Zanaky NY TOMPO Andriamanitrareo ianareo, koa aza mitetika ny tenanareo, na manaratra ny eo ambonin’ny handrinareo noho ny amin’ny maty.

²Fa firenena masina ho an’NY TOMPO Andriamanitrao ianao ka voafidiny ho fananany sarobidy indrindra mihoatra noho ny firenena rehetra ambonin’ny tany.

³Aza mihinana izay rehetra fahavetavetana.

⁴Fa ireto avy ireo biby azonareo hanina: Ny omby, ny ondry, ny osy,

⁵ny diera, ny gazela, ny ombidia, ny osidia, ny antilopa, ny ombimanga ary ny osidia izay any an-tendrombohitra.

⁶Izay biby rehetra mivaky kitro ka misaraka tsara ny kitrony sady mandinika no azonareo hanina.

⁷Nefa amin’ireo mandinika na mivaky kitro dia izao ihany kosa no tsy azonareo hanina: Ny rameva sy ny bitro ary ny hiràka, satria mandinika ihany izy ireny nefa tsy mivaky kitro; maloto aminareo ireny;

⁸ny kisoa koa, satria mivaky kitro nefa tsy mandinika, maloto aminareo izy; ny henan’ireny dia tsy ho fihinanareo ary ny fatiny dia tsy hokasihinareo.

⁹Ary amin’izay rehetra ao anatin’ny rano dia izay rehetra misy vombony sy kirany no azonareo hanina;

¹⁰fa izay rehetra tsy misy vombony sy kirany kosa dia tsy azonareo hanina, satria maloto aminareo ireny.

¹¹Ny vorona madio rehetra dia azonareo hanina.

¹²Nefa izao kosa no aoka tsy hohaninareo: Ny vaotoro, ny gipa, ny ankoay,

¹³ny papango, ny voromahery, ny papango mainty samy araka ny karazany avy,

¹⁴ny goaika rehetra samy araka ny karazany avy,

¹⁵ny aotirisy, ny tararaka, ny vorondriaka, ny hitsikitsika samy araka ny karazany avy,

¹⁶ny vorondolo, ny vorondolo lehibe, ny ibisy,

¹⁷ny sama, ny vaotoro madinika,

¹⁸ny manarana, ny vano samy araka ny karazany avy, ny takidara, ary ny manavy.

¹⁹Ny bibikely mandady rehetra izay manana elatra dia haloto aminareo ka tsy azonareo hanina.

²⁰Ny biby manana elatra izay madio no azonareo hanina.

²¹Aza mihinana izay maty ho azy, fa omeo ho an’ny vahiny izay ao an-tanànanao ireny mba hohaniny, na amidio amin’ny olona hafa firenena; fa firenena masina ho an’NY TOMPO Andriamanitrao ianao. Aza mahandro zanak’osy amin’ny rononon-dreniny.

²²Aloavy tsara ny ampahafolon’ny vokatra rehetra avy amin’ny voa nafafinao, dia ny vokatra any an-tsaha isan-taona;

²³aoka ho eo anatrehan’NY TOMPO Andriamanitrao, eo amin’ny tany izay hofidiny hampitoerany ny anarany no hihinananao ny ampahafolon’ny varinao, ny ranom-boalobokao, ny diloilonao ary ny voalohan-teraky ny ombinao sy ny ondry aman’osinao, mba hianaranao hatahotra NY TOMPO Andriamanitrao mandrakariva.

²⁴Fa raha lavitra loatra ny lalana halehanao ka tsy mahatondra izany zavatra izany ianao, satria lavitra anao loatra ny tany izay hofidin’NY TOMPO Andriamanitrao hampitoerany ny anarany, raha notahìn’NY TOMPO Andriamanitrao ianao,

²⁵dia hamidinao vola izany, ary hofonosinao ny vola ka hoentinao eo an-tananao hankany amin’ny tany izay hofidin’NY TOMPO Andriamanitrao;

²⁶ividiano izay rehetra tianao, na omby, na ondry, na osy, na divay, na divay mahery, na izay zavatra hafa tianao io vola io; ary aoka ho eo anatrehan’NY TOMPO Andriamanitrao no hihinananao izany sy hifalianao mbamin’ny ankohonanao.

²⁷Ary ny levita* izay ao an-tanànanao dia aza ataonao an-tsirambina; fa tsy manana anjara lova eo aminao izy.

²⁸Isan-telo taona dia alao ny ampahafolon’ny vokatrao rehetra amin’izany taona izany ka ataovy ao an-tanànanao;

²⁹dia aoka ho avy ny levita, satria tsy mba manana anjara na lova eo aminao izy sy ny vahiny ary ny kamboty sy ny mpitondratena izay ao an-tanànanao, dia hihinana ireo ka ho voky, mba hotahìn’NY TOMPO Andriamanitrao amin’ny asan’ny tananao rehetra ianao.