Read La Bible en Malgache Deoteronomia 16 Bible Online

Deoteronomia 16 - La Bible en Malgache bible

Deoteronomia 16

¹Tandremo ny volana Abiba* ka ataovy ny Paska an’NY TOMPO Andriamanitrao; fa tamin’ny volana Abiba no nitondran’NY TOMPO Andriamanitrao anao nivoaka avy tany Ejipta tamin’ny alina.

²Vonoy ny Paska an’NY TOMPO Andriamanitrao, dia ondry aman’osy sy omby, eo amin’ny tany izay hofidin’NY TOMPO hampitoerany ny anarany.

³Aza mihinana ny misy masirasira miaraka aminy; hafitoana no hihinananao mofo tsy misy masirasira, dia mofom-pahoriana, fa tampoka no nivoahanao avy tany amin’ny tany Ejipta ka hotsarovanao amin’ny andro rehetra hiainanao io andro izay nivoahanao avy tany amin’ny tany Ejipta io.

⁴Ary aoka tsy hisy masirasira eo aminao sy ao amin’ny faritaninao mandritra ny hafitoana; aoka koa tsy hisy ho tavela miloaka alina ny henan’ny fanatitra izay novonoinao tamin’ny harivan’ny andro voalohany.

⁵Tsy hisy azonao amonoana ny Paska anefa ny tanànanao rehetra izay omen’NY TOMPO Andriamanitrao anao;

⁶fa eo amin’ny fitoerana izay hofidin’NY TOMPO Andriamanitrao hampitoerany ny anarany no hamonoanao azy rehefa hariva tokony ho maty masoandro, dia tahaka ilay nivoahanao avy tany Ejipta.

⁷Hahandroinareo izy, dia hano eo amin’ny tany izay hofidin’NY TOMPO Andriamanitrao; ary amin’ny maraina dia modia any amin’ny tranolainao.

⁸Henemana no hihinananao mofo tsy misy masirasira; fa ny andro fahafito dia fara fivoriana ho an’NY TOMPO Andriamanitrao ka tsy hanaovana raharaha amin’io.

⁹Manisà herinandro fito; manomboka amin’ny andro iandohan’ny fijinjam-bary no hanisanao azy.

¹⁰Dia ankalazao ho andro firavoravoana ho an’NY TOMPO Andriamanitrao ny andro manaraka ireo Herinandro[1] ireo ka manolora fanatitra an-tsitrapo, izay homenao araka izay itahin’NY TOMPO Andriamanitrao anao;

¹¹ary mifalia eo anatrehan’NY TOMPO Andriamanitrao ianao miaraka amin’ny ny zanakao lahy, ny zanakao vavy, ny mpanompolahinao, ny mpanompovavinao ary ny levita* izay ao an-tanànanao mbamin’ny vahiny sy ny kamboty ary ny mpitondratena izay eo aminao, dia eo amin’ny tany izay hofidin’NY TOMPO Andriamanitrao hampitoerany ny anarany.

¹²Tsarovy fa andevo tany Ejipta ianao; koa tandremo sy araho ireo didy ireo.

¹³Tandremo mandritra ny hafitoana ny andro firavoravoana fitoerana amin’ny trano rantsan-kazo, rehefa nangoninao ny avy amin’ny famoloananao sy ny famiazanao.

¹⁴Ary mifalia ianao miaraka amin’ny zanakao lahy, ny zanakao vavy, ny mpanompolahinao, ny mpanompovavinao ary ny levita* mbamin’ny vahiny sy ny kamboty ary ny mpitondratena izay ao an-tanànanao amin’ny andro firavoravoanao.

¹⁵Hafitoana no hitandremanao andro firavoravoana ho an’NY TOMPO Andriamanitrao eo amin’ny tany izay hofidin’NY TOMPO, satria hitahy anao NY TOMPO Andriamanitrao amin’ny vokatrao rehetra sy ny asan’ny tananao rehetra ka hifaly tokoa ianao.

¹⁶Intelo isan-kerintaona no hiseho eo anatrehan’NY TOMPO Andriamanitrao ny lehilahy rehetra ao aminao, eo amin’ny tany izay hofidiny, dia amin’ny andro firavoravoana fihinanana ny mofo tsy misy masirasira sy ny andro firavoravoana manaraka ireo Herinandro[2] ary ny andro firavoravoana fitoerana amin’ny trano rantsan-kazo. Ary aoka tsy ho tanam-polo no hisehoany eo anatrehan’NY TOMPO;

¹⁷fa samy hanolotra izay zakany avy, araka ny fitahiana izay omen’NY TOMPO Andriamanitrao anao.

¹⁸Mifidiana mpitsara sy mpifehy ho anao ao an-tanànanao rehetra, izay omen’NY TOMPO Andriamanitrao anao, araka ny fokonao; dia hitsara ny olona amin’ny fitsarana marina ireo.

¹⁹Aza manao fitsarana miangatra, aza mizaha tavan’olona ary aza mandray kolikoly; fa mahajamba ny mason’ny hendry ny kolikoly ary mamadika ny tenin’ny marina.

²⁰Ny tena marina no harahinao, mba ho velona ianao ka handova ny tany izay omen’NY TOMPO Andriamanitrao anao.

²¹Aza manangana hazo ho tsangankazon-tsampy eo anilan’ny alitaran’NY TOMPO Andriamanitrao, izay ataonao ho anao.

²²Ary aza manao tsangambaton-tsampy ho anao; fa halan’NY TOMPO Andriamanitrao izany.