Read La Bible en Malgache Deoteronomia 15 Bible Online

Deoteronomia 15 - La Bible en Malgache bible

Deoteronomia 15

¹Isaky ny fito taona dia manaova fanafahan-trosa ianao.

²Toy izao no fomban’ny fanafahan-trosa: Hamoy ny trosany rehetra ny tompon-trosa rehetra izay nampindram-bola tamin’ny namany; tsy hanery ny namany, izay rahalahiny handoa azy, satria antsoina hoe Fanafahan’NY TOMPO izany.

³Ny olona hafa firenena ihany no azonao enjehina; fa izay anao any amin’ny rahalahinao kosa dia hafoinao;

⁴kanefa tsy dia hisy mahantra eo aminao, fa hitahy anao tokoa NY TOMPO eo amin’ny tany izay omen’NY TOMPO Andriamanitrao ho lovanao,

⁵raha mihaino tsara ny feon’NY TOMPO Andriamanitrao ianao ka mitandrina hanaraka ireo lalàna rehetra ireo, izay andidiako anao anio.

⁶Fa hitahy anao NY TOMPO Andriamanitrao araka izay nolazainy taminao; hampisambotra vola ny firenena maro ianao fa ianao kosa dia tsy hisambotra; ary hifehy firenena maro ianao fa ireny kosa dia tsy mba hifehy anao.

⁷Raha misy mahantra ny rahalahinao ao an-tanànanao iray, amin’ny taninao izay omen’NY TOMPO Andriamanitrao anao, dia aza manamafy ny fonao, na manakombona ny tananao amin’ny rahalahinao mahantra;

⁸fa sokafy tsara aminy ny tananao ka ampisambory izay ilainy izy, araka izay mahory azy.

⁹Mitandrema anefa, fandrao hisy hevi-dratsy ao am-ponao milaza hoe: Antomotra ny taona fahafito, dia ny taom-panafahana; ary ho ratsy fijery ny rahalahinao mahantra ianao ka tsy hanome azy akory; dia hitaraina amin’NY TOMPO hiampanga anao izy ka ho fahotanao izany.

¹⁰Omeo tokoa izy, ary aoka tsy halahelo ny fonao raha manome azy, satria izany zavatra izany no hitahin’NY TOMPO Andriamanitrao anao amin’ny asanao rehetra sy amin’izay rehetra ataon’ny tananao.

¹¹Fa ny tany dia tsy ilaozan’izay olo-mahantra, koa izany no andidiako anao hoe: Sokafy tsara amin’ny rahalahinao ny tananao, dia amin’ny malahelo sy ny mahantra eo amin’ny taninao.

¹²Raha namidy taminao ny namanao, na lehilahy, na vehivavy hebreo, ka efa nanompo anao enin-taona, dia hovotsoranao ho afaka izy amin’ny taona fahafito.

¹³Ary rehefa votsoranao ho afaka izy dia tsy havelanao handeha tanam-polo;

¹⁴fa hisy hampitondrainao azy avy amin’ny ondry aman’osinao sy avy amin’ny famoloananao ary avy amin’ny famiazanao; araka izay efa nitahin’NY TOMPO Andriamanitrao anao no hanomezanao azy.

¹⁵Tsarovy fa andevo tany amin’ny tany Ejipta ianao nefa nanavotra anao NY TOMPO Andriamanitrao, koa izany no andidiako anao izao zavatra izao anio.

¹⁶Kanefa raha hoy izy aminao: Tsy hiala aminao aho, satria tsy foiny ianao sy ny ankohonanao fa finaritra aminao izy,

¹⁷dia halainao ny fanjaibe ka hotevehinao amin’ny varavarana ny sofiny dia ho mpanomponao mandrakizay izy. Ary toy izany koa no hataonao amin’ny mpanompovavinao.

¹⁸Aza ataonao ho sarotra aminao ny hamotsotra azy ho afaka, fa indroa toraka ny karaman’ny mpikarama no azonao tamin’ny nanompoany anao enin-taona; dia hitahy anao NY TOMPO Andriamanitrao amin’izay rehetra ataonao.

¹⁹Ny lahy rehetra amin’ny voalohan-teraky ny ombinao sy ny ondry aman’osinao dia hohamasininao ho an’NY TOMPO Andriamanitrao; aza mampiasa ny voalohan-teraky ny ombinao, na manety ny voalohan-teraky ny ondry aman’osinao.

²⁰Eo anatrehan’NY TOMPO Andriamanitrao no hihinananao sy ny ankohonanao azy isan-taona isan-taona eo amin’ny fitoerana izay hofidin’NY TOMPO.

²¹Fa raha manan-kilema izy, na mandringa, na jamba, na izay kilema ratsy hafa, dia aza vonoinao ho fanatitra ho an’NY TOMPO Andriamanitrao ireny,

²²fa ao an-tanànanao ihany no hihinananao ireny; na ny olona tsy madio na ny madio dia samy mahazo mihinana azy, tahaka ny ahazoany mihinana ny gazela sy ny diera.

²³Kanefa ny rany no aza hanina, fa aidino amin’ny tany toy ny rano.